ଭୁବନେଶ୍ୱର,୫ା୫: ରୁଷିଆର ‘ବିଜୟ ଦିବସ’ରେ ଯୋଗଦେବା ଲାଗି ପ୍ରଧାନମନ୍ତ୍ରୀ ମୋଦିଙ୍କ ଗସ୍ତ ବାତିଲ ହୋଇଥିବା ବେଳେ ଏହି ଉତ୍ସବରେ ଓଡ଼ିଶାର ପୂର୍ବତ୍ତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗଦେଇ ପାରନ୍ତି। ସୋମବାର ଭି.କେ ପାଣ୍ଡିଆନ ସୋସିଆଲ ମିଡିଆରେ ଏହି ସୂଚନା ଦେଇଛନ୍ତି।
ଭାରତରେ ଥିବା ରୁଷିଆ ଦୂତାବାସ ପକ୍ଷରୁ ଏକ ଚିଠି କରାଯାଇ ନବୀନ ପଟ୍ଟନାୟକଙ୍କୁ ନିମନ୍ତ୍ରଣ କରାଯାଇଛି। ଏଥିରେ କୁହାଯାଇଛି ଯେ, ‘ବିଜୟ ଦିବସ’ର ୮୦ ତମ ବାର୍ଷିକୀ ଉପଲକ୍ଷେ ଆୟୋଜିତ ସମ୍ବର୍ଦ୍ଧନା ସମାରୋହରେ ଯୋଗଦେବା ପାଇଁ ଆପଣଙ୍କୁ ହୃଦୟପୂର୍ଣ୍ଣ ନିମନ୍ତ୍ରଣ ଜଣାଉଛି।
ଏହି ଗୌରବ, ଦୁଃଖ ଓ ଅବିଚଳିତ ସ୍ମୃତିର ଏକ ଗମ୍ଭୀର ମୁହୂର୍ତ୍ତରେ, ଆମେ ନାଜିବାଦ ବିରୁଦ୍ଧରେ ଆଣ୍ଟି-ହିଟଲର ମେଣ୍ଟରେ ଏକଜୁଟ ହୋଇ ଲଢ଼ିଥିବା ବ୍ୟକ୍ତିମାନଙ୍କୁ ସମ୍ମାନ ଜଣାଉଛୁ ଏବଂ ପୂର୍ବତନ ସୋଭିଏତ୍ ସଂଘ ଓ ତା’ର ମିତ୍ରମାନଙ୍କର ବୀରତ୍ୱପୂର୍ଣ୍ଣ କାର୍ଯ୍ୟକୁ ସ୍ମରଣ କରୁଛୁ, ଯେଉଁମାନେ ମାନବ ଇତିହାସର ସବୁଠାରୁ ନିଷ୍ଠୁର ସଂଘର୍ଷର ଭାର ବହନ କରିଥିଲେ। ଆମେ ଯେଉଁ ବୀରମାନଙ୍କୁ ଶ୍ରଦ୍ଧାଞ୍ଜଳି ଦେଉଛୁ। ସେମାନଙ୍କ ମଧ୍ୟରେ ଆପଣଙ୍କ ସ୍ୱର୍ଗତ ପିତା, ମାନ୍ୟବର ଶ୍ରୀ ବିଜୁ ପଟ୍ଟନାୟକ, ଜଣେ ମହାନ ବ୍ୟକ୍ତିତ୍ୱ ଓ ଭାରତୀୟ ଜାତୀୟ ଏୟାରୱେଜର ସାହସୀ ପାଇଲଟ। ଯିଏ ଷ୍ଟାଲିନଗ୍ରାଡ ଅପରେସନରେ ଅଂଶଗ୍ରହଣ କରି ଅବରୁଦ୍ଧ ରେଡ ଆର୍ମୀକୁ ଅସ୍ତ୍ରଶସ୍ତ୍ର ଯୋଗାଇ ଦେଇଥିଲେ। ୧୯୯୫ ମସିହାରେ, ରୁଷିଆ ବିଜୁ ପଟ୍ଟନାୟକଙ୍କୁ ତାଙ୍କ ସାହସ ଓ ବୀରତ୍ୱ ପାଇଁ “୧୯୪୧-୧୯୪୫ ମହାନ ଦେଶପ୍ରେମୀ ଯୁଦ୍ଧରେ ବିଜୟର ୫୦ ତମ ବାର୍ଷିକୀ” ଜୁବିଲୀ ପଦକ ପ୍ରଦାନ କରିଥିଲା।
ଆଗାମୀ ସମ୍ବର୍ଦ୍ଧନା ସମାରୋହରେ ଆପଣଙ୍କୁ ସମ୍ମାନିତ ଅତିଥି ଭାବେ ପାଇବା ଆମ ପାଇଁ ଅତ୍ୟନ୍ତ ଗୌରବର ବିଷୟ ହେବ। ଏହି ଅବସରରେ ଡକ୍ଟର ଏସ. ଜୟଶଙ୍କର, ଭାରତ ସରକାରଙ୍କ ବୈଦେଶିକ ମନ୍ତ୍ରୀ, ଏହି ଉଚ୍ଚସ୍ତରୀୟ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଉପସ୍ଥିତ ହେବାକୁ ସହୃଦୟତାର ସହ ସମ୍ମତି ଦେଇଛନ୍ତି। ରୁଷୀୟ ଦୂତାବାସରେ ଆପଣଙ୍କୁ ସ୍ୱାଗତ କରିବାକୁ ଆମେ ଅପେକ୍ଷା କରିଛୁ।”
