ପଟ୍ଟାଙ୍ଗି,୧୩ା୫(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ୍ ଅନ୍ତର୍ଗତ ପେଟୁରୁ ପଞ୍ଚାୟତର ରାଇପାଡୁ ଗ୍ରାମରେ ନୂତନ କରି ଏକ କ୍ଷୁଦ୍ର ପୋଲ ନିର୍ମାଣ ହୋଇଛି । ଏହାକୁ ସ୍ଥାନୀୟ ବିଧାୟକ ରାମଚନ୍ଦ୍ର କାଡାମଙ୍କ ଦ୍ଵାରା ଉଦଘାଟନ ହୋଇଛି । କିନ୍ତୁ ଉକ୍ତ ଉଦଘାଟନରେ ଲଗା ଯାଇଥିବା ନାମ ଫଳକରେ ସରପଞ୍ଚ ଠାରୁ ଆରମ୍ଭ କରି ସମିତି ସଭ୍ୟା ଏବଂ ଗ୍ରାମର ନାମ ବନାନକୁ ଭୁଲ୍ ଲେଖାଯାଇଥିବା ନେଇ ଅସନ୍ତୋଷ ଦେଖାଯାଇଛି । ଓଡ଼ିଆ ଭାଷା ଓ ଅକ୍ଷର ପ୍ରତି ପ୍ରଶ୍ନ ସୃଷ୍ଟି କରିଛି ।
ସୂଚନା ଅନୁସାରେ, ବ୍ଲକ୍ ପ୍ରଶାସନ ପକ୍ଷରୁ ପେଟୁରୁ ପଞ୍ଚାୟତର ରାଇପାଡୁ ଗ୍ରାମରେ ନିର୍ମାଣ ହୋଇଥିବା କ୍ଷୁଦ୍ର ପଲୋକୁ ଉଦଘାଟନ ନିମନ୍ତେ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଉକ୍ତ କାର୍ଯ୍ୟକ୍ରମରେ ବିଧାୟକ କାଡାମ୍ ଯୋଗ ଦେଇ ଉଦଘାଟନ କରିଥିବା ବେଳେ ନାମ ଫଳକରେ ସରପଞ୍ଚ ମମିତା ବାଙ୍କା ଲେଖା ହେବା ସ୍ଥାନରେ ବାନଙ୍କା ଲେଖା ଥିବା ନେଇ ଉପସ୍ଥିତ ଗ୍ରାମବାସୀ ଅସନ୍ତୋଷ ପ୍ରକାଶ କରିଛନ୍ତି । ସେହିପରି ନାମ ଫଳକରେ ଖଲି ସରପଞ୍ଚଙ୍କ ନାମ ଭୁଲ୍ ଲେଖା ହୋଇନାହିଁ ।
ପଞ୍ଚାୟତର ସମିତି ସଭ୍ୟା ରଞ୍ଜୁ ଗାଣ୍ଡେରି ସ୍ଥାନରେ ଗ୍ନାଡେରି ଲେଖା ହୋଇଥିବା ସହ ଗ୍ରାମର ନାମ ରାଇପାଡୁ ଲେଖା ହେବା ସ୍ଥାନରେ ରାଇଗାଡୁ ଲେଖା ହୋଇଛି । ରାଜ୍ୟ ସରକାର ଓଡ଼ିଆ ଭାଷା ପ୍ରଚାର ପ୍ରସାରକୁ ଗୁରୁତ୍ୱ ଦେଉଥିବା ବେଳେ ଓଡ଼ିଆ ଭାଷାକୁ ଯିଏ ଭୁଲ ଲେଖିବ ତାକୁ ତଣ୍ଡ ଗଣିବାକୁ ପଡିବ ବୋଲି ନିର୍ଦ୍ଦେଶ ଜାରି କରିଛନ୍ତି । ସେପଟେ ଖୋଦ୍ ରାଜ୍ୟ ସରକାରଙ୍କ ଅଧିକାରୀ ଓ କର୍ମଚାରୀ ଓଡ଼ିଆ ବନାନକୁ କଦର୍ଯ୍ୟ ଭାବେ ଲେଖି ନିର୍ବାଚିତ ପଞ୍ଚାୟତ ଜନପ୍ରତିନିଧିଙ୍କ ପ୍ରତି ଅସମ୍ମାନ କରିଥିବା ଦୃଶ୍ୟକୁ ନେଇ ଅସନ୍ତୋଷ ବଢିବାରେ ଲାଗିଥିବା ବେଳେ ଓଡିଆ ଅସ୍ମିତା ଉପରେ ପ୍ରଶ୍ନ ଉଠିଛି ।
