ଓ୍ବାଶିଂଟନ, ୮।୭: କୁହାଯାଏ ହସ ସମସ୍ତ ଶାରୀରିକ ରୋଗରୁ ମୁକ୍ତି ଦେଇଥାଏ। ତେଣୁ ପୃଥିବୀର ବିଭିନ୍ନ ସ୍ଥାନରେ ରହିଛି ଲାଫିଙ୍ଗ୍ କ୍ଲବ୍। ହସିବା ଯୋଗୁ ରୋଗପ୍ରତିରୋଧକ ଶକ୍ତି ବୃଦ୍ଧି ପାଇଥାଏ। ତେବେ ବିଶେଷଜ୍ଞଙ୍କ ଅନୁସାରେ ଅତ୍ୟଧିକ ହସିବା ସ୍ବାସ୍ଥ୍ୟ ପାଇଁ କ୍ଷତିକାରକ ସାବ୍ୟସ୍ତ ହୋଇପାରେ। ଏପରିକି ଜୋରରେ ହସିବା ଦ୍ୱାରା ପକ୍ଷାଘାତ ଭଳି ସମସ୍ୟା ସୃଷ୍ଟି ହେବାର ଆଶଙ୍କା ମଧ୍ୟ ରହିଥାଏ। ଏଭଳି ସମସ୍ୟାକୁ ଡାକ୍ତରୀ ଭାଷାରେ କାଟାପ୍ଲେକ୍ସ୍ କୁହାଯାଇଥାଏ। ଏହା ପ୍ରକୃତରେ ଏକ ପ୍ରକାର ମାନସିକ ଅସନ୍ତୁଳନ ଅବସ୍ଥା। ଏହାଦ୍ୱାରା ମସ୍ତିଷ୍କର କିଛି ଅଂଶରେ ସୁକ୍ଷ୍ମ ରକ୍ତବାହୀ ନଳୀରେ ରକ୍ତ ଜମାଟ ବାନ୍ଧି ଯାଇଥାଏ। ଫଳରେ ଏହି ଅଂଶ ସହିତ ଜଡ଼ିତ ଥିବା ଅଙ୍ଗର ସ୍ବାଭାବିକ କାର୍ଯ୍ୟରେ ବାଧା ସୃଷ୍ଟି ହୋଇଥାଏ। ଏହାକୁ ପକ୍ଷାଘାତ କୁହାଯାଇଥାଏ। ଏହାଦ୍ୱାରା କଥା କହିବାରେ ସମସ୍ୟା ଦେଖାଦିଏ। ପାଟି ଖନି ମାରିଯାଏ। ଏହି ରୋଗର ମଧ୍ୟ କୌଣସି ଚିକିତ୍ସା ନାହିଁ। ନିୟମିତ ଧ୍ୟାନ କରିବା ଦ୍ୱାରା ଶରୀର ଉପରେ ନିୟନ୍ତ୍ରଣ ଅଣାଯାଇପାରେ ବୋଲି ବିଶେଷଜ୍ଞ କହିଛନ୍ତି। ଏହା ନାକୋଲେପ୍ସି ରୋଗର ଅନ୍ତର୍ଗତ। ନାକୋଲେପ୍ସି ଦ୍ୱାରା ସମ୍ପୃକ୍ତ ବ୍ୟକ୍ତି ଯେ କୌଣସି ସ୍ଥାନରେ ନିଜ ଅଜାଣତରେ ଶୋଇପଡ଼େ। ଏହି ଦୁଇ ପ୍ରକାର ସମସ୍ୟା ଥିବା ଲୋକଙ୍କ ମସ୍ତିଷ୍କରେ ଆବଶ୍ୟକ ଅନୁସାରେ ହାଇପୋକ୍ରିଟିନ୍ ରାସାୟନିକ ପଦାର୍ଥ ନ ଥାଏ। ଏହି ରାସାୟନିକ ପଦାର୍ଥ ମସ୍ତିଷ୍କକୁ ସଚେତନ ଏବଂ ନିୟନ୍ତ୍ରିତ କରିଥାଏ। ହାଇପୋକ୍ରିଟିନ୍ ନିଦ ଆସିବା ସମୟକୁ ମଧ୍ୟ ନିୟନ୍ତ୍ରିତ କରିଥାଏ। ଔଷଧ ବନ୍ଦ ହେଲେ ଏହା ପୁଣି ଦେଖାଦେଇଥାଏ। ମସ୍ତିଷ୍କକୁ ଶକ୍ତିଶାଳୀ କରିବା ଦ୍ୱାରା ଏହାର ଦୂର ହୋଇପାରିବ। ତେଣୁ ଅଭିଜ୍ଞ ଯୋଗଗୁରୁଙ୍କ ସହାୟତାରେ ଧ୍ୟାନ ଏବଂ ଯୋଗ କରାଗଲେ ଏହି ସମସ୍ୟାରୁୁ ମୁକ୍ତି ମିଳିବାର ଆଶା ରହିଥାଏ ବୋଲି ବିଶେଷଜ୍ଞମାନେ ମତପୋଷଣ କରିଛନ୍ତି।
