ତାଳଚେର,୧୯ା୪(ନି.ପ୍ର.): କରୋନା ମୁକାବିଲା ପାଇଁ ସାରା ଦେଶ ଆଜି ଏକାଠି ହୋଇଛି । କରୋନା ଯୁଦ୍ଧରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ସହଯୋଗ କରିବା ଲାଗି ପିଏମ୍ କେୟାର୍ସ ଫଣ୍ଡ ଏବଂ ମୁଖ୍ୟମନ୍ତ୍ରୀ ରିଲିଫ୍ ପାଣ୍ଠିକୁ ଅନେକ ବଦାନ୍ୟ ବ୍ୟକ୍ତି ଦାନ କରିବାକୁ ଆଗେଇ ଆସିଛନ୍ତି। ଠିକ୍ ସେହିପରି ତାଳଚେର ଭଉଣୀ-ଭାଇ କୁମ୍ପି ଭାଙ୍ଗି ଟଙ୍କା ଦାନ କରିଛନ୍ତି। ଜଗନ୍ନାଥପୁର ଗାଁର ପ୍ରଦ୍ୟୁମ୍ନ କୁମାର ମିଶ୍ରଙ୍କ ପ୍ରଥମ ଶ୍ରେଣୀରେ ପଢୁଥିବା ପୁଅ ଶୁଭମ ଓ ପଞ୍ଚମ ଶ୍ରେଣୀରେ ପଢୁଥିବା ଝିଅ ଉଲ୍ଲପୀ ସବୁଦିନ ବାପା-ମା’ଙ୍କ ପାଖରୁ ଖୁଚୁରା ଟଙ୍କା ନେଇ କୁମ୍ପିରେ ରଖିଥାନ୍ତି। ତେବେ ବର୍ତ୍ତମାନ ପରିସ୍ଥିତି ଦେଖି ଉଭୟ ଭଉଣୀ ଭାଇ ମୁଖ୍ୟମନ୍ତ୍ରୀ ରିଲିଫ୍ ପାଣ୍ଠିକୁ ତାଙ୍କ ସଞ୍ଚିତ ଅର୍ଥ ଦେବା ପାଇଁ ମନସ୍ଥ କରିଥିଲେ। ଏଥିରେ ତାଙ୍କ ବାପା ତାଙ୍କୁ ସହଯୋଗ କରିଥିଲେ। କୁମ୍ପି ଭାଙ୍ଗି ବ୍ୟାଙ୍କରେ ଡିମାଣ୍ଡ ଡ୍ରାଫ୍ଟ ତିଆରି କରି ସମୁଦାୟ ୧୦ ହଜାର ଟଙ୍କା ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ରବିବାର ତାଳଚେର ଉପ-ଜିଲାପାଳଙ୍କ ଜରିଆରେ ଦାନ କରିଛନ୍ତି । ଦେଶର ଏଭଳି ସଙ୍କଟ ସମୟରେ ସରକାରଙ୍କୁ ସହାୟତା କରିବା ଅତ୍ୟନ୍ତ ଜରୁରୀ ଭାବି ସେମାନେ ଏହି ଟଙ୍କା ଦେଇଥିବା କହିଛନ୍ତି । ଏହା ସହ କରୋନା ଯୁଦ୍ଧରେ ସାମିଲ ହୋଇ ନିଜ ସାମର୍ଥ୍ୟ ଅନୁଯାୟୀ ରାଜ୍ୟ ସରକାରଙ୍କୁ ସହଯୋଗ କରିବା ପାଇଁ ରାଜ୍ୟବାସୀଙ୍କୁ ସେ ନିବେଦନ କରିଛନ୍ତି। ଏଭଳି ମହତ କାର୍ଯ୍ୟ ପାଇଁ ସ୍ଥାନୀୟ ଅଞ୍ଚଳ ବାସିନ୍ଦା ସେମାନଙ୍କୁ ଅନେକ ପ୍ରଶଂସା କରିଛନ୍ତି। କେବଳ ଯେ ଟଙ୍କା ଦାନ କରିଛନ୍ତି ତାହା ନୁହେଁ, ହାତ ଧୋଇବା, ମାସ୍କ ବାନ୍ଧିବା ଏବଂ ଜରୁରୀ କାମ ନ ଥିଲେ ବାହାରକୁ ନ ବାହାରିବା ପାଇଁ ଲୋକଙ୍କୁ ଉଭୟ ସଚେତନ ମଧ୍ୟ କରୁଛନ୍ତି।
