ମାଛିଓ୍ବାଡା(ପଞ୍ଜାବ): ଲକ୍ଡାଉନ୍ କଟକଣା ମଧ୍ୟରେ ଅନେକ ଦୁଃଖଦ ଖବର ସାମ୍ନାକୁ ଆସିଛି। ଏ ସମୟରେ ଏପରି କିଛି ଘଟଣା ମଧ୍ୟ ଘଟିଛି, ଯାହା ଅନେକଙ୍କୁ ପ୍ରେରିତ କରିବା ସହ ସବୁଦିନ ପାଇଁ ସ୍ମୃତି ହୋଇ ରହିବ। ପଞ୍ଜାବର ଲୁଧିଆନାରେ ଦେଖିବାକୁ ମିଳିଛି ଏଭଳି ଏକ ଘଟଣା। ଲକ୍ଡାଉନ୍ ଯୋଗୁ ମା’ ବାପା ଗାଁରେ ଫସିଥିବା ବେଳେ ଏକ ମୁସଲମାନ ଦମ୍ପତି ଝିଅର ବିବାହ ସମ୍ପନ୍ନ କରିଛନ୍ତି। ଘଟଣା ହେଲା, ଲୁଧିଆନା ଜିଲା ଭାଟିୟାନ ଅଞ୍ଚଳର ଭରିନ୍ଦର କୁମାର ଲକ୍ଡାଉନ୍ ପୂର୍ବରୁ ସ୍ତ୍ରୀ, ପୁଅ ଏବଂ ୩ ଝିଅଙ୍କୁ ନେଇ ନିଜ ଗାଁ ଉତ୍ତରପ୍ରଦେଶର ମୋରାଦାବାଦ ଯାଇଥିଲେ। ହେଲେ ଆଉ ଜଣେ ଝିଅ(ପୂଜା) ଭାଟିୟାନରେ ଥିଲେ। ପୂଜାଙ୍କ ବିବାହ ପଞ୍ଜାବର ସହେନଓ୍ବାଲ ଅଞ୍ଚଳର ସୁଦେଶ କୁମାରଙ୍କ ସହ ଲକ୍ଡାଉନ୍ ପୂର୍ବରୁ ସ୍ଥିର ହୋଇଥିଲା। ଏହା ମଧ୍ୟରେ ବରଘର ଲୋକେ ବିବାହ କରିବା ପାଇଁ ଚାହିଁଥିଲେ। ତେବେ ଲକ୍ଡାଉନ୍ ଯୋଗୁ ପୂଜାଙ୍କ ମା’ ବାପା ଗାଁରୁ ଫେରିବା ସମ୍ଭବ ହୋଇ ନ ଥିଲା। ତେବେ ଭାଟିୟାନରେ ରହୁଥିବା ମୁସଲମାନ ଦମ୍ପତି ଅବ୍ଦୁଲ ସାଜିଦ୍ ଏବଂ ତାଙ୍କ ସ୍ତ୍ରୀ ସୋନିଙ୍କ ଭରିନ୍ଦରଙ୍କ ପାରିବାରିକ ସମ୍ପର୍କ ଖୁବ୍ ଭଲ। ପୂଜା ଦୁହିଁଙ୍କୁ ମାମୁ ଓ ମାଈଁ ବୋଲି ଡାକନ୍ତି। ତେଣୁ ବିବାହ ନ ଅଟକାଇ ନିଜ ଝିଅ ଭଳି ବିବାହ କାର୍ଯ୍ୟ କରିବାକୁ ସେମାନଙ୍କୁ ଅନୁମତି ଦେଇଥିଲେ। ଏହାପରେ ମୁସଲମାନ ଦମ୍ପତି ପୂଜାଙ୍କ ବିବାହ ଆୟୋଜନ କରିଥିଲେ। ମାଛିଓ୍ବାଡାରୁ ପୁରୋହିତଙ୍କୁ ଡକାଇ ସମ୍ପୂର୍ଣ୍ଣ ହିନ୍ଦୁ ରୀତିନୀତି ଅନୁଯାୟୀ ବିବାହ କରାଇଥିଲେ। ପୂଜାଙ୍କୁ ଝିଅ ରୂପେ ଗ୍ରହଣକରି କନ୍ୟାଦାନ କରିଥିଲେ। ତେବେ କୌଣସି ଜିନିଷପତ୍ର ପାଇଁ ବରଘର ପରିବାର ମନା କରିଥିଲେ ମଧ୍ୟ ପରମ୍ପରା ଅନୁଯାୟୀ ଦମ୍ପତି ଜରୁରୀ ଆସବାବପତ୍ର ଉପହାର ଦେଇ ଝିଅକୁ ବିଦାକରିଥିଲେ। ତେବେ ବିବାହ ପାଇଁ ପୂଜାଙ୍କ ମା’ ବାପା ମଧ୍ୟ ଟଙ୍କା ପଠାଇଥିବା ଦମ୍ପତି କୁହନ୍ତି। ହେଲେ କରୋନା କଟକଣା ଯୋଗୁ ନିରାଡ଼ମ୍ବର ବିବାହ ଅନୁଷ୍ଠିତ ହୋଇଥିଲା। ଏଥିରେ କନ୍ୟା-ବର, ବିବାହ କରାଉଥିବା ଦମ୍ପତିଙ୍କ ବ୍ୟତୀତ ବରଙ୍କ ଦୁଇ ଭଉଣୀ, ଭିଣୋଇ ଏବଂ ୩ ଛୁଆଙ୍କୁ ନେଇ ବିବାହ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଭଳି ଏକ ସୁଯୋଗ ମିଳିଥିବାରୁ ମୁସଲମାନ ଦମ୍ପତି ଖୁସିବ୍ୟକ୍ତ କରିଥିଲେ। ସେହିପରି ଏକ ମୁସଲମାନ ଦମ୍ପତି ହିନ୍ଦୁ ବିବାହ କରାଇବା ଏବଂ କନ୍ୟାଦାନ କରିବା ବିଷୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
