ଲୋଇସିଂହା,୫ା୧(ସୁଶାନ୍ତ ବାରିକ):ପୌଷ ପୂର୍ଣ୍ଣିମା ଅବସରରେ ବଲାଙ୍ଗୀର ଜିଲା ଲୋଇସିଂହା ଦୁର୍ଗାମଣ୍ଡପରେ ୨ଦିନ ଧରି ଚାଲିଥିବା ୧୬ତମ ଲୋଇସିଂହା ମହୋତ୍ସବ ଶନିବାର ଉଦ୍ଯାପିତ ହୋଇଯାଇଛି। ଏହି ଅବସରରେ ୧୫ ବର୍ଷରୁ ଊର୍ଦ୍ଧ୍ୱ ପିଲାଙ୍କୁ ନେଇ ପ୍ରଥମଥର ର଼୍ୟାମ୍ପ ଶୋ’ ତଥା ଲୋଇସିଂହା ସୁନ୍ଦରୀ ପ୍ରତିଯୋଗିତା ହୋଇଥିଲା। ଏଥିରେ ଲୋଇସିଂହା ସମେତ ବିଭିନ୍ନ ଅଞ୍ଚଳରୁ ୧୬ ଜଣ ପ୍ରତିଯୋଗୀ ଭାଗନେଇଥିଲେ। ଲୋଇସିଂହା ଢୋଲମହୁଲର ଖ୍ରୀଷ୍ଟିୟାନା ନାଗ ପ୍ରଥମ ଲୋଇସିଂହା ସୁନ୍ଦରୀ ମୁକୁଟ ହାସଲ କରିଥିଲେ। ସେହିପରି ବାଳକ ବର୍ଗରେ ଅନୁଷ୍ଠିତ କବାଡ଼ି ପ୍ରତିଯୋଗିତାର ଫାଇନାଲରେ ସମ୍ବଲପୁରକୁ ହରାଇ ଛଡିଶଗଡ଼ ମହାସମୁନ୍ଦ ଦଳ ଚାମ୍ପିୟନ ହୋଇ ଟ୍ରଫି ସହିତ ୧୫ ହଜାର ଟଙ୍କା ପୁରସ୍କାର ଗ୍ରହଣ କରିଥିଲେ। ବାଳିକା ବର୍ଗରେ ଅନୁଷ୍ଠିତ କବାଡ଼ି ପ୍ରତିଯୋଗିତାରେ ବଲାଙ୍ଗୀରକୁ ହରାଇ ସମ୍ବଲପୁର ଟିମ୍ ଚାମ୍ପିୟନ ହୋଇ ଟ୍ରଫି ସହ ୧୦ ହଜାର ଟଙ୍କା ପୁରସ୍କାର ଗ୍ରହଣ କରିଛି। ସେହିପରି ଉତ୍ସବରେ ଅନୁଷ୍ଠିତ ୧୬ଟି ପ୍ରତିଗୋଗିତାର କୃତୀ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଛି। ଏଥିସହ ଅବସରପ୍ରାପ୍ତ ବନ ଅଧିକାରୀ ରାଜକିଶୋର ନାଏକ, ନନ୍ଦକିଶୋର ନାଏକ, ଯୁବ ପ୍ରଶାସକ ଅମିତ ମେହେର, ବିଶିଷ୍ଟ କଳାକାର ଶଙ୍କର ବେହେରା, ମହେନ୍ଦ୍ର ସାହୁ, ପ୍ରଭାକର ସାହୁ ଓ ସାରଙ୍ଗ ଭୋଇଙ୍କୁ ସମ୍ମାନିତ କରାଯାଇଥିଲା। ଉତ୍ସବ ଅବସରରେ ୨ ଦିନ ଧରି ସନ୍ଧ୍ୟା ସମୟରେ ସାଂସ୍କୃତିକ ସଭା ଓ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ସାଂସ୍କୃତିକ ସଭାରେ ଅଞ୍ଚଳର ପ୍ରତିଷ୍ଠିତ ରାଜନେତା ଓ ବ୍ୟକ୍ତିବିଶେଷ ଯୋଗଦେଇ ମହୋତ୍ସବ ସମ୍ପର୍କରେ ଆଲୋକପାତ କରିଥିଲେ। ଆୟୋଜକ କମିଟି ସଭାପତି ପ୍ରଣବ କିଶୋର ସିଂ ରାଏ, କାର୍ଯ୍ୟକାରୀ ସଭାପତି ଭୂତନାଥ ନାଏକ, ସମ୍ପାଦକ ରବୀନ୍ଦ୍ର ପୁଟେଲ, ଆନନ୍ଦ ପୁଟେଲ, ପ୍ରଶାନ୍ତ ସାହୁ, ଭୂଳାନାଥ ସାହୁ, ସୁଶୀଲ ବିଶ୍ୱାଳ, ପ୍ରକାଶ ମହାରଣା ପ୍ରମୁଖ ମହୋତ୍ସବର ପୁରୋଧା ଥିଲେ। ଉଦ୍ଯାପନୀ ସନ୍ଧ୍ୟାରେ ମହିଳାଙ୍କ କୀର୍ତ୍ତନ, ହାସ୍ୟ ଅଭିନେତା ହରିଭାଇଙ୍କ କମେଡିର ଭରପୂର ମଜା ନେଇଥିଲେ ଦର୍ଶକ।
Dharitri – Odisha’s No.1 Odia Daily
