ନୂଆଦିଲ୍ଲୀ,୧।୫: ଭାରତରେ କରୋନା ସଂକ୍ରମିତଙ୍କ ସଂଖ୍ୟା ୩୩ ହଜାର ଅତିକ୍ରମ କରିଥିବାବେଳେ ଆରୋଗ୍ୟ ହାରରେ ଉଲ୍ଲେଖନୀୟ ବୃଦ୍ଧି ଘଟିଛି। ୧୪ ଦିନ ତଳେ ଆରୋଗ୍ୟ ହାର ୧୩ ପ୍ରତିଶତ ରହିଥିବାବେଳେ ଏବେ ତାହା ୨୫.୧୯ ପ୍ରତିଶତକୁ ବୃଦ୍ଧି ପାଇଥିବା ଗୁରୁବାର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ସେହିପରି ଲକ୍ଡାଉନ ପୂର୍ବରୁ କୋଭିଡ୍-୧୯ ମାମଲା ଦ୍ୱିଗୁଣିତ ହେବା ପାଇଁ ୩.୪ ଦିନ ଲାଗୁଥିବାବେଳେ ଏବେ ତାହା ୧୧ ଦିନକୁ ବୃଦ୍ଧି ପାଇଛି। କରୋନା ସଂକ୍ରମିତଙ୍କ ମଧ୍ୟରେ ମୃତ୍ୟୁହାର ୩.୨ ପ୍ରତିଶତ ରହିଛି, ଯାହା କି ଅନ୍ୟ ରାଷ୍ଟ୍ର ତୁଳନାରେ ବହୁତ କମ୍। ମୃତକଙ୍କ ମଧ୍ୟରେ ୬୫ ପ୍ରତିଶତ ପୁରୁଷ ହୋଇଥିବାବେଳେ ୩୫ ପ୍ରତିଶତ ମହିଳା। ମାର୍ଚ୍ଚ ୨୫ରୁ ଦେଶବ୍ୟାପୀ ଲକ୍ଡାଉନ ରହିବା ଫଳରେ କରୋନା ସଂକ୍ରମଣ ରୋକିବା ଦିଗରେ ଏହା ବେଶ୍ ସଫଳ ହୋଇପାରିଛି। ସଂକ୍ରମଣ ଓ ମୃତ୍ୟୁ ହାର କ୍ରମାଗତ ଭାବେ ହ୍ରାସ ପାଇଚାଲିଥିବା ନୀତି ଆୟୋଗର ମୁଖ୍ୟ କାର୍ଯ୍ୟନିର୍ବାହୀ ଅମିତାଭ କାନ୍ତ କହିଛନ୍ତି।
