ଅନୁଗୋଳ ଅଫିସ, ୧୩ା୭: କରୋନା ସଂକ୍ରମିତଙ୍କ ପରିଚୟ ବାହାରେ ପ୍ରକାଶ ନ କରିବାକୁ ସରକାରଙ୍କ କଡ଼ା ନିର୍ଦ୍ଦେଶ ରହିଛି। କିନ୍ତୁ ଅନୁଗୋଳ ଜିଲାରେ ଠିକ୍ ଭାବେ ଏହା ପାଳନ କରାଯାଉ ନ ଥିବା ଦେଖାଯାଉଛି। ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ଜିଲା ପ୍ରଶାସନକୁ ଦିଆଯାଉଥିବା ସଂକ୍ରମିତଙ୍କ ତାଲିକା ଅନେକ ସମୟରେ ସୋସିଆଲ ମିଡିଆରେ ଭାଇରାଲ ହେଉଛି। କେବଳ ଏହି ତାଲିକା ନୁହେଁ ଜିଲାପାଳଙ୍କ ଅଫିସ କିମ୍ବା ଆବାସିକ କାର୍ଯ୍ୟାଳୟରୁ ବାହାରୁଥିବା ବିଭିନ୍ନ ଅର୍ଡର ଜିଲାର ଅନ୍ୟ ପ୍ରଶାସନିକ ଅଧିକାରୀମାନେ ଜାଣିବା ପୂର୍ବରୁ ସୋସିଆଲ ମିଡିଆକୁ ଚାଲିଯାଉଛି। କେଉଁ ଉଦ୍ଦେଶ୍ୟରେ ସରକାରୀ ନିର୍ଦ୍ଦେଶନାମାର ଏପରି ଉଲ୍ଲଂଘନ କରାଯାଉଛି ତାହା ଜଣାପଡ଼ୁ ନ ଥିବା ବେଳେ କାର୍ଯ୍ୟାଳୟର ଅଧିକାରୀମାନଙ୍କ ମଧ୍ୟରେ ଯେ ତାଳମେଳ ନାହିଁ ତାହା ଏଥିରୁ ସ୍ପଷ୍ଟ ହେଉଥିବା ଚର୍ଚ୍ଚା ହେଉଛି।
ଅନୁଗୋଳରୁ ପ୍ରଥମ କରି ବାହାରିଥିବା କରୋନା ସଂକ୍ରମିତଙ୍କ ତାଲିକା ସୋସିଆଲ ମିଡିଆରେ ଘୂରି ବୁଲିଲା। ଏ ନେଇ ପ୍ରଶାସନର ଦୃଷ୍ଟି ଆକର୍ଷଣ କରାଯିବା ପରେ ଥାନାରେ ଏତଲା ଦିଆଯାଇଥିଲା। କିନ୍ତୁ କିଏ ଭାଇରାଲ କଲା ତାହାର ପ୍ରମାଣ ନ ପାଇବାରୁ ପୋଲିସ ମାମଲାକୁ ବନ୍ଦ କରିଦେଲା। ଗତ ୫ ତାରିଖରେ ଜିଲାରେ ଥିବା ବିଭିନ୍ନ ଶିଳ୍ପସଂସ୍ଥା ଉଦ୍ଦେଶ୍ୟରେ ଜିଲାପାଳଙ୍କ ନିର୍ଦ୍ଦେଶନାମା ମଧ୍ୟ ସାମାଜିକ ଗଣମାଧ୍ୟମରେ ଦେଖାଯାଇଥିଲା। ଏକ ଶିଳ୍ପସଂସ୍ଥାରେ କାର୍ଯ୍ୟରତ କେତେଜଣ କର୍ମଚାରୀଙ୍କ ସ୍ବାବ୍ ରିପୋର୍ଟ ପଜିଟିଭ୍ ଆସିବା ପରେ ତାହାର ତାଲିକା ଗତ ୭ ତାରିଖରେ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏହା ପଛରେ କାହାର ହାତ ଅଛି ତାହା ଜଣାପଡ଼ୁ ନାହିଁ। ଜିଲାପାଳ ମନୋଜ କୁମାର ମହାନ୍ତି ଏ ନେଇ କାହିଁକି କଡ଼ା ପଦକ୍ଷେପ ଗ୍ରହଣ କରୁନାହାନ୍ତି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରୁଛି। ଜିଲାପାଳ କହିଛନ୍ତି, ଘଟଣା ନଜରକୁ ଆସିଛି। ସରକାରୀ ତଥ୍ୟ ଯେପରି ଭାଇରାଲ ନ ହେବ ସେଥିପାଇଁ ଗ୍ରୁପ୍ରେ ମେସେଜ ଦିଆଯାଉଛି। ଭବିଷ୍ୟତରେ ଏପରି କରି କେହି ଧରାପଡ଼ିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
