ନୂଆଦିଲ୍ଲୀ,୧୭।୫: ଭାରତୀୟ ପୂର୍ବତନ କ୍ରିକେଟର ତଥା ଭାଜପା ଏମ୍ପି ଗୌତମ ଗମ୍ଭୀର ପାକିସ୍ତାନ ପୂର୍ବତନ ଅଲରାଉଣ୍ଡର ଶାହିଦ ଆଫ୍ରିଦିଙ୍କୁ କଡ଼ା ଜବାବ ଦେଇଛନ୍ତି। କେବଳ ସେତିକି ନୁହେଁ ସେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ, ସେନାମୁଖ୍ୟ ଜେନେରାଲ କମର ବାଜଓ୍ବାଙ୍କ ସମେତ ଆଫ୍ରିଦିଙ୍କୁ ଜୋକର ବୋଲି କହିଛନ୍ତି।
ଆଫ୍ରିଦିଙ୍କ ଏକ ଭିଡିଓ ଭାଇରଲ ହୋଇଥିଲା। ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭିରୁ ବୋଲି ଏହି ଭିଡିଓରେ କହୁଥିବାର ଲକ୍ଷ୍ୟ କରାଯାଇଥିଲା। ଏହାକୁ ମଧ୍ୟ ବହୁ ଲୋକ ସେୟାର କରିଥିଲେ। ଏବେ ଗମ୍ଭୀର ଟୁଇଟ୍ କରି ନିଜ ଶୈଳୀରେ ଏହାର ଜବାବ ରଖିଛନ୍ତି। ‘ପାକିସ୍ତାନ ପାଖରେ ୭ ଲକ୍ଷ ସୈନ୍ୟ ରହିଛନ୍ତି ଓ ତାଙ୍କ ପଛରେ ୨୦ କୋଟି ଲୋକ ରହିଛନ୍ତି ବୋଲି ୧୬ ବର୍ଷୀୟ ଆଫ୍ରିଦି କହିଛନ୍ତି। ତଥାପି ଏମାନେ ୭୦ ବର୍ଷ ହେବ କାଶ୍ମୀର ପାଇଁ ଭିକ୍ଷା ମାଗୁଛନ୍ତି। ଆଫ୍ରିଦି, ଇମ୍ରାନ, ବାଜଓ୍ବାଙ୍କ ଭଳି ଜୋକର ମୋଦିଙ୍କୁ ଗାଳି ଦେଇ ପାକିସ୍ତାନ ଲୋକଙ୍କୁ ବୋକା ବନାଉଛନ୍ତି। କିନ୍ତୁ କାଶ୍ମୀର ମିଳିବା ବହୁ ଦୂରର କଥା। ବାଂଲାଦେଶ କଥା ମନେ ଅଛିତ?’ ବୋଲି ଗମ୍ଭୀର ଟୁଇଟ୍ କରିଛନ୍ତି।
ପୂର୍ବରୁ ଆଫ୍ରିଦି ତାଙ୍କ ଭିଡିଓରେ ମୋଦୀଙ୍କୁ ସାହସୀ ହେବା ପାଇଁ ପ୍ରୟସା କରୁଛନ୍ତି ବୋଲି କହିଥିଲେ। କିନ୍ତୁ ସେ ଜଣେ ଭିରୁ ବ୍ୟକ୍ତି। ଛୋଟିଆ କଶ୍ମୀର ପାଇଁ ସେ ୭ ଲକ୍ଷ ସୈନ୍ୟ ମୃତୟନ କରିଛନ୍ତି। ଯେତେବେଳେ କି ପାକିସ୍ତାନର ସୈନ୍ୟ ସଂଖ୍ୟ ୭ ଲକ୍ଷ। କିନ୍ତୁ ଏମାନଙ୍କ ପଛରେ ୨୨-୨୩ କୋଟି ସୈନ୍ୟ ଅର୍ଥାତ ପାକିସ୍ତାନ ଜନସଂଖ୍ୟା ଛିଡା ହୋଇଛନ୍ତି ମୋଦି ଜାଣିନାହାନ୍ତି ବୋଲି ଆଫ୍ରିଦି କହିଥିଲେ। ପୂର୍ବରୁ ମଧ୍ୟ ଆଫ୍ରିଦି ଏଭଳି କଡ଼ା କଥା କହିବାର ବହୁବାର ଦେଖାଯାଇଛି। ପୂର୍ବତନ କ୍ରିକେଟର ଜାଭେଦ ମିଅଁାଦାଦ ମଧ୍ୟ ଏଭଳି ବିବାଦୀୟ ମନ୍ତବ୍ୟ ଦେଇଛନ୍ତି। ପୂର୍ବରୁ ମଧ୍ୟ ଆଫ୍ରିଦି ଓ ଗମ୍ଭୀର ଏକାଧିକବାର ପରସ୍ପର ବିରୋଧରେ ମନ୍ତବ୍ୟ ଦେଇ ଚର୍ଚ୍ଚା ସୃଷ୍ଟି କରିଛନ୍ତି।
