ନୂଆଦିଲ୍ଲୀ,୧୯।୬: ଦେଶରେ ବେଳକୁ ବେଳ କରୋନା ପୀଡ଼ିତଙ୍କ ସଂଖ୍ୟା ବଢି ବଢି ଚାଲିଥିବା ବେଳେ ରାଜଧାନୀ ଦିଲ୍ଲୀର ସ୍ଥିତି ମଧ୍ୟ ଅସମ୍ଭାଳ ହୋଇ ପଡିଲାଣି। ଏହାକୁ ଦୃଷ୍ଟିରେ ରଖି କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ଏବେ ଦିଲ୍ଲୀ ସରକାରଙ୍କୁ ହୋମ ଆଇସୋଲେଶନ ବନ୍ଦ କରିବାକୁ କହିଛନ୍ତି। ଏବେ କରୋନା ସଂକ୍ରମିତ ଆଉ ହୋମ ଆଇସୋଲେଶନରେ ନ ରହି ବରଂ ଅତିକମ୍ରେ ୫ ଦିନ ପାଇଁ କ୍ୱାରାଣ୍ଟାଇନ ସେଣ୍ଟରରେ ରୁହନ୍ତୁ। ଦିଲ୍ଲୀ ସରକାରଙ୍କ ହୋମ ଆଇସୋଲେଶନ ନିୟମ ହେଉଛି ଯେଉଁ କରୋନା ରୋଗୀଙ୍କର କୌଣସି ଲକ୍ଷଣ ନାହିଁ ଅବା କମ୍ ଲକ୍ଷଣ ପ୍ରକାଶ ପାଉଛି ସେମାନେ ହସ୍ପିଟାଲ ନ ଯାଇ ଘରେ ରହି ଚିକିତ୍ସିତ ହୋଇପାରିବେ। ଦିଲ୍ଲୀରେ ଏମିତି ରୋଗୀଙ୍କ ସଂଖ୍ୟା ବହୁତ ଅଧିକ ରହିଥିବାରୁ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ହୋମ ଆଇସୋଲେଶନ ବନ୍ଦ କରିବାକୁ କହିଛନ୍ତି। ଏବେ ଆଲୋଚନା ହେଉଛି କି ଯଦି ଏଭଳି ରୋଗୀଙ୍କୁ କ୍ୱାରାଣ୍ଟାଇନ ସେଣ୍ଟର ପଠାଇ ଦିଆଯାଏ ତେବେ ସେମାନେ ମାନସିକ ସ୍ତରରେ ହୁଏତ ଭାଙ୍ଗି ଯାଇ ପାରନ୍ତି।
