ପ୍ୟାରିସ, ୨୩।୯(ପି.ଟି.)- ରୁଷୀୟ ଆଥଲେଟଙ୍କଠାରୁ ସଂଗ୍ରହ କରାଯାଇଥିବା ନମୁନା ଟ୍ୟାମ୍ପରିଂ ବା ହେରଫେର ହେବା ନେଇ ବିଶ୍ୱ ନିବାରଣ ସଂସ୍ଥା (ନାଡ଼ା) ସନ୍ଦେହ ପ୍ରକଟ କରିଛି। ରୁଷୀୟ ରାଜଧାନୀ ମସ୍କୋରେ ଥିବା ଲାବୋରେଟୋରିରେ ସଂଗୃହୀତ ହୋଇଥିବା ନମୁନାଗୁଡିକ ହେରଫେର ହୋଇଛି ଓ ରୁଷିଆ ଦ୍ୱାର ଏହା କରାଯାଇଛି ବୋଲି ବିଶ୍ୱସ୍ତସୂତ୍ରରୁ ଓ୍ବାଡ଼ା ଜାଣିବାକୁ ପାଇଛି। ସୋମବାର ଟୋକିଓରେ ଆୟୋଜନ ହେବାକୁ ଥିବା ବୈଠକରେ କମ୍ପ୍ଲିଆନ୍ସ ରିଭ୍ୟୁ କମିଟି (ସିଆରସି) ବାସନ୍ଦ କରିବାକୁ ପ୍ରାସ୍ତାବ ଦେବା ସହ ଏ ନେଇ ଓ୍ବାଡ଼ାକୁ ଏକ ରିପୋର୍ଟ ଦେବାକୁ ପ୍ରସ୍ତୁତି ଚଳାଇଛି। ଏହି ବୈଠକ ପରେ ସିଆରସି ରିପୋର୍ଟକୁ ସାର୍ବଜନୀନ କରାଯିବ ବୋଳି ଓ୍ବାଡ଼ାର ଜଣେ ମୁଖପାତ୍ର କହିଛନ୍ତି। ତେବେ ଏବେ ସବୁ କିଛି କହିବା ଠିକ୍ ହେବ ନାହିଁ ବୋଲି ସେ ସ୍ପଷ୍ଟ କରିଛନ୍ତି। ରୁଷିଆ ପ୍ରାୟୋଜିତ ଏକ ବଡ଼ ଡୋପିଂ ସ୍କାଣ୍ଡାଲ ପରେ ମସ୍କୋ ଲାବୋରେଟୋରିରେ ନମୁନା ତଥା ଫାଇଲଗୁଡିକୁ ପୁନଃ ଅବସ୍ଥାପିତ କରାଯାଇଥିଲା। ଏବେ ଯାଞ୍ଚ୍ କରିବା ପାଇଁ ଓ୍ବାଡ଼ା ଅନୁମତି ପାଇବା ପରେ ଏଭଳି ଆଶଙ୍କା ପ୍ରକାଶ ପାଇଛି।
ଯଦି ଏହି ସମ୍ପୂର୍ଣ୍ଣ ପ୍ରକରଣରେ କୌଣସି ଠକାମି ହୋଇଥିବାର ପ୍ରମାଣ ମିଳେ ତାହେଲେ ରୁଷିଆକୁ ଅଲିମ୍ପିକ୍ସ ସମେତ ଆଗକୁ ଆୟୋଜନ ହେବାକୁଥିବା ବଡ଼ ବଡ଼ ଇଭେଣ୍ଟରୁ ବାସନ୍ଦ କରାଯିବ। ଉଲ୍ଲେଖଥାଉ କି, ୨୦୧୫ ପରଠାରୁ ରୁଷିଆକୁ ସବୁ ପ୍ରକାର ଅନ୍ତର୍ଜାତୀୟ ଆଥଲେଟିକ ଇଭେଣ୍ଟରୁ ବାସନ୍ଦ କରାଯାଇଛି। ଯଦିଓ କେତେକ ଆଥଲେଟଙ୍କୁ ନିରପେକ୍ଷ ପତାକା ତଳେ ବିଭିନ୍ନ ଅନ୍ତର୍ଜାତୀୟ ଇଭେଣ୍ଟରେ ଅଂଶଗ୍ରହଣ କରିବାକୁ ସୁଯୋଗ ଦିଆଯାଇଛି। ସେପ୍ଟେମ୍ବର ୨୭ରେ ଆରମ୍ଭ ହେବାକୁ ଯାଉଥିବା ବିଶ୍ୱ ଆଥଲେଟିକ ଚାମ୍ପିୟନଶିପ୍ରେ ରୁଷୀୟ ଖେଳାଳିଙ୍କୁ ପୁଣି ସାମିଲ କରିବା ନେଇ ଇଣ୍ଟରନ୍ୟାଶନାଲ ଆସୋସିଏଶନ ଅଫ୍ ଆଥଲେଟିକ୍ସ ଫେଡେରେଶନ (ଆଇଏଏଏଫ) ପୁଣି ଥରେ ଗୁରୁତର ସହ ଚିନ୍ତା କରୁଛି। ଚଳିତ ବର୍ଷ ଶେଷ ଆଡକୁ ଓ୍ବାଡ଼ା ସବୁ ଦୃଷ୍ଟିକୋଣରୁ ବିଚାର କରି ସବୁ ଡୋପିଂ ମାମଲାଗୁଡିକର ବିଶ୍ଳେଷଣ କରିବ। ମସ୍କୋରେ ଥିବା ଡ୍ରଗ୍ ଟେଷ୍ଟିଂ ଲାବୋରେଟୋରିରେ ୨୯୮ଜଣଙ୍କ ନମୁନାରେ ହେରଫେର ହୋଇଥିବା ପ୍ରମାଣ ମିଳିଥିବା କଥା କୁହାଯାଇଛି।
