ଭଞ୍ଜନଗର,୧୩ା୩(ବାବୁଲା ପ୍ରଧାନ):ଭଞ୍ଜନଗର ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ଅଧିକ୍ଷଣ ଯନ୍ତ୍ରୀ କାର୍ଯ୍ୟାଳୟ ଅଧିନରେ ୧୧ଟି ବ୍ଲକ ଆସୁଛି। ଏବେଠୁ ଅନେକ ଗ୍ରାମରେ ପାନୀୟ ଜଳସଙ୍କଟ ଦେଲାଣି। ଆଗକୁ ଏହି ସମସ୍ୟା ଜଟିଳ ହେବା ସମ୍ଭାବନା ରହିଛି। ଏଭଳି ସ୍ଥିତିରେ ଗତ କିଛିଦିନ ମଧ୍ୟରେ ଦୁବୃତ୍ତମାନେ ୧୧ଟି ପମ୍ପ ହାଉସକୁ ଯାଇଥିବା ବିଦ୍ୟୁତ୍ ତାର କାଟି ନେଇଛନ୍ତି। ଯାହାଫଳରେ ସେସବୁ ପମ୍ପ ହାଉସଗୁଡ଼ିକ ଉପରେ ନିର୍ଭର କରୁଥିବା ବହୁ ପରିବାର ବିଶୁଦ୍ଧ ପାଣି ଟୋପାଏ ପାଇବା ପାଇଁ ଛଟପଟ ହେଉଛନ୍ତି। ୫ ଦିନ ହେଲା ବିଶୁଦ୍ଧ ପାଣି ଟୋପାଏ ପାଇ ନ ପାରି ଭଞ୍ଜନଗର ବ୍ଲକ ରାଇପଲ୍ଲୀ ଓ ଉଲିଦନ ଗ୍ରାମବାସୀ ହୀନସ୍ତା ହେଉଥିବାରୁ ବୁଧବାର ଗ୍ରାମର ମହିଳାମାନେ ଆନ୍ଦୋଳନ ପାଇଁ ସଜବାଜ ହେଉଥିଲେ। ହେଲେ ଗ୍ରାମର କେତେଜଣ ଯୁବକ ଏଥିରେ ହସ୍ତକ୍ଷେପ କରିବାରୁ ଆନ୍ଦୋଳନ ହୋଇ ନ ଥିଲା। କମଳାବାରି ତୋଟା ନିକଟରେ ବଡ଼ନଦୀରୁ ପମ୍ପ ହାଉସ ମାଧ୍ୟମରେ ପାଣି ଛଡ଼ାଯାଉଛି। କିନ୍ତୁ ଦୁବୁର୍ତମାନେ ତାର କାଟି ନେଇଥିଲେ। ଏହାପରେ ବିଭାଗ ପକ୍ଷରୁ ତାର ଯୋଡ଼ିବା ପାଇଁ ପ୍ରୟାସ ଚାଲିଛି। ଅନ୍ୟପଟେ ବିଳମ୍ବ ଯୋଗୁ ଲୋକେ ପାଣି ପାଇପାରୁନାହାନ୍ତି। ସେହିପରି ଗ୍ରାମରେ ଥିବା ନଳକୂଅ ଗୁଡ଼ିକ ମଧ୍ୟ ଅଚଳ ଅବସ୍ଥାରେ ଅଛି। ବାହାକପଲ୍ଲୀରେ ଥିବା ପାଣି ପମ୍ପଟି ଦୁଇଦିନ ପୂର୍ବେ ପୋଡ଼ିଯାଇଛି। ତେଣୁ ବାହାକପଲ୍ଲୀ ଓ ଉଲିଦନ ସମେତ ଆଉ କିଛି ଗ୍ରାମକୁ ପାଣି ଯୋଗାଣ ହୋଇପାରୁନାହିଁ ।
ସୁଚନାଯୋଗ୍ୟ, ଦୁବୃତ୍ତମାନେ ବିଗତ କିଛିଦିନ ମଧ୍ୟରେ ଭଞ୍ଜନଗର ବ୍ଲକର ଚାକୁଣ୍ଡାପଲ୍ଲୀ,ଡ଼ହ, କମଳାବାରି,ଗାଲେରୀ ଆଦି ୮ଟି ପମ୍ପ ହାଉସରୁ ତାର କାଟିନେଇଛନ୍ତି। ସେହିଭଳି ଜଗନ୍ନାଥପ୍ରସାଦ ବ୍ଲକର ୩ଟି ପମ୍ପ ହାଉସରୁ ତାର ଚୋରି ହୋଇଛି। ଏହାପୁର୍ବରୁ ପୋଲସରା ବ୍ଲକର ଅଧିକାଂଶ ପମ୍ପ ହାଉସରୁ ତାର କାଟିନେଇଛନ୍ତି। ଏ ନେଇ ଭଞ୍ଜନଗର ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ସହକାରୀ ଯନ୍ତ୍ରୀ ନିହାର ରଞ୍ଜନ ସ୍ବାଇଁଙ୍କୁ ପଚାରିବାରୁ ସେ କହିଛନ୍ତି, ଚୋରି ତାର ସମ୍ପର୍କରେ ଥାନାରେ ଅଭିଯୋଗ ହୋଇଛି। ଗୋଟିଏ ପରେ ଗୋଟିଏ ପମ୍ପ ହାଉସ୍କୁ ସଚଳ କରାଯାଉଛି। ସମସ୍ତ ପମ୍ପ ହାଉସକୁ ସଚଳ କରିବା ପାଇଁ ଭଞ୍ଜନଗର ଓ ଜଗନ୍ନାଥପ୍ରସାଦ ଅଞ୍ଚଳରେ ୨୦ ଲକ୍ଷରୁ ଉର୍ଦ୍ଧ୍ୱ ଟଙ୍କା ଖର୍ଚ୍ଚ ହେବ। ବାହାକପଲ୍ଲୀ ପମ୍ପ ପୋଡ଼ିଯିବା ଯୋଗୁ ଉଲିଦନକୁ ପାଣି ଯୋଗାଣରେ ବ୍ୟାହତ ହୋଇଛି। ମହିଳା ମାନେ ଆନ୍ଦୋଳନ ପାଇଁ ସଜବାଜ ହେବା ଖବରକୁ ସେ ଖଣ୍ଡନ କରିଛନ୍ତି।
