ଲଣ୍ଡନ: ମାନବ ସଭ୍ୟତାର କ୍ରମବିକାଶ ସହିତ ଆପରାଧିକ କାର୍ଯ୍ୟ ବଢ଼ିଥିବା ନେଇ ଏବେ ଗବେଷଣାରୁ ଜଣାପଡ଼ିଛି। ଇଂଲଣ୍ଡର ଦକ୍ଷିଣପୂର୍ବରେ ଥିବା ଚଲର୍ଟନ ହିଲ୍ ଅଞ୍ଚଳ ଅନ୍ତର୍ଗତ ଓ୍ବେନଡେଭର ନିକଟବର୍ତ୍ତୀ ଓ୍ବେଲଓ୍ବିକ୍ ଫାର୍ମରୁ ଏକ ପୁରୁଣା କଙ୍କାଳ ଠଶବ କରାଯାଇଛି। ମିଳିଥିବା ଲୌହଯୁଗର ଏହି ମାନବ କଙ୍କାଳକୁ ଅଧ୍ୟୟନ କରି ପ୍ରତ୍ନତତ୍ତ୍ୱବିତ୍ମାନେ ବହୁ ତଥ୍ୟ ଜାଣିବାକୁ ପାଇଛନ୍ତି। ଏଠାରେ ୪ ହଜାର ବର୍ଷତଳେ ଲୌହଯୁଗ ସଭ୍ୟତା ଥିବା ଖନନରୁ ଅନୁମିତ ହୁଏ। ଏହି ସ୍ଥାନରୁ ପଛପଟୁ ହାତ ବନ୍ଧାଥିବା ଏକ କଙ୍କାଳ ଉଦ୍ଧାର କରାଯାଇଥିଲା। ହୁଏତ ସମ୍ପୃକ୍ତ ବ୍ୟକ୍ତିଙ୍କୁ ମୃତ୍ୟୁଦଣ୍ଡାଦେଶ ଅବା ହତ୍ୟା କରାଯାଇଥାଇପାରେ ବୋଲି ଅନୁମାନ କରାଯାଇଛି। ସେତେବେଳେ ମୃତ୍ୟୁଦଣ୍ଡାଦେଶ ମିଳୁଥିବା ଲୋକଙ୍କର ମୁଣ୍ଡକାଟ କରାଯାଉଥିବା ପ୍ରତ୍ନତତ୍ତ୍ୱବିତ୍ କହିଛନ୍ତି। ତେବେ କଙ୍କାଳର ମୁଣ୍ଡ ସୁରକ୍ଷିତ ରହିଛି। ଅପରପକ୍ଷରେ ମୃତ୍ୟୁଦଣ୍ଡାଦେଶ ଦିଆଯାଉଥିବା ବ୍ୟକ୍ତିଙ୍କ ମୃତଦେହକୁ କଫିନ୍ରେ ଭର୍ତ୍ତିକରି କବର ଦେବା ପରମ୍ପରା ପ୍ରଚଳିତ ଥିଲା। କିନ୍ତୁ ମିଳିଥିବା କଙ୍କାଳକୁ କଫିନ୍ରେ ରଖାଯାଇନାହିଁ। ତେଣୁ ସମ୍ପୃକ୍ତ ବ୍ୟକ୍ତିଙ୍କୁ ଅପରାଧୀମାନେ ଅମାନୁଷିକ ଭାବେ ହତ୍ୟା କରିଥିବା ଅନୁମାନ କରାଯାଉଛି। ହତ୍ୟା କରିବା ପରେ ମୃତଦେହକୁ ମାଟିରେ ତରବରିଆ ଭାବେ ପୋତି ଦିଆଯାଇଛି। କଙ୍କାଳଟି ୨,୫୦୦ ବର୍ଷ ପୁରୁଣା ବୋଲି ପ୍ରତ୍ନତତ୍ତ୍ୱବିତ୍ ରାଚେଲ ଉଡ୍ କହିଛନ୍ତି। କଙ୍କାଳର ଖପୁରିରେ ଏକ ଗଭୀର କ୍ଷତ ଚିହ୍ନ ରହିଛି। ସମ୍ଭବତଃ କୌଣସି ଓଜନିଆ ପଦାର୍ଥରେ ମୁଣ୍ଡକୁ ପଛପଟୁ ଆଘାତ କରାଯାଇଥିବା ଜଣାପଡୁଛି। କଙ୍କାଳଟି ମୁହଁ ମାଡ଼ି ପଡ଼ିଥିବାବେଳେ ଏହାର ପଞ୍ଜରାରେ କୌଣସି କ୍ଷତ ଚିହ୍ନ ନାହିଁ। ତେଣୁ ସମ୍ପୃକ୍ତ ବ୍ୟକ୍ତିଙ୍କୁ ଧାରୁଆ ଅସ୍ତ୍ରରେ ପେଟକୁ ଅଘାତ କରାଯାଇ ନ ଥିବା ଉଡ୍ ଉଲ୍ଲେଖ କରିଛନ୍ତି।
