ପାଟନା,୨।୬: କରୋନା ଭାଇରସ ସଂକ୍ରମଣ ଯୋଗୁ ବାହାର ରାଜ୍ୟରେ ରହିଥିବା ପ୍ରବାସୀ ଶ୍ରମିକମାନେ ଏବେ ନିଜ ନିଜ ରାଜ୍ୟକୁ ଫେରିଛନ୍ତି। ଏହି କ୍ରମରେ ବିହାରକୁ ପ୍ରାୟ ୨୯ ଲକ୍ଷ ପ୍ରବାସୀ ଶ୍ରମିକ ଫେରିଥିବା କୁହାଯାଉଛି। ଏମାନଙ୍କ ମଧ୍ୟରେ ଗର୍ଭଧାରଣକୁ ନେଇ ସ୍ବାସ୍ଥ୍ୟ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ବିହାର ସ୍ବାସ୍ଥ୍ୟ ବିଭାଗ ପକ୍ଷରୁ ପ୍ରବାସୀ ଶ୍ରମିକଙ୍କୁ ଗର୍ଭ ନିରୋଧକ ବଣ୍ଟନ କରାଯାଉଛି। ବିଶେଷ କରି ଯେଉଁମାନେ କ୍ୱାରାଣ୍ଟାଇନ ସେଣ୍ଟରରେ ୧୪ ଦିନର ଅବଧି ସାରି ଘରକୁ ଫେରୁଛନ୍ତି ସେମାନଙ୍କୁ ଏହା ପ୍ରଦାନ କରାଯାଉଛି। ଜଣେ ବରିଷ୍ଠ ସ୍ବାସ୍ଥ୍ୟ ଅଧିକାରୀଙ୍କ ସୁଚନା ଅନୁଯାୟୀ, ଏବେ ପ୍ରାୟ ୮.୭୭ ଲକ୍ଷ ପ୍ରବାସୀ ଶ୍ରମିକ ସେମାନଙ୍କ ୧୪ ଦିନିଆ କ୍ୱାରାଣ୍ଟାଇନ ଅବଧି ସାରି ଘରକୁ ଫେରିଲେଣି। ଏମାନଙ୍କ ମଧ୍ୟରେ ଏବେ ଅବାଂଚ୍ଛିତ ଗର୍ଭଧାରଣର ସମ୍ଭାବନା ଥିବାରୁ ଏମାନଙ୍କୁ ଏ ସମ୍ପର୍କରେ ସଚେତନ କରାଇବା ସହ ଗର୍ଭ ନିରୋଧକ ପ୍ରଦାନ କରାଯାଉଛି ବୋଲି ଜଣେ ସ୍ବାସ୍ଥ୍ୟ ଅଧିକାରୀ କହିଛନ୍ତି। ପରିବାର ନିୟୋଜନ କାର୍ଯ୍ୟ ଯେଉଁ ଅଧିକାରୀଙ୍କୁ ଦିଆଯାଇଛି ସେମାନେ ଏହି ପ୍ରବାସୀଙ୍କୁ ଗର୍ଭ ନିରୋଧକ ବାଣ୍ଟୁଥିବା ଜଣାପଡିଛି। କ୍ୱାରାଣ୍ଟାଇନ ସେଣ୍ଟର ବନ୍ଦ ହେବା ପର୍ଯ୍ୟନ୍ତ ଏପରି କରାଯିବ ବୋଲି ସେ କହିଛନ୍ତି। ତେବେ ବିଶେଷ ସୂତ୍ରରୁ ମିଳିଥିବା ସୂଚନାରୁ ଜଣାପଡିଛି କି ଜୁନ୍ ୧୫ ସୁଦ୍ଧା ରାଜ୍ୟର ସମସ୍ତ କ୍ୱାରାଣ୍ଟାଇନ ସେଣ୍ଟରକୁ ବନ୍ଦ କରି ଦିଆଯିବ।
