ଭଦ୍ରକ,୪ା୧୨: ଭଦ୍ରକ ଜିଲା ଭଣ୍ଡାରିପୋଖରୀ ନିକଟରେ ଗୁରୁବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଜଣେ କଲେଜ ଛାତ୍ରୀଙ୍କ ମୃତ୍ୟୁ ଘଟିଛି। ଏହାକୁ ନେଇ ଜାତୀୟ ରାଜପଥ-୧୬ ରେ ଉତ୍ତେଜନା ସୃଷ୍ଟି ହେବା ସହ ଲୋକେ ରାସ୍ତା ଅବରୋଧ କରିଛନ୍ତି।
ମୃତ ଛାତ୍ରୀ ହେଉଛନ୍ତି ଭଣ୍ଡାରିପୋଖରୀ କଲେଜର +୨ ଛାତ୍ରୀ ଶ୍ରଦ୍ଧାଞ୍ଜଳି ପଣ୍ଡା। ଶ୍ରଦ୍ଧାଞ୍ଜଳି ସାଇକେଲରେ କଲେଜ୍ ଯାଉଥିବା ବେଳେ ବାଲି ବୋଝେଇ ଟ୍ରାକ୍ଟର ତାଙ୍କୁ ପଛପଟୁ ଧକ୍କା ଦେଇଥିଲା। ଧକ୍କା ପରେ ଟ୍ରାକ୍ଟର ଚକା ତଳେ ଶ୍ରଦ୍ଧାଞ୍ଜଳି କିଛି ଦୂର ଯାଏଁ ଘୋଷାଡ଼ି ହୋଇ ଯାଇଥିଲେ। ସ୍ଥାନୀୟ ଲୋକେ ତାଙ୍କୁ ତୁରନ୍ତ ଡାକ୍ତରଖାନା ନେଇଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଖବର ଅନୁଯାୟୀ, ଦୁର୍ଘଟଣା ଘଟାଇଥିବା ଟ୍ରାକ୍ଟରଟି ବେଆଇନ ଭାବେ ବାଲି ପରିବହନ କରୁଥିଲା। ଘଟଣା ପରେ ଶ୍ରଦ୍ଧାଞ୍ଜଳିଙ୍କ ସହପାଠୀ ଓ ସ୍ଥାନୀୟ ଶତାଧିକ ଲୋକେ ଉତ୍ୟକ୍ତ ହୋଇ ଘଟଣାସ୍ଥଳରେ ଜାତୀୟ ରାଜପଥ-୧୬କୁ ଅବରୋଧ କରିଥିଲେ। ଫଳରେ ରାଜପଥର ଉଭୟ ପାର୍ଶ୍ୱରେ ଶହ ଶହ ଗାଡ଼ି ଅଟକି ରହି ଟ୍ରାଫିକ୍ ସମସ୍ୟା ଉପୁଜିଥିଲା।
ବିକ୍ଷୋଭକାରୀମାନେ ଟ୍ରାକ୍ଟର ଡ୍ରାଇଭରର ତୁରନ୍ତ ଗିରଫଦାରୀ ଓ ଅଞ୍ଚଳରେ ଦ୍ରୁତ ଗତିରେ ଗାଡ଼ି ଚଳାଚଳ ଉପରେ କଡ଼ା ପଦକ୍ଷେପ ନେବାକୁ ଦାବି କରିଛନ୍ତି। ପରିସ୍ଥିତି ନିୟନ୍ତ୍ରଣ କରିବା ପାଇଁ ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
