ବେଜିଂ,୧୩।୫: ଚାଇନାରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଅପମାନ। ଦୁଇ ଦିନିଆ ସରକାରୀ ଗସ୍ତରେ ଚାଇନାରେ ପହଞ୍ଚିଥିବା ଟ୍ରମ୍ପଙ୍କୁ ସ୍ବାଗତ କରିବା ପାଇଁ ଚାଇନା ରାଷ୍ଟ୍ରପତି ଶି ଜିନପିଙ୍ଗ ବିମାନବନ୍ଦରକୁ ଯାଇ ନ ଥିବା ଦେଖିବାକୁ ମିଳିଛି। ଏହା ବଦଳରେ ସେ ଉପରାଷ୍ଟ୍ରପତି ହାନ ଜେଙ୍ଗଙ୍କୁ ପଠାଇଛନ୍ତି। ବେଜିଂ ବିମାନବନ୍ଦରରେ ଟ୍ରମ୍ପଙ୍କ ସ୍ବାଗତ ଲାଗି ଉପରାଷ୍ଟ୍ରପତିଙ୍କ ସହ ଆମେରିକା ରାଷ୍ଟ୍ରଦୂତ ଡେଭିଡ ପର୍ଡ୍ୟୁ ଏବଂ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଏହା ବ୍ୟତୀତ ଚାଇନା ଧଳା ଏବଂ ନୀଳ ରଙ୍ଗର ପୋଷାକ ପିନ୍ଧିଥିବା ୩୦୦ ଯୁବକଙ୍କୁ ମୁତୟନ କରିଥିଲା। ବିମାନବନ୍ଦରରେ ଏକ ବ୍ୟାଣ୍ଡ ପାର୍ଟି ମଧ୍ୟ ଉପସ୍ଥିତ ଥିଲେ।
ଦ୍ୱିତୀୟ ଥର ରାଷ୍ଟ୍ରପତି ହେବା ପରେ ଟ୍ରମ୍ପ ୟୁଏଇ (UAE), ଇସ୍ରାଏଲ, ସୌଦି ଆରବ ଏବଂ କତାର ଭଳି ଦେଶ ଗସ୍ତ କରିଥିଲେ, ଯେଉଁଠାରେ ସେହି ଦେଶର ରାଷ୍ଟ୍ରମୁଖ୍ୟମାନେ ତାଙ୍କୁ ସ୍ବାଗତ କରିବା ପାଇଁ ବିମାନବନ୍ଦରରେ ନିଜେ ଉପସ୍ଥିତ ଥିଲେ। ଟ୍ରମ୍ପଙ୍କ ପାଇଁ ଏହା ଏକ ଅପମାନ ସଦୃଶ, କାରଣ ଆମେରିକାରୁ ବାହାରିବା ସମୟରେ ସେ ଜିନପିଙ୍ଗଙ୍କ ପ୍ରଶଂସାରେ ଶତମୁଖ ହୋଇଥିଲେ।
ଚାଇନାର ପ୍ରୋଟୋକଲ ଅନୁଯାୟୀ, କୌଣସି ବିଦେଶୀ ନେତାଙ୍କୁ ସ୍ବାଗତ କରିବା ପାଇଁ ରାଷ୍ଟ୍ରପତି ବିମାନବନ୍ଦର ଯାଆନ୍ତି ନାହିଁ। ପୂର୍ବରୁ ରୁଷିଆ ରାଷ୍ଟ୍ରପତି ପୁଟିନ ଏବଂ କୋରିଆ ନେତା କିମ ଜୋଙ୍ଗ ଉନ ଚାଇନା ଆସିଥିବା ବେଳେ ମଧ୍ୟ ଜିନପିଙ୍ଗ ସ୍ବାଗତ ପାଇଁ ଯାଇ ନ ଥିଲେ। ରିପୋର୍ଟ ଅନୁଯାୟୀ, ସାଧାରଣତଃ ଏହି ଦାୟିତ୍ୱ ବିଦେଶ ମନ୍ତ୍ରୀଙ୍କୁ ଦିଆଯାଇଥାଏ, କିନ୍ତୁ ଟ୍ରମ୍ପଙ୍କୁ ସ୍ବତନ୍ତ୍ର ସମ୍ମାନ ଦେବା ପାଇଁ ଜିନପିଙ୍ଗ ନିଜ ଉପରାଷ୍ଟ୍ରପତିଙ୍କୁ ପଠାଇଛନ୍ତି। ଶେଷଥର ପାଇଁ ୨୦୦୯ରେ ଜିନପିଙ୍ଗ ଓବାମାଙ୍କୁ ସ୍ବାଗତ କରିବାକୁ ବିମାନବନ୍ଦର ଯାଇଥିଲେ, କିନ୍ତୁ ସେତେବେଳେ ସେ ନିଜେ ଚାଇନାର ଉପରାଷ୍ଟ୍ରପତି ଥିଲେ।
ଦ୍ୱିତୀୟ ଥର ରାଷ୍ଟ୍ରପତି ହେବା ପରେ ଟ୍ରମ୍ପଙ୍କ ଏହି ଚୀନ ଗସ୍ତ ବେଶ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି। ଏହି ଗସ୍ତର ମୁଖ୍ୟ କାରଣଗୁଡ଼ିକ ଭିତରେ ରହିଛି କୃତ୍ରିମ ବୁଦ୍ଧିମତା (AI) ଏବଂ ’ରେୟାର୍ ଆର୍ଥ ମିନେରାଲ୍ସ’କୁ ନେଇ ଦୁଇ ଦେଶ ମଧ୍ୟରେ ବଡ଼ ଧରଣର ଚୁକ୍ତି ହୋଇପାରେ। ବାଣିଜ୍ୟ କାରବାର ଏବଂ ଟ୍ୟାରିଫ ସୀମାକୁ ନେଇ ଦୁଇ ନେତାଙ୍କ ମଧ୍ୟରେ ଆଲୋଚନା ହେବ। ଚାଇନା ଓ ତାଇୱାନ ମଧ୍ୟରେ ବଢୁଥିବା ତିକ୍ତତା ମଧ୍ୟରେ ଟ୍ରମ୍ପଙ୍କ ଏହି ଗସ୍ତରେ ଚାଇନାର ଆଭିମୁଖ୍ୟ ସ୍ପଷ୍ଟ ହୋଇପାରେ। ୨୦୨୭ ସୁଦ୍ଧା ଚାଇନା ତାଇୱାନ ଉପରେ ଆକ୍ରମଣ କରିପାରେ ବୋଲି ଆମେରିକା ଆଶଙ୍କା କରୁଛି।
ବର୍ତ୍ତମାନ ଆମେରିକା ଇରାନ ସହ ସଂଘର୍ଷରେ ଫସି ରହିଛି। ଚାଇନାର ଇରାନ ସହ ଭଲ ସମ୍ପର୍କ ଥିବାରୁ, ଏହି ସମସ୍ୟାର ସମାଧାନ ପାଇଁ ଟ୍ରମ୍ପ ଜିନପିଙ୍ଗଙ୍କ ସହାୟତା ଲୋଡ଼ିପାରନ୍ତି। ଟ୍ରମ୍ପଙ୍କ ସହିତ ଆମେରିକା ପ୍ରତିରକ୍ଷା ମନ୍ତ୍ରୀ ପିଟ ହେଗସେଥ୍, ବିଦେଶ ମନ୍ତ୍ରୀ ମାର୍କୋ ରୁବିଓ ଏବଂ ଅନେକ ବଡ଼ ଶିଳ୍ପପତି ମଧ୍ୟ ବେଜିଂ ଗସ୍ତରେ ଯାଇଛନ୍ତି।
