ଅନୁଗୋଳ,୨୩ା୪ (ଜ୍ୟୋତିରଞ୍ଜନ ସାହୁ):ନାବାଳିକା ପ୍ରେମିକାଙ୍କୁ ଦେଖାକରିବାକୁ ନ ଦେଲେ ଆତ୍ମହତ୍ୟା କରିଦେବି। ବେକରେ ଗାମୁଛା ବାନ୍ଧି ଝୁଲିପଡ଼ିବି। ଏକ ଗଛର ୧୦୦ ଫୁଟ୍ ଉପରୁ ଜଣେ ନାବାଳକ ପ୍ରେମିକଙ୍କ ଏପରି ଘନ ଘନ ଚେତାବନୀ ଶୁଣି ଡରିଯାଇଥିଲେ ଦେଖଣାହାରି। ଖବରପାଇ ପହଞ୍ଚିଥିଲା ଅଗ୍ନିଶମ ବାହିନୀ ଓ ପୋଲିସ। ସ୍ଥାନୀୟ ପୌରପାଳିକା ଟିମ୍ ମଧ୍ୟ ଘଟଣାସ୍ଥଳକୁ ଦୌଡ଼ିଥିଲା। ଦେଢ଼ଘଣ୍ଟା ଧରି ବୁଝାଶୁଝା ସହ ପ୍ରେମିକାଙ୍କୁ ଦେଖାକରାଯିବ ବୋଲି କୁହାଯିବା ପରେ ଶେଷରେ ଆତ୍ମହତ୍ୟା ଜିଦ୍ ଛାଡ଼ି ଗଛରୁ ତଳକୁ ଓହ୍ଲାଇଥିଲେ ନାବାଳକ ପ୍ରେମିକ। ଅନୁଗୋଳ ସହର ଅମଲାପଡ଼ାସ୍ଥିତ ଏକ ବାଳାଶ୍ରମ ପରିସରରେ ମଙ୍ଗଳବାର ଘଟିଥିବା ଏପରି ଏକ ଘଟଣା ବେଶ୍ ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁଯାୟୀ, ସମ୍ବଲପୁର ଜିଲା ରେଢ଼ାଖୋଲ ଅଞ୍ଚଳର ଜଣେ ନାବାଳକ (୧୭ ବର୍ଷ ୮ ମାସ) ଓ ନାବାଳିକା (୧୭ ବର୍ଷ) ପରସ୍ପରକୁ ପ୍ରେମ କରୁଥିଲେ। କିଛି ଦିନ ପୂର୍ବରୁ ସେମାନେ ଲୁଚି ଘରୁ ପଳାଇଥିଲେ। ଗତ ଶନିବାର ଅନୁଗୋଳ ରେଲୱେ ପୋଲିସ ଉଭୟଙ୍କୁ ଉଦ୍ଧାର କରି ଶିଶୁ ମଙ୍ଗଳ କମିଟି ସମ୍ମୁଖରେ ହାଜର କରାଇଥିଲା। ଏହାପରେ ନାବାଳକଙ୍କୁ ଅନୁଗୋଳ ଅମଲାପଡ଼ାରେ ଥିବା ଏକ ବାଳାଶ୍ରମରେ ଓ ନାବାଳିକାଙ୍କୁ ଜିଲା ମୁଖ୍ୟ ଚିକିତ୍ସାଳୟର ସଖୀ କାଉନ୍ସେଲିଂ ସେଣ୍ଟରରେ ରଖାଯାଇଥିଲା। ସୋମବାର ସମ୍ପୃକ୍ତା ନାବାଳିକାଙ୍କୁ ତାଙ୍କ ଘର ଲୋକେ ନେଇଯାଇଥିବାବେଳେ ମଙ୍ଗଳବାର ସକାଳୁ ନାବାଳକ ଜଣକ ଉକ୍ତ ବାଳାଶ୍ରମ ପରିସରରେ ଥିବା ପଟାସ ଗଛର ଶୀର୍ଷକୁ ଚଢ଼ିଯାଇ ପ୍ରେମିକାଙ୍କୁ ଘଟଣାସ୍ଥଳକୁ ଡାକିବାକୁ ଦାବି କରିଥିଲେ। ପ୍ରେମିକା ନ ଆସିଲେ ବେକରେ ଗାମୁଛା ବାନ୍ଧି ଗଛରେ ଆତ୍ମହତ୍ୟା କରିଦେବେ ବୋଲି ଚେତାବନୀ ଦେଇଥିଲେ। ବାଳାଶ୍ରମ କର୍ମଚାରୀଙ୍କଠାରୁ ଖବରପାଇ ଅନୁଗୋଳ ଦମକଳ ବାହିନୀ, ଅନୁଗୋଳ ଟାଉନ ଥାନା ପୋଲିସ ଓ ପୌରପାଳିକା ଟିମ୍ ଘଟଣାସ୍ଥଳରେ ପହଞ୍ଚି ଦୀର୍ଘ ସମୟ ଧରି ବୁଝାଶୁଝା କରିଥିଲେ। ପରେ ପ୍ରେମିକାଙ୍କୁ ଦେଖା କରାଇବା ପ୍ରତିଶ୍ରୁତି ଦିଆଯିବାରୁ ନାବାଳକ ଗଛରୁ ସୁରକ୍ଷିତ ଭାବେ ତଳକୁ ଓହ୍ଲାଇଥିବା ଅନୁଗୋଳ ଟାଉନ ଥାନା ଆଇଆଇସି ପ୍ରକାଶ ମାଝୀ ସୂଚନା ଦେଇଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ଆଲୋଚନାର ବିଷୟ ହୋଇଥିବାବେଳେ ବାଳାଶ୍ରମର ସୁରକ୍ଷା ବ୍ୟବସ୍ଥା ଉପରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଏ ସମ୍ପର୍କରେ ଉକ୍ତ ବାଳାଶ୍ରମ କର୍ତ୍ତୃପକ୍ଷଙ୍କ ସହ ଯୋଗାଯୋଗ ସତ୍ତ୍ୱେ ମତାମତ ମିଳିପାରି ନାହିଁ।
Dharitri – Odisha’s No.1 Odia Daily
