ଡିସେମ୍ବର ୨୫କୁ ପ୍ରଭୁ ଯିଶୁଙ୍କ ଜନ୍ମଦିବସ ବା କ୍ରିସ୍ମାସ ଭାବେ ପାଳନ କରାଯାଇଥାଏ। ଇସାଇ ଧର୍ମାବଲମ୍ବୀମାନେ ବେଶ୍ ଉତ୍ସାହର ସହ ଏହିଦିନକୁ ପାଳନ କରିଥାଆନ୍ତି। ରଙ୍ଗ ବେରଙ୍ଗର ଆଲୋକରେ ଘର ସଜାଇବାଠାରୁ ଆରମ୍ଭ କରି ଉପହାର ଦେବାର ପ୍ରଥା ମଧ୍ୟ ରହିଛି। ଏହି ସମୟରେ ଖ୍ରୀଷ୍ଟିଆନ୍ ଧର୍ମାବଲମ୍ବୀ ଲୋକେ ଅଧିକ ପରିମାଣରେ ଲାଲ, ସବୁଜ ଓ ଗୋଲଡେନ୍ ବା ସୁନାରଙ୍ଗକୁ ବ୍ୟବହାର କରିଥାଆନ୍ତି। ସାନ୍ତା କ୍ଲଜ ବି କେବଳ ଲାଲ ରଙ୍ଗର ହୋଇଥିବା ସମସ୍ତେ ଦେଖିଥିବେ। ହେଲେ ଏହା ପଛରେ ମଧ୍ୟ କିଛି କାରଣ ରହିଛି।
ଲାଲ ରଙ୍ଗ: କ୍ରିସ୍ମାସରେ ଲାଲ ରଙ୍ଗକୁ ଅଧିକ ମହତ୍ୱ ଦିଆଯାଏ। ଶାନ୍ତା ଲାଲ ରଙ୍ଗର ପୋଷାକ ପିନ୍ଧି ଶାନ୍ତି ବାଣ୍ଟିଥାଏ ବୋଲି କୁହାଯାଏ। ଆହୁରି ମଧ୍ୟ ଲାଲକୁ ପ୍ରଭୁ ଯିଶୁଙ୍କ ରକ୍ତର ପ୍ରତୀକ ବୋଲି କୁହାଯାଏ। ଏହାଦ୍ୱାରା ଯିଶୁଙ୍କ ଉଦ୍ଦେଶ୍ୟରେ ପ୍ରେମ ଭାବ ଜାଗ୍ରତ ହୋଇଥାଏ ବୋଲି ଅନେକେ ମତ ଦିଅନ୍ତି।
ସବୁଜ ରଙ୍ଗ: ଇସାଇ ଧର୍ମରେ ସବୁଜ ରଙ୍ଗକୁ ପ୍ରଭୁ ଯିଶୁଙ୍କ ଶାଶ୍ୱତ ଜୀବନର ପ୍ରତୀକ ବୋଲି ଧରାଯାଏ। ଏହା ପ୍ରକୃତି ସହ ମଧ୍ୟ ଜଡିତ। ସେଥିପାଇଁ କ୍ରିସ୍ମାସ ଅବସରରେ ଏହି ରଙ୍ଗକୁ ବେଶି ମହତ୍ୱ ଦିଆଯାଇଥାଏ।
ଗୋଲଡେନ୍ କଲର ବା ସୁନା ରଙ୍ଗ: ଏହାକୁ ଉପହାରର ପ୍ରତୀକ ବୋଲି କୁହାଯାଏ। ଏହାକୁ କ୍ରିସ୍ମାସରେ ବ୍ୟବହାର କରିବାର ଅର୍ଥ ହେଉଛି ଖୁସି ବାଣ୍ଟିବା। ସେଥିପାଇଁ କ୍ରିସ୍ମାସ ଅବସରରେ ଏହି ରଙ୍ଗ ବ୍ୟବହାର କରି ଖୁସି ବଣ୍ଟାଯାଇଥାଏ ବୋଲି କୁହାଯାଏ।
ଶାନ୍ତା କ୍ଲଜ କୁହନ୍ତୁ ଅବା କ୍ରିସ୍ମାସ ଟ୍ରି। ଏହା ଖ୍ରୀଷ୍ଟଧର୍ମର ପରମ୍ପରା ଅନୁଯାୟୀ ପ୍ରସ୍ତୁତ କରାଯାଇଥାଏ। ତା’ସହ ସମସ୍ତଙ୍କୁ ମିଠା ଓ ଉପହାର ମଧ୍ୟ ଦିଆଯାଏ ଏହି କ୍ରିସ୍ମାସରେ।
