ଯାଜପୁର ରୋଡ,୧୫।୩(ଡି.ଏନ.ଏ.): ବ୍ୟାସନଗର ସ୍ବୟଂଶାସିତ କଲେଜ ଅଧ୍ୟକ୍ଷ ପଦବୀକୁ ନେଇ ବଦଳି ରାଜନୀତି ଆରମ୍ଭ ହୋଇଛି। ଯୋଗ୍ୟ ପ୍ରାଧ୍ୟାପକଙ୍କୁ ଏଠାରୁ ରାତିଅଧିଆ ବଦଳି କରାଯାଇ ବର୍ଷକ ତଳେ ବଦଳି କରାଯାଇଥିବା ଅନ୍ୟଜଣେ ପ୍ରାଧ୍ୟାପିକାଙ୍କୁ ପୁଣି ଏଠାକୁ ବଦଳି କରାଯାଇ ଅଣାଯାଇଛି। ଯାହାକୁ ନେଇ ଚର୍ଚ୍ଚା ଜୋର ଧରିଛି।
ଆସନ୍ତା ମାର୍ଚ୍ଚ ୩୧ରେ ବ୍ୟାସନଗର ମହାବିଦ୍ୟାଳୟର ଭାରପ୍ରାପ୍ତ ଅଧ୍ୟକ୍ଷ ଏସ.କେ. ଆବୁ ତାହିର ଦାୟିତ୍ୱରୁ ଅବସର ନେଉଛନ୍ତି। ଏପ୍ରିଲ ପହିଲାରୁ ଏହି ଅଧ୍ୟକ୍ଷ ପଦ ଖାଲି ପଡ଼ିବ। ଓଡ଼ିଶା ସରକାରଙ୍କ ଉଚ୍ଚଶିକ୍ଷା ବିଭାଗର ନିର୍ଦ୍ଦେଶକଙ୍କ ପତ୍ରସଂଖ୍ୟା ୩୧୧୭୫/୨୭ା୯ା୨୦୧୮ ଅନୁଯାୟୀ ଅବସର ନେବାର ମାତ୍ର ମାସକ ପୂର୍ବରୁ ବରିଷ୍ଠତା ଏବଂ ଯୋଗ୍ୟତା ଆଧାରରେ ୪ଜଣ ଅଧ୍ୟାପକଙ୍କ ନାମ ତାଲିକା ଦେବାକୁ ବିଜ୍ଞପ୍ତି ପ୍ରକାଶ ପାଇଥିଲା। କିନ୍ତୁ ଏଯାଏ ଅଧ୍ୟକ୍ଷଙ୍କ ଦ୍ୱାରା ସେଭଳି କୌଣସି ପଦକ୍ଷେପ ନିଆଯାଇ ନାହିଁ। ମାତ୍ର ବର୍ଷକ ତଳେ ଓଡ଼ିଆ ବିଭାଗର ପ୍ରାଧ୍ୟାପକ ଶିବଚରଣ ମାଝୀଙ୍କୁ ପ୍ରଶାସନିକ ହସ୍ତକ୍ଷେପ କ୍ରମେ ମୁଗପାଳ ଉପେନ୍ଦ୍ରନାଥ ସାରଦା ମହାବିଦ୍ୟାଳୟକୁ ବଦଳି କରାଯାଇଥିଲା। ପ୍ରାଧ୍ୟାପକ ମାଝୀଙ୍କୁ ଏବେ ପୁନଶ୍ଚ ରାତିଅଧିଆଭାବେ ସେଠାରୁ ପୁଣି ଏହି ମହାବିଦ୍ୟାଳୟକୁ ବଦଳି କରି ଅଣାଯିବା ଘଟଣା ସାଧାରଣରେ ଚର୍ଚ୍ଚାର ବିଷୟ ପାଲଟିଛି। ଅନ୍ୟପକ୍ଷେ ୟୁଜିସି ଅନୁମୋଦନପ୍ରାପ୍ତ ତଥା ଓଡ଼ିଆ ବିଭାଗର ମୁଖ୍ୟ ପ୍ରାଧ୍ୟାପକ ଗୋପାଳଚରଣ ନନ୍ଦଙ୍କୁ ମୁଗପାଳ ମହାବିଦ୍ୟାଳୟକୁ ତରବରିଆଭାବେ ଏଠାରୁ ସ୍ଥାନାନ୍ତର କରାଯାଇଛି। ପ୍ରକାଶ ଥାଉକି, ପ୍ରାଧ୍ୟାପକ ନନ୍ଦ ଏକମାତ୍ର ୟୁଜିସି ଅନୁମୋଦନପ୍ରାପ୍ତ ବରିଷ୍ଠ ପ୍ରାଧ୍ୟାପକ ହୋଇଥିବା ବେଳେ ଅଧ୍ୟକ୍ଷ ପଦ ପାଇଁ ସେ ହିଁ ପ୍ରକୃତ ପକ୍ଷେ ଦାବିଦାର ବୋଲି ସ୍ପଷ୍ଟ ବାରି ହେଉଥିଲା। ମାତ୍ର ନନ୍ଦଙ୍କୁ ଅଧ୍ୟକ୍ଷ ପଦରୁ ହଟାଇବା ପାଇଁ ଚଞ୍ଚକତା ପୂର୍ବକ ଏଭଳି ରାତିଅଧିଆ ବଦଳି ନିଷ୍ପତ୍ତି ନିଆଯାଇଥିବା ଚର୍ଚ୍ଚା ହେଉଛି। ଏହି କଲେଜରେ ଓଡ଼ିଆ ବିଭାଗରେ ଏକ ଅଧ୍ୟାପକ ପଦବୀ ଖାଲିଥିବାବେଳେ ଓଡ଼ିଆ ବିଭାଗର ମୁଖ୍ୟ ନନ୍ଦଙ୍କୁ ଅନ୍ୟତ୍ର ବଦଳି କରାଯିବା ଘଟଣା ଅପ୍ରାସଙ୍ଗିକ ବୋଲି ମଧ୍ୟ କୁହାଯାଉଛି। ଏ ସଂକ୍ରାନ୍ତରେ ଭାରପ୍ରାପ୍ତ ଅଧ୍ୟକ୍ଷ ତାହିରଙ୍କୁ ପଚାରିବାରୁ, ୪ଜଣଙ୍କ ନାମ ଉଚ୍ଚଶିକ୍ଷା ବିଭାଗକୁ ପଠାଯିବ। ଏହାପରେ ବିଭାଗୀୟ ନିଷ୍ପତ୍ତି ଅନୁସାରେ ଅଧ୍ୟକ୍ଷ ପଦବୀ ଦିଆଯିବ। ଯେଉଁସବୁ ଅଦଳବଦଳ ହୋଇଛି ତାହା ତାଙ୍କ ନିଷ୍ପତ୍ତି ନୁହେଁ, ଉଚ୍ଚଶିକ୍ଷା ବିଭାଗର ନିର୍ଦ୍ଦେଶ ଅନୁସାରେ କାର୍ଯ୍ୟକାରୀ କରାଯାଇଛି ବୋଲି ସେ କହିଛନ୍ତି।
