ଅକଲାଣ୍ଡ, ୩।୪(ପି.ଟି.)- କୋଭିଡ୍-୧୯ ସାରା ବିଶ୍ୱରେ ଆତଙ୍କ ଖେଳିଥିବା ବେଳେ ନ୍ୟୁଜିଲାଣ୍ଡ କ୍ରିକେଟ (ଏନ୍ଜେଡସି) ଏ’ ଦଳର ଭାରତ ଗସ୍ତ ନେଇ ବେଶ୍ ଆଶାବାଦୀ ଥିବା କହିଛି। ଅଗଷ୍ଟରେ ନ୍ୟୁଜିଲାଣ୍ଡ ଏ’ ଦଳ ଭାରତ ଗସ୍ତରେ ଆସିବ। ଏହି ଗସ୍ତ ନେଇ ଏବେଠାରୁ କିଛି କହିବା ଶୀଘ୍ର ହେବ ନ୍ୟୁଜିଲାଣ୍ଡ କ୍ରିକେଟ ତରଫରୁ କୁହାଯାଇଛି। ଶୀତକାଳୀନ ଗସ୍ତରେ ନ୍ୟୁଜିଲାଣ୍ଡ ସିନିୟର ଦଳ ଆଗାମୀ ଜୁନ୍ ଓ ଜୁଲାଇରେ ନେଦରଲାଣ୍ଡ୍ସ, ସ୍କଟଲାଣ୍ଡ, ଆୟର୍ଲାଣ୍ଡ ଓ ଓ୍ବେଷ୍ଟଇଣ୍ଡିଜ ଯିବାର କାର୍ଯ୍ୟକ୍ରମ ରହିଛି। ତେବେ ଏହି ଗସ୍ତ ନେଇ ଜବରଦସ୍ତ ଆଶଙ୍କା ପ୍ରକାଶ ପାଇଛି ବୋଲି ନ୍ୟୁଜିଲାଣ୍ଡ କ୍ରିକେଟ ସ୍ବୀକାର କରିଛି। ଏହି ଗସ୍ତ ବାତିଲ ହେବ ବୋଲି କହିବା ଏବେ ଠିକ୍ ନୁହଁ ବୋଲି କୁହାଯାଇଛି।
ଚଳିତମାସରେ ନ୍ୟୁଜିଲାଣ୍ଡ ମହିଳା ଦଳ ଶ୍ରୀଲଙ୍କା ଗସ୍ତ କରିବାର କାର୍ଯ୍ୟକ୍ରମ ଥିଲା। ତେବେ ଏହାକୁ ବାତିଲ କରାଯାଇଛି ବୋଲି ଏଜେଡ୍ସି ମୁଖ୍ୟ କାର୍ଯ୍ୟନିର୍ବାହୀ ଡେଭିଡ ହ୍ବାଇଟ୍ କହିଛନ୍ତି। କୋଭିଡ୍-୧୯ ଏବେ କ୍ରୀଡ଼ା ପାଇଁ ନୈରାଶ୍ୟଜନକ ପରିସ୍ଥିତି ସୃଷ୍ଟି କରିଛି। ଆମେ ଦେଶ ଓ ସାରା ବିଶ୍ୱର ଲୋକଙ୍କ ମଙ୍ଗଳ ପାଇଁ ଆମକୁ କାର୍ଯ୍ୟ କରିବାକୁ ହେବ ବୋଲି ସେ କହିଛନ୍ତି। ଅଗଷ୍ଟରେ ନ୍ୟୁଜିଲାଣ୍ଡ ବାଂଲାଦେଶ ଗସ୍ତ କରିବାର କାର୍ଯ୍ୟକ୍ରମ ରହିଛି। ଏବେ ଏହି ଗସ୍ତ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ବୋଲି ହ୍ବାଇଟ୍ କହିଛନ୍ତି। କ୍ରିକେଟର ଭବିଷ୍ୟତ ଉପରେ ନ୍ୟୁଜିଲାଣ୍ଡ ଫୋକସ କରୁଛି। ଭବିଷ୍ୟତ ଅନିଶ୍ଚିତତା ଭିତରେ ରହିଥିଲେ ମଧ୍ୟ ଆମକୁ ସବୁ ପ୍ରକାର ପରିସ୍ଥିତି ପାଇଁ ପ୍ରସ୍ତୁତ ରହିବାକୁ ପଡିବ। କ୍ରିକେଟର ବୃହତ୍ତର ସ୍ବାର୍ଥ ପାଇଁ ଆମକୁ ଯାହା ଆବଶ୍ୟକ ତାହା କରିବାକୁ ପଡିବ ବୋଲି ହ୍ବାଇଟ୍ ସ୍ପଷ୍ଟ କରିଛନ୍ତି। ସାରା ବିଶ୍ୱରେ କରୋନା ଭାଇରସ୍ ଦ୍ୱାରା ୫୦,୦୦୦ ଲୋକ ମୃତ୍ୟୁବରଣ କରିଛନ୍ତି ଓ ୧୦,୦୦,୦୦୦ ଲୋକ ପ୍ରାଣ ହରାଇଛନ୍ତି।
