ଯେଉଁଠାରେ ମଣିଷ ପାଦ ଦେବା ପାଇଁ ମଧ୍ୟ ଭୟ କରନ୍ତି, ସେହି ସ୍ଥାନରେ କୁକୁରମାନେ ଏବେ ନୀଳ ରଙ୍ଗର ହୋଇଯାଉଛନ୍ତି। କଥାଟା ଆଶ୍ଚର୍ଯ୍ୟ ଲାଗୁଥାଇପାରେ କିନ୍ତୁ ସତ। ୟୁକ୍ରେନର ଚେର୍ନୋବିଲରେ କୁକୁରଙ୍କ ଲୋମ ନୀଳ ହୋଇଯାଉଛି। ସେହି ଅଞ୍ଚଳରେ ୩୯ ବର୍ଷ ପୂର୍ବେ ବିଶ୍ୱର ସବୁଠାରୁ ଖରାପ ପରମାଣୁ ବିପର୍ଯ୍ୟୟ ଘଟିଥିଲା। ଏବେ ପ୍ରଶ୍ନ ଉଠୁଛି ଏହା ସେହି ବିକିରଣର ପ୍ରଭାବ ନା ଅନ୍ୟ କୌଣସି ରହସ୍ୟମୟ ରାସାୟନିକ ପରିବର୍ତ୍ତନ।
ୟୁକ୍ରେନର ଚେର୍ନୋବିଲକୁ ବିଶ୍ୱର ସବୁଠାରୁ ବିପଦପୂର୍ଣ୍ଣ ଅଞ୍ଚଳ ଭାବରେ ବିବେଚନା କରାଯାଏ। ଏଠାରେ ଗତ କିଛିଦିନ ହେବ କିଛି କୁକୁର ସମ୍ପୂର୍ଣ୍ଣ ନୀଳ ହୋଇଯାଇଛନ୍ତି। ଅନ୍ୟ କିଛି କୁକୁରଙ୍କ ଲୋମରେ ଏକ ସ୍ପଷ୍ଟ ନୀଳ ଆବରଣ ଅଛି। ଏହି ଘଟଣା ବୈଜ୍ଞାନିକ ଏବଂ ସ୍ଥାନୀୟ କର୍ତ୍ତୃପକ୍ଷ ଉଭୟଙ୍କୁ ଆଶ୍ଚର୍ଯ୍ୟ କରିଛି।
ଏହି କୁକୁରମାନେ ୧୯୮୬ ମସିହାରେ ଚେର୍ନୋବିଲ ପରମାଣୁ ବିପର୍ଯ୍ୟୟ ପରେ ଛାଡିଯାଇଥିବା ପରବର୍ତ୍ତୀ ପିଢ଼ିର ପ୍ରାଣୀ। ଆଜି ପ୍ରାୟ ୧୮ ବର୍ଗ ମାଇଲ ପ୍ରତିବନ୍ଧିତ ଅଞ୍ଚଳରେ ପ୍ରାୟ ୭୦୦ କୁକୁର ବାସ କରନ୍ତି। ସେମାନଙ୍କ ଯତ୍ନ ନେଉଥିବା ସ୍ବେଚ୍ଛାସେବୀ ଗୋଷ୍ଠୀମାନେ ନିକଟରେ ଏକ ଭିଡିଓ ଶେୟାର କରିଛନ୍ତି। ଏହି ଭିଡିଓରେ ନୀଳ ଲୋମ ଥିବା କିଛି କୁକୁର ଦେଖାଯାଉଛି।
ଏହି ପୋଷ୍ଟରେ ଲେଖାଅଛି, ଗତ ସପ୍ତାହରେ କୁକୁରମାନେ ନୀଳ ନ ଥିଲେ। ଏହା କିପରି ଘଟିଥିଲା ତାହା ଆମେ ଜାଣିନାହୁଁ, କିନ୍ତୁ ଆମେ ତଦନ୍ତ କରୁଛୁ। ପ୍ରାରମ୍ଭରେ ଲୋକମାନେ ଏହାକୁ ବିକିରଣକୁ ଦାୟୀ କରିଥିଲେ, କିନ୍ତୁ ବୈଜ୍ଞାନିକମାନେ ତୁରନ୍ତ ଏହି ସମ୍ଭାବନାକୁ ଖାରଜ କରି ନ ଥିଲେ।
ବୈଜ୍ଞାନିକମାନେ କହିଛନ୍ତି, ରାସାୟନିକ ସଂସ୍ପର୍ଶ ଏକ ସମାନ ଦୃଢ଼ ସମ୍ଭାବନା। ଏହା ସମ୍ଭବ ଯେ, କୁକୁରମାନେ ଶିଳ୍ପ ଆବର୍ଜନା, ଧାତୁ କିମ୍ବା ତମ୍ବା ସଲଫେଟ ଭଳି ରାସାୟନିକ ପଦାର୍ଥ ସହିତ ସଂସ୍ପର୍ଶରେ ଆସିଥାଇପାରନ୍ତି।
ଚେର୍ନୋବିଲ ଅଞ୍ଚଳରେ ଏବେ ବି ଅନେକ ପୁରୁଣା କାରଖାନାର ଅବଶେଷ ରହିଛି। ଏହା ସମ୍ଭବ ଯେ, କୁକୁରମାନେ ଏପରି ସ୍ଥାନରେ ଆଶ୍ରୟ ନେଇଥିବେ ଯେଉଁଠାରେ ରାସାୟନିକ ଲିକ ହୋଇଥିଲା। ଏପର୍ଯ୍ୟନ୍ତ କୌଣସି କୁକୁରଙ୍କୁ ଧରାଯାଇ ନାହିଁ ଏବଂ ପରୀକ୍ଷା କରାଯାଇ ନାହିଁ।
ନମୁନା ପ୍ରାପ୍ତ ହେବା ପରେ ହିଁ ସ୍ପଷ୍ଟ ହେବ ଯେ, ଏହି ପରିବର୍ତ୍ତନ ଜୈବିକ କିମ୍ବା କେବଳ ଏକ ବାହ୍ୟ ରାସାୟନିକ ପ୍ରଭାବ। ବୈଜ୍ଞାନିକମାନେ କହିଛନ୍ତି, ଯଦି ଏହି ପରିବର୍ତ୍ତନ ବିକିରଣ ସହିତ ଜଡିତ। ତେବେ ଏହା ଏକ ପ୍ରମୁଖ ଆବିଷ୍କାର ହୋଇପାରେ।
Dharitri – Odisha’s No.1 Odia Daily
