ନୂଆଦିଲ୍ଲୀ, ୧୩ା୬: ମହାକାରୀ କରୋନା ସ୍ଥିତି ଅସମ୍ଭାଳ ଆଡ଼କୁ ଗତି କରୁଛି। ବିଶ୍ୱ ସହ ତାଳଦେଇ ଭାରତରେ ମଧ୍ୟ କରୋନା ରୋଗୀଙ୍କ ସଂଖ୍ୟା ହୁ ହୁ ହୋଇ ବଢ଼ିଚାଲିଛି। ଦେଶରେ ସଂକ୍ରମିତଙ୍କ ସଂଖ୍ୟା ବୃଦ୍ଧିପାଇ ୩,୦୧,୫୭୯ରେ ପହଞ୍ଚିଥିବା ବେଳେ ୮,୫୫୩ ଜଣ ପ୍ରାଣ ହରାଇଲେଣି। ଶୁକ୍ରବାର ଗୋଟିଏ ଦିନରେ ୧୦, ୯୫୬ ନୂଆ ମାମଲା ସାମ୍ନାକୁ ଆସିଥିଲା। ପ୍ରାୟ ୭ ରାଜ୍ୟରେ ଉଗ୍ର ସଂକ୍ରମଣ ସ୍ଥିତି ଏବେ ମୁଣ୍ଡବିନ୍ଧାର କାରଣ ପାଲଟିଛି। ମହାରାଷ୍ଟ୍ରରେ ସଂକ୍ରମିତଙ୍କ ସଂଖ୍ୟା ଲକ୍ଷେ ଟପିଥିବା ବେଳେ ରାଜଧାନୀ ଦିଲ୍ଲୀ, ତାମିଲନାଡ଼ୁ, ହରିୟାଣା, ପଶ୍ଚିମବଙ୍ଗ, ଜମ୍ମୁ-କଶ୍ମୀର ଓ ଉତ୍ତରପ୍ରଦେଶରେ ଉଗ୍ର ସଂକ୍ରମଣ ଦେଖିବାକୁ ମିଳିଛି। ଗତ ୧୦ ଦିନରେ ଏହି ରାଜ୍ୟଗୁଡ଼ିକରେ ସହସ୍ରାଧିକ ମାମଲା ସାମ୍ନାକୁ ଆସିଛି। ଦିଲ୍ଲୀରେ ପ୍ରତିଦିନ ୧୨ଶହରୁ ୧୪ଶହ ନୂଆ ମାମଲା ନଜର ଆସୁଛି। ତାମିଲନାଡ଼ୁରେ ମଧ୍ୟ ସମାନ ସ୍ଥିତି। ଗୁରୁବାର ଏଠାରେ ରେକର୍ଡ ୧,୯୨୭ ନୂଆ ମାମଲା ଦେଖିବାକୁ ମିଳିଥିଲା। ହରିୟାଣା ଓ ଜମ୍ମୁ-କଶ୍ମୀର ସ୍ଥିତି ଖରାପ ହେବାରେ ଲାଗିଛି। ଉତ୍ତରପ୍ରଦେଶ ତାଲିକାର ପଞ୍ଚମ ସ୍ଥାନକୁ ଉଠିଛି।
ଏହା ବ୍ୟତୀତ ମହାରାଷ୍ଟ୍ରରେ ସର୍ବାଧଇକ ୩,୭୧୭ ଜଣଙ୍କ ମୃତ୍ୟୁୁ ଘଟିଛି। ତାମିଲନାଡ଼ୁରେ ଭୂତାଣୁ ଆକ୍ରାନ୍ତଙ୍କ ସଂଖ୍ୟା ୪୦ ହଜାର ଟପିଥିବା ବେଳେ ମୃତ୍ୟୁସଂଖ୍ୟା ୩୬୭ରେ ପହଞ୍ଚିଛି। ଦିଲ୍ଲୀରେ ୩୪,୬୫୪, ଗୁଜରାଟରେ ୨୨, ୫୬୨, ଉତ୍ତରପ୍ରଦେଶରେ ୧୨, ୦୮୮, ରାଜସ୍ଥାନରେ ୧୧, ୯୩୦, ମଧ୍ୟପ୍ରଦେଶରେ ୧୦,୨୪୧ ଓ ପଶ୍ଚିମବଙ୍ଗରେ ୧୦,୨୪୪ ସଂକ୍ରମିତ ଥିବା ଜଣାପଡ଼ିଛି। କ୍ରମଶଃ ରୋଗୀ ସଂଖ୍ୟା ବଢ଼ୁଥଇବା ବେଳେ ଏହା ଚିନ୍ତାର କାରଣ ପାଲଟିଛି।
