ଖୋର୍ଦ୍ଧା,୭ା୧(ପ୍ରଭାତ ପାଣିଗ୍ରାହୀ): ବୋଲଗଡ଼ ବ୍ଲକ ଆରିକମା ପଞ୍ଚାୟତ ଅଧୀନ ବେଗୁନିଆମୂଳ ଗ୍ରାମର ଶ୍ମଶାନକୁ ଯିବା ପାଇଁ ରାସ୍ତାର ଉନ୍ନତ୍ତୀକରଣ ପାଇଁ ଆସିଥିବା ୮ଲକ୍ଷ ଟଙ୍କା ହରିଲୁଟ କରାଯାଇଥିବା ଅଭିଯୋଗକ୍ରମେ ଭିଜିଲାନ୍ସ ଏହାର ତଦନ୍ତ କରି ଗତ ଡିସେମ୍ବର ୩୧ରେ ଭୁବନେଶ୍ୱର ଦୁର୍ନୀତି ନିବାରଣ ଡିଭିଜନରେ ୭ଜଣଙ୍କ ନାଁରେ ମାମଲା(ନଂ.୩୦/୨୪) ରୁଜୁ କରିଛି। ଉକ୍ତ ବ୍ଲକରେ କାର୍ଯ୍ୟରତ ଏପିଓ, କନିଷ୍ଠଯନ୍ତ୍ରୀ, ସରପଞ୍ଚ, ପଞ୍ଚାୟତ ନିର୍ବାହୀ ଅଧିକାରୀ ଏବଂ ଜିଆରଏସ୍ଙ୍କ ସମେତ କାର୍ଯ୍ୟ କରୁଥିବା ଦୁଇ ଜଣଙ୍କ ନାଁରେ ମାମଲା ରୁଜୁ କରାଯାଇଥିବା ଖୋର୍ଦ୍ଧା ଭିଜିଲାନ୍ସ ଡିଏସ୍ପି ବ୍ରଜକିଶୋର ସାହୁ କହିଛନ୍ତି। ଅନ୍ୟପଟେ ଏ ସଂକ୍ରାନ୍ତରେ ଅଭିଯୋଗକାରୀ ଦୁଇଥର ବେଗୁନିଆ ଏବଂ ଖୋର୍ଦ୍ଧାରେ ଜନଶୁଣାଣି ଶିବିରରେ ଜିଲାପାଳଙ୍କୁ ଅଭିଯୋଗ କରିଥିବା ବେଳେ ନୂତନଭାବେ ଯୋଗଦେଇଥିବା ଜିଲା ପରିଷଦ ଉନ୍ନୟନ ଅଧିକାରୀଙ୍କୁ ମଧ୍ୟ ଲିଖିତ ଅଭିଯୋଗ କରିଥିଲେ। ତେବେ ପ୍ରତିଶ୍ରୁତି ମିଳୁଛି କିନ୍ତୁ ବିଭାଗୀୟ ତଦନ୍ତ କରାଯାଇନାହିଁ। ଏନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଗୋଟିଏ ରାସ୍ତାରେ ୨ବର୍ଷରେ ଦୁଇଟି ବିଲ୍ କରାଯାଇଛି। ମିଥ୍ୟା ବିଲ୍ ଦେଇ ୮ଲକ୍ଷ ଟଙ୍କା ଠକି ନେଇଗଲେ। ଏହି ଘଟଣା କେତେଜଣ ଗ୍ରାମବାସୀ ଜାଣିବାକୁ ପାଇଥିଲେ। ଏନେଇ ବ୍ଲକଠାରୁ ଜିଲା ପ୍ରଶାସନ ପର୍ଯ୍ୟନ୍ତ ଅଭିଯୋଗ କରି ବିଫଳ ହେବା ପରେ ଖୋର୍ଦ୍ଧା ଦୁର୍ନୀତି ନିବାରଣ କାର୍ଯ୍ୟାଳୟର ଦ୍ୱାରସ୍ଥ ହୋଇଥିଲେ। ଅଭିଯୋଗ ମୁତାବକ, ଏହି ଗ୍ରାମ ଶ୍ମଶାନକୁ ଯିବା ପାଇଁ ରାସ୍ତା ନ ଥିଲା। ବାରମ୍ବାର ଦାବି ପରେ ୨୦୨୨-୨୩ରେ ପ୍ରଥମେ ୬ଲକ୍ଷ ଟଙ୍କା ବ୍ୟୟ ଅଟକଳରେ ମାଟି ପକାଇ ରାସ୍ତା ନିର୍ମାଣ କରାଯାଇଥିଲା। ଏହାର ସବିଶେଷ ତଥ୍ୟ ସୂଚନାଫଳକରେ ଉଲ୍ଲେଖ ରହିଥିଲା। ପରବର୍ତ୍ତୀ ସମୟରେ ଏହି ରାସ୍ତାର ପୁର୍ନବାର ଉନ୍ନତ୍ତୀକରଣ ପାଇଁ ପୁନଃ ୮ଲକ୍ଷ ଟଙ୍କା ମଞ୍ଜୁର ହୋଇଥିଲା। ତେବେ ପୁରୁଣା ଫଳକରେ କେବଳ ନୂଆ କାମର କୋଡ ନମ୍ବର ପରିବର୍ତ୍ତନ କରି କୌଣସି କାମ ନ କରି ଟଙ୍କା ଉଠାଇନେଲେ। ଏହି ହରିଲୁଟ ପଛରେ ବ୍ଲକ ପ୍ରଶାସନର କେତେଜଣ ଅସାଧୁ କର୍ମଚାରୀ, ଅଧିକାରୀଙ୍କ ହାତ ରହିଥିବା କେତେଜଣ ଗ୍ରାମବାସୀ କହିଛନ୍ତି। ଏହାର ଖୋଲତାଡ଼ ଆରମ୍ଭ ପରେ ଏହାର ଫଳକକୁ ଭାଙ୍ଗି ଦେଇଥିଲେ। ରାସ୍ତା ନିର୍ମାଣରେ ଅର୍ଥ ହରିଲୁଟ ସମ୍ପର୍କରେ ଅଭିଯୋଗ ସତ୍ତ୍ୱେ ପ୍ରଶାସନ ନୀରବଦ୍ରଷ୍ଟା ସାଜିଛି।
