ଭୁବନେଶ୍ୱର,୬।୩(ବ୍ୟୁରୋ): ସି.ଭି. ରମଣ ଗ୍ଲୋବାଲ ୟୁନିଭର୍ସିଟି ଓ ଫ୍ରୋନିଅସ୍ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ର ମିଳିତ ଆନୁକୂଲ୍ୟରେ ‘ନ୍ୟାଶନାଲ ଓ୍ବେଲ୍ଡିଂ ଲିଗ୍ ଅଫ୍ ଓ୍ବିମେନ୍ ଷ୍ଟୁଡେଣ୍ଟସ’ ବା ଜାତୀୟ ମହିଳା ଓ୍ବେଲ୍ଡିଂ ଲିଗ୍ର ଦ୍ୱିତୀୟ ସଂସ୍କରଣ ଭୁବନେଶ୍ୱରରେ ଅନୁଷ୍ଠିତ ହେବ। ଏହି ୩ଦିନିଆ ମେଗା ଇଭେଣ୍ଟ ୟୁନିଭର୍ସିଟିର ଆଡ୍ଭାନ୍ସ ଓ୍ବେଲ୍ଡିଂ ସେଣ୍ଟର୍ ଅପ୍ ଏକ୍ସଲେନ୍ସ ପରିସରରେ ୬ ତାରିଖରୁ ଆରମ୍ଭ ହେବ। ଓ୍ବେଲ୍ଡିଂ ଭଳି ଏକ ପୁରୁଷ ପ୍ରାଧାନ୍ୟ କ୍ଷେତ୍ର ପ୍ରତି ମହିଳାଙ୍କୁ ଆକର୍ଷିତ କରିବାକୁ ଅନ୍ତର୍ଜାତୀୟ ମହିଳା ଦିବସ ଅବସରରେ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ଓ୍ବେଲ୍ଡିଂ ସହଯୋଗରେ ଏହାକୁ ଓ୍ବାର୍ଲଡ ସ୍କିଲ୍ ଫର୍ମାଟରେ ଆୟୋଜନ କରାଯିବ। ଶିକ୍ଷାନୁଷ୍ଠାନ, ପ୍ରଶିକ୍ଷଣ ପ୍ରତିଷ୍ଠାନ ଏବଂ ଶିଳ୍ପାନୁଷ୍ଠାନ ଆଦି କ୍ଷେତ୍ରରୁ ମହିଳାମାନେ ଗୋଟିଏ ଛାତତଳେ ଏକାଠି ହେବେ। ଦେଶର ୪୦ ଅଗ୍ରଣୀ ଶିକ୍ଷାନୁଷ୍ଠାନରୁ ୨୦୦ରୁ ଊର୍ଦ୍ଧ୍ୱ ମହିଳା ପ୍ରତିଯୋଗୀ ଏଥିରେ ଅଂଶଗ୍ରହଣ କରିବେ। ମହିଳା ଓ୍ବେଲ୍ଡରଙ୍କ ପ୍ରାକ୍ଟିକାଲ ଦକ୍ଷତାର ପରୀକ୍ଷା କରାଯିବ। ଏହାସହ ଅତ୍ୟାଧୁନିକ ଓ୍ବେଲ୍ଡିଂ ଟେକ୍ନୋଲୋଜି ଏବଂ ଆଡ୍ଭାନ୍ସ ଉପକରଣର ବ୍ୟବହାର ପ୍ରମୁଖ ଆକର୍ଷଣ ରହିବ। ବିଶ୍ୱ ସ୍ତରର ଓ୍ବେଲ୍ଡିଂ ବିଶେଷଜ୍ଞମାନେ ପ୍ରତିଯୋଗୀଙ୍କୁ ପ୍ରଶିକ୍ଷଣ ଦେବେ। ଶେଷ ଦିବସରେ ଶ୍ରେଷ୍ଠ ବିବେଚିତ ପ୍ରତିଯୋଗୀଙ୍କୁ ପୁରସ୍କାର ରାଶି ସହ ସ୍ବର୍ଣ୍ଣ, ରୌପ୍ୟ ଏବଂ ବ୍ରୋଞ୍ଜ ମେଡାଲ ପ୍ରଦାନ କରାଯିବ। ଏହାସହ ୫ ମେଡାଲିଅନ୍ ଅଫ୍ ଏକ୍ସଲେନ୍ସ ପ୍ରଦାନ କରାଯିବ। ସେହିଭଳି ଶ୍ରେଷ୍ଠ ବିବେଚିତ ଶିକ୍ଷାନୁଷ୍ଠାନକୁ ଚଳିତବର୍ଷ ଲାଗି ଚାମ୍ପିୟନ ଟ୍ରଫି ପ୍ରଦାନ କରାଯିବ।
ଗୁରୁବାର ସ୍ଥାନୀୟ ହୋଟେଲରେ ଆୟୋଜିତ ଖବରଦାତା ସମ୍ମିଳନୀରେ ଏନେଇ ସି.ଭି. ରମଣ ଗ୍ଲୋବାଲ ୟୁନିଭର୍ସିଟି ସଭାପତି ସଞ୍ଜୀବ କୁମାର ରାଉତ ସୂଚନା ଦେଇଛନ୍ତି। ସେ କହିଛନ୍ତି, ଭାରତର ମ୍ୟାନୁଫ୍ୟାକ୍ଚରିଂ ସେକ୍ଟରରେ ମହିଳାଙ୍କ ଉପସ୍ଥିତି କମ୍ ଥିବାବେଳେ ଆମେ ଏଥିପ୍ରତି ଅଧିକରୁ ଅଧିକ ମହିଳା ତଥା ଛାତ୍ରୀଙ୍କୁ ଆକୃଷ୍ଟ କରିବାର ପ୍ରୟାସ କରୁଛୁ। ଲଗାତାର ଦ୍ୱିତୀୟ ବର୍ଷ ପାଇଁ ଆୟୋଜିତ ହେଉଥିବା ଏହି ଓ୍ବେଲ୍ଡିଂ ଲିଗ୍ରେ ଓଡ଼ିଶାରୁ ସର୍ବାଧିକ ୭୦ଜଣ ଛାତ୍ରୀ ଅଂଶଗ୍ରହଣ କରିବେ ବୋଲି ସେ କହିଛନ୍ତି। ଫ୍ରୋନିଅସ୍ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ର ଏମ୍ଡି ବିଶ୍ୱନାଥ କାମତ୍ କହିଛନ୍ତି, ଭାରତରେ ଏବେ ପ୍ରତିବର୍ଷ ୨୦ ହଜାର ଓ୍ବେଲ୍ଡରଙ୍କ ଅଭାବ ପରିଲକ୍ଷିତ ହେଉଛି। ମହିଳାଙ୍କ ଯୋଗଦାନ ଦ୍ୱାରା ଏହି ଅଭାବ ପୂରଣ ହେବ। ପ୍ରତି କ୍ଷେତ୍ରରେ ଓ୍ବେଲ୍ଡିଂର ଗୁରୁତ୍ୱପୂର୍ଣ୍ଣ ଅବଦାନ ରହୁଥିବା ବେଳେ କେନ୍ଦ୍ର ସରକାରଙ୍କ ମେକ୍ ଇନ୍ ଇଣ୍ଡିଆରେ ଓ୍ବେଲ୍ଡିଂ ଏକ ପ୍ରମୁଖ ଅଂଶ। ତେଣୁ ରାଜ୍ୟର ଅଧିକରୁ ଅଧିକ ମହିଳା ଏଥିରେ ନିଜ ଭବିଷ୍ୟତ ଗଢିବା ଆବଶ୍ୟକ ବୋଲି ସେ କହିଥିଲେ। ଖବରଦାତା ସମ୍ମିଳନୀରେ ୟୁନିଭର୍ସିଟି କୁଳପତି ପ୍ରଫେସର ଭବେଶ ଭଟ୍ଟାଚାର୍ଯ୍ୟ ଉପସ୍ଥିତ ଥିଲେ।
