ନୂଆଦିଲ୍ଲୀ,୯।୧: ଦିଲ୍ଲୀରେ ଆସନ୍ତା ମାସରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ନିର୍ବାଚନ ଜିତିବାକୁ ଭାରତୀୟ ଜନତା ପାର୍ଟି ଏଥର ଅଣ୍ଟା ଭିଡିଛି। ଖବର ମୁତାବକ ଦିଲ୍ଲୀବାସୀଙ୍କୁ ମାଗଣା ବିଜୁଳି ଘୋଷଣା କରିପାରେ ଭାଜପା।
ସୂତ୍ରରୁ ମିଳିଥିବା ଖବର ଅନୁଯାୟୀ ଭାଜପା ଦିଲ୍ଲୀରେ ୩୦୦ ୟୁନିଟ ପର୍ଯ୍ୟନ୍ତ ମାଗଣା ବିଜୁଳି ଘୋଷଣା କରିପାରେ। ଏହାସହିତ ପାର୍ଟି ମନ୍ଦିର ଏବଂ ଗୁରୁଦ୍ୱାର ଭଳି ଧାର୍ମିକ ସ୍ଥାନ ମାନଙ୍କୁ ୫୦୦ ୟୁନିଟ ପର୍ଯ୍ୟନ୍ତ ମାଗଣା ବିଜୁଳି ପ୍ରଦାନ କରିବାକୁ ଯୋଜନା କରୁଛି।
ଭାଜପା ମହିଳାମାନଙ୍କ ପାଇଁ ଲାଡଲି ବେହେନ ଯୋଜନା ଭଳି ଏକ ସ୍ୱତନ୍ତ୍ର ଯୋଜନା ମଧ୍ୟ ଘୋଷଣା କରିପାରେ। ଦଳ ପାଇପଲାଇନ ମାଧ୍ୟମରେ ମାଗଣା ବିଶୁଦ୍ଧ ପାଣି ଯୋଗାଇବାକୁ ମଧ୍ୟ ପ୍ରତିଶ୍ରୁତି ଦେଇପାରେ।
ସେପଟେ ଆମ ଆଦମୀ ପାର୍ଟି ଭୋଟରଙ୍କୁ ଆକୃଷ୍ଟ କରିବା ପାଇଁ ଏପ୍ରକାର ଯୋଜନା ଗୁଡିକର ବର୍ଷା କରିଛି। କ୍ଷମତାରେ ଥିବା ଆପ୍ ଗତ ଏକ ମାସ ହେଲା ନିର୍ବାଚନୀ ପ୍ରତିଶ୍ରୁତି ଘୋଷଣା କରିବାରେ ଲାଗିଛି। ପାର୍ଟି ମହିଳାଙ୍କ ଠାରୁ ଆରମ୍ଭ କରି ବୟସ୍କ, ଅଟୋ ଡ୍ରାଇଭର ଏବଂ ପୂଜାରୀମାନଙ୍କ ପର୍ଯ୍ୟନ୍ତ ବଡ ଯୋଜନା ଘୋଷଣା କରିଛି।
ଏଥିରେ ବୟସ୍କଙ୍କ ପାଇଁ ସଞ୍ଜୀବନୀ ଯୋଜନା, ନିର୍ବାଚନରେ ଜିତିବା ପରେ ମହିଳାଙ୍କୁ ୨୧୦୦ ଟଙ୍କା, ଅଟୋ ଚାଳକଙ୍କ ପାଇଁ ୧୦ ଲକ୍ଷ ଟଙ୍କାର ବୀମା ଏବଂ ପୂଜାରୀଙ୍କ ପାଇଁ ୧୮,୦୦୦ ଟଙ୍କା ଦରମା ପ୍ରଦାନର ପ୍ରତିଶ୍ରୁତି ଅନ୍ତର୍ଭୁକ୍ତ।
ସେହିଭଳି କଂଗ୍ରେସ ମହିଳାଙ୍କ ପାଇଁ ପ୍ୟାରୀ ଦିଦି ଯୋଜନାର ମଧ୍ୟ ପ୍ରତିଶ୍ରୁତି ଦେଇଛି। କଂଗ୍ରେସ କହିଛି ଯେ କର୍ଣ୍ଣାଟକ ପରି ସେମାନେ ଦିଲ୍ଲୀରେ ମହିଳାଙ୍କୁ ସୁବିଧା ଦେବେ। ଦିଲ୍ଲୀରେ କ୍ଷମତାକୁ ଆସିବା ପରେ ପ୍ରଥମ କ୍ୟାବିନେଟ ବୈଠକରେ ଏହି ଯୋଜନା କାର୍ଯ୍ୟକାରୀ କରାଯିବ। କର୍ଣ୍ଣାଟକରେ, କଂଗ୍ରେସ ମହିଳାଙ୍କ ପାଇଁ ସମାନ ମଡେଲରେ ଗୃହଲକ୍ଷ୍ମୀ ଯୋଜନା କାର୍ଯ୍ୟକାରୀ କରିଛି।
