ଭୁବନେଶ୍ୱର,୧୮ା୧୧(ବ୍ୟୁରୋ): କ୍ୟାପିଟାଲ ଥାନା ପୋଲିସ ଅଭିଯୁକ୍ତଙ୍କୁ ଗିରଫ ନ କରିବାରୁ ୪ଜଣିଆ ଗ୍ୟାଙ୍ଗ୍ ପୁଣି ଶନିବାର ରାତିରେ ରାଜମହଲ ନିକଟ ଫାଳିକିଆବସ୍ତିରେ ଆତଙ୍କ ଖେଳାଇଛନ୍ତି। ବସ୍ତିରେ ଚୋରା ମଦ ବେପାରକୁ ବିରୋଧ କରୁଥିବା ସୀମା ସେଠୀ ନାମକ ଜଣେ ବ୍ୟକ୍ତିଙ୍କ ଘରେ ପଶି ବନ୍ଧୁକ ଓ ଖଣ୍ଡା ଦେଖାଇ ଜୀବନରୁ ମାରିଦେବାକୁ ଧମକ ଦେଇଛନ୍ତି। ଏଥିସହ ଘର ଆଗରେ ପାର୍କିଂ ହୋଇଥିବା ଏକ ଅଟୋକୁ ମଧ୍ୟ ପୋଡ଼ି ଦେଇଛନ୍ତି। ସୀମାଙ୍କ ଅଭିଯୋଗକ୍ରମେ ପୋଲିସ ଆଇପିସି ଦଫା ୪୩୬, ୨୯୪, ୩୨୩ ଓ ୫୦୬ରେ ଏକ ମାମଲା (ନଂ. ୪୨୩/୧୯) ରୁଜୁ କରି ବିଭିନ୍ନ ସ୍ଥାନରେ ଚଢାଉ ଆରମ୍ଭ କରିଛି। ଅନ୍ୟପକ୍ଷରେ ଏହି ଗ୍ୟାଙ୍ଗ୍ ଉତ୍ପାତରେ ବସ୍ତିବାସିନ୍ଦା ନିଜକୁ ଅସୁରକ୍ଷିତ ମଣୁଛନ୍ତି। ପୋଲିସ ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି।
ଅଭିଯୋଗ ଅନୁଯାୟୀ, ସୀମା ଉକ୍ତ ବସ୍ତିରେ ପରିବାର ସହ ରହୁଛନ୍ତି। ଏକ ସଙ୍ଗଠନର ସହଯୋଗରେ ସେ ତାଙ୍କ ବସ୍ତିରେ ଚୋରା ମଦ ବେପାର ବନ୍ଦ କରିବା ପାଇଁ ଅଣ୍ଟା ଭିଡ଼ିଛନ୍ତି। ଗତବର୍ଷ ମଦ ବ୍ୟବସାୟୀ ତାଙ୍କ ଘରେ ପଶି ଭଙ୍ଗାରୁଜା କରିବା ସହ ପରିବାର ଲୋକଙ୍କୁ ଆକ୍ରମଣ କରିଥିଲେ। ଏନେଇ ଥାନାରେ ସୀମା ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରି ବସିପଡିଥିଲା। ଅଭିଯୁକ୍ତମାନେ କିଛିଦିନ ଫେରାର ହେବା ପରେ ପୁଣି ବସ୍ତିକୁ ଆସି ବ୍ୟବସାୟ କରିବା ସହ ବସ୍ତି ଲୋକଙ୍କୁ ଡରାଇ ରଖିଛନ୍ତି। ସେମାନେ ପୂର୍ବରାଗ ରଖି ଗତ ୧୫ ତାରିଖ ରାତିରେ ସୀମାଙ୍କ ଘର ଆଗରେ ଥିବା ଏକ ଅଟୋର କାଚ ଭାଙ୍ଗି ଦେଇଥିଲେ। ସିସିଟିଭି ଯାଞ୍ଚ କରି ସୀମା ଅଭିଯୁକ୍ତଙ୍କ ସମ୍ପର୍କରେ ଜାଣିବା ପରେ ଥାନାକୁ ଅଭିଯୋଗ କରିବାକୁ ବାହାରୁଥିଲେ। ଏହି ସମୟରେ ଅଭିଯୁକ୍ତ କ୍ରିଷ୍ଣା, ସନିଆ କୁଞ୍ଜ, ଡି.ସୀମାଞ୍ଚଳ ଓ ଅଭିମାନ ପ୍ରଧାନ ତାଙ୍କ ଘର ଭିତରକୁ ଖଣ୍ଡା ଓ ବନ୍ଧୁକ ଧରି ନିଶାଗ୍ରସ୍ତ ଅବସ୍ଥାରେ ପଶିଥିଲେ। ସୀମାଙ୍କ ମୁଣ୍ଡରେ ବନ୍ଧୁ ଲଗାଇ ହତ୍ୟା ଧମକ ଦେଇଥିଲେ। ଥାନାକୁ ଗଲେ ଜୀବନରୁ ମାରି ଦେବେ ବୋଲି କହିବା ସହ ତାଙ୍କ ସ୍ତ୍ରୀ ଓ ଝିଅଙ୍କୁ ଅଶ୍ଳୀଳ ଭାଷାରେ ଗାଳି ଗୁଲଜ କରିଥିଲେ। ପୁଣି ଶନିବାର ରାତି ପ୍ରାୟ ୧୨ଟାରେ ପରିବାର ଲୋକେ ଶୋଇଥିବାବେଳେ ୪ଜଣ ଅଭିଯୁକ୍ତ ତାଙ୍କ ଘର ଆଗରେ ଥିବା ଅଟୋରେ ପେଟ୍ରୋଲ ପକାଇ ନିଅଁା ଲଗାଇ ଦେଇଥିଲେ। ଅଟୋ ଜଳୁଥିବା ଦେଖି ସ୍ଥାନୀୟ ଲୋକେ ଲିଭାଇବାକୁ କଚେଷ୍ଟା କରି ବିଫଳ ହୋଇଥିଲେ। ଗରିବ ଶ୍ରେଣୀର ସୀମା ଅଟୋ ଚଳାଇ ପରିବାର ପ୍ରତିପୋଷଣ କରନ୍ତି। ଏବେ ଅଟୋ ପୋଡ଼ି ଯାଇଥିବାରୁ ଚିନ୍ତାରେ ରହିଛନ୍ତି। ଏନେଇ ତଦନ୍ତ ଅଧିକାରୀ ଅରୁଣ କୁମାର ଖିଲାର କହିଛନ୍ତି, ଅଭିଯୋଗ ଆଧାରରେ ଏକ ମାମଲା ରୁଜୁ କରାଯାଇ ତଦନ୍ତ କରାଯାଉଛି। ଅଭିଯୁକ୍ତଙ୍କୁ ଗିରଫ ପାଇଁ ଚଢାଉ ଜାରି ରହିଛି।
