ବମ୍ବେ: ରାଣାଘାଟ ଷ୍ଟେଶନରେ ଗୀତ ଗାଉଥିବା ଜଣେ ସାଧାରଣ ମହିଳାରୁ ଇଣ୍ଟରନେଟ୍ ସେନ୍ଶେସନ୍ ପାଲଟଥିବା ରାନୁ ମଣ୍ଡଳ ବିଭିନ୍ନ କାରଣକୁ ନେଇ ଚର୍ଚ୍ଚାରେ। ପ୍ରଥମେ ସଙ୍ଗୀତ ଆଉ ଏବେ ମେକ୍ଓଭରକୁ ନେଇ ରାନୁଙ୍କୁ ଟ୍ରୋଲ କରାଯାଉଛି। ହେଲେ କିଛି ପ୍ରଶଂସକ ଏହାକୁ ସମାଲୋଚନା କରୁଥିବା ଲୋକଙ୍କୁ କଟାକ୍ଷ କରୁଥିବା ଦେଖାଯାଇଛି।
ନିକଟରେ ଏକ କାର୍ଯ୍ୟକ୍ରମରେ ରାନୁ ଲେହେଙ୍ଗା ସହ ହେଭି ମେକ୍ଅପ୍ ନେଇ ର଼୍ୟାମ୍ପ ଓ୍ବାକ୍ କରିଥିଲେ। ଏହାର କିଛି ଫଟୋ ଓ ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହୋଇଥିଲା। କେହି କେହି ତାଙ୍କ ମେକ୍ଅପ୍କୁ ନେଇ ମେମ୍ସ ମଧ୍ୟ କରିଥିଲେ। ହେଲେ ଏସବୁକୁ ପସନ୍ଦ କରୁନାହାନ୍ତି ରାନୁଙ୍କ କିଛି ପ୍ରଶଂସକ।
ରାନୁ ଅତ୍ୟନ୍ତ ଗରୀବ ଘରୁ ଆସିଛନ୍ତି। ସେ ସଂଘର୍ଷ କରି ନିଜର ପେଟ ପୋଷୁଥିଲେ। ହେଲେ ଏବେ ସେ ହଠାତ୍ ସେଲିବ୍ରିଟି ପାଲଟିଯାଇଛନ୍ତି। ସେ ଏହାକୁ କିଭଳି ଭାବେ ଗ୍ରହଣ କରିବେ ଜାଣିପାରୁନାହାନ୍ତି। ତାଙ୍କୁ ଯାହା କୁହାଯାଉଛି, ସେ ସେଭଳି କରୁଛନ୍ତି। ସେ ଶିକ୍ଷିତ ନୁହନ୍ତି। ଏଣୁ ତାଙ୍କୁ କଟାକ୍ଷ କରାଯିବା ଅନୁଚିତ ବୋଲି ଜଣେ ପ୍ରଶଂସକ ଲେଖିଛନ୍ତି। ସେହିଭଳି ଯେଉଁମାନେ ତାଙ୍କୁ ସମାଲୋଚନା କରି ବ୍ୟଙ୍ଗ କରୁଛନ୍ତି, ସେମାନଙ୍କ ପାଖରେ ବାସ୍ତବରେ କିଛି କାମ ନ ଥିବା ଅନ୍ୟଜଣେ ଟୁଇଟରରେ ପ୍ରତିକ୍ରିୟା ଦେଇ ଲେଖିଛନ୍ତି।
