ବନ୍ତ,୫।୫(ଡି.ଏନ୍.ଏ.): କରୋନା(କୋଭିଡ-୧୯) ସଂକ୍ରମଣ ଆଶଙ୍କା କରି କେନ୍ଦ୍ର ସରକାର ସମଗ୍ର ଦେଶକୁ ତୃତୀୟ ପର୍ଯ୍ୟାୟରେ ମେ ୭ ତାରିଖ ଯାଏ ଲକ୍ଡାଉନ୍ ରହିବାକୁ ଘୋଷଣା କରିଛନ୍ତି। ଏହି ସମୟରେ ବିଭିନ୍ନ ରାଜ୍ୟରେ ଫସି ରହିଥିବା ପ୍ରବାସୀ ଓଡ଼ିଆମାନେ ରାଜ୍ୟକୁ ଫେରୁଛନ୍ତି। ଏହି କ୍ରମରେ ଭଦ୍ରକ ଜିଲା ଭଣ୍ଡାରିପୋଖରୀରୁ ପ୍ରାୟ ୪୦ ଶ୍ରମିକ ଚାଲି ଚାଲି ଝାଡ଼ଖଣ୍ଡ ଯାଉଥିବା ଦେଖିବାକୁ ମିଳିଛି। ଏହି ସମସ୍ତ ଶ୍ରମିକ ୧୬ ନଂ.ଜାତୀୟ ରାଜପଥ ନିର୍ମାଣ କାର୍ଯ୍ୟରେ ନିୟୋଜିତ ଥିଲେ। ତେବେ ଲକ୍ଡାଉନ ପାଇଁ କାମଧନ୍ଦା ବନ୍ଦ ହୋଇଯିବାରୁ ସେମାନେ ଖାଇବାକୁ ନ ପାଇ ଭୋକ ଉପାସରେ ଦିନ କାଟୁଥିଲେ। ସୋମବାର ରାତିରେ ସେମାନେ ଭଣ୍ଡାରିପୋଖରୀରୁ ବାହାରି ଭଦ୍ରକରେ ପହଞ୍ଚତ୍ଥିଲେ। ସେଠାରୁ ଭଦ୍ରକ-ଆନନ୍ଦପୁର ରାଜ୍ୟ ରାଜପଥରେ ଚାଲି ଚାଲି ଯାଉଥିବା ବେଳେ ଓରାଳି ଛକଠାରେ ବିଶ୍ରାମ ନେଇଥିଲେ। ସହାୟତା ପାଇଁ ଜିଲା ପ୍ରଶାସନକୁ ଅବଗତ କରିଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବା ସେମାନେ କହିଛନ୍ତି। ତେବେ ସେମାନେ ଆନନ୍ଦପୁରଠାରୁ ଠାକୁରମୁଣ୍ଡା ରାସ୍ତାଦେଇ ଝାଡଖଣ୍ଡ ଯିବେ ବୋଲି ଜଣାପଡ଼ିଛି।
