ଭୁବନେଶ୍ୱର,୪।୫: କୁହାଯାଏ ପାଖରେ ଟଙ୍କା ନ ଥିଲେ ରାଜନୀତି କରି ହୁଏନି। ପ୍ରଚାର ଠାରୁ ଆରମ୍ଭ କରି ପୋଷ୍ଟର ଛାପିବା ଯାଏଁ ବିଡା ବିଡା ଟଙ୍କା ଲାଗିଥାଏ। ଆଗରୁ ଦେଖାଯାଇଛି କି, ଏହି ପ୍ରଚାର ସମୟରେ ଭୋଟରଙ୍କୁ ଆକର୍ଷିତ କରିବା ପାଇଁ ପ୍ରାର୍ଥୀ ମୁଠା ମୁଠା ଟଙ୍କା ଉଡେଇଥାନ୍ତି। ହେଲେ ପାଖରେ ଟଙ୍କା ନ ଥିଲେ ଏସବୁ କରିହୁଏନା। ଏହାର ଏକ ସ୍ପଷ୍ଟ ଉଦାହରଣ ହେଲେ ପୁରୀର କଂଗ୍ରେସ ଏମପି ପ୍ରାର୍ଥୀ ସୁଚରିତା ମହାନ୍ତି। ଶନିବାର ସକାଳେ ସେ ନିଜ ଟିକେଟ୍ ଦଳକୁ ଫେରାଇଛନ୍ତି। ସେ କହିଛନ୍ତି, ବିନା ଟଙ୍କାରେ ପ୍ରଚାର କରିବା କଷ୍ଟ। ଦଳ ଏଯାଏଁ ଫଣ୍ଡି ଦେଇ ନ ଥିବାରୁ ଟିକେଟ୍ ଫେରାଇଛି ବୋଲି ସ୍ପଷ୍ଟ କରିଛନ୍ତି ସୁଚରିତା। ତେବେ କେବଳ ସୁଚରିତାଙ୍କ ଉଦାହରଣ ନୁହେଁ ଗତ ନିର୍ବାଚନରେ ଓଡିଶାରେ ସବୁଠାରୁ ଗରିବ ଏମପି ପ୍ରାର୍ଥୀ ଭାବେ ନଜର ଆସିଛନ୍ତି ବାଲେଶ୍ୱର ଏମପି ପ୍ରତାପ ଷଡଙ୍ଗୀ।
ତେବେ ଚଳିତ ନିର୍ବାଚରେ ମଧ୍ୟ ଜଣେ ମହିଳା ରାଜ୍ୟର ସବୁଠାରୁ ଗରିବ ପ୍ରାର୍ଥୀ ଭାବେ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ଯାହାଙ୍କ ପାଖରେ ମାତ୍ର ୨୦ହଜାର ଟଙ୍କା ରହିଛି। ଶୁଣି ଆଶ୍ଚର୍ଯ୍ୟ ଳାଗୁଥିଲେ ମଧ୍ୟ ସତ। ସେ ହେଉଛନ୍ତି କୋରାପୁଟର SUCI ପ୍ରାର୍ଥୀ ପ୍ରମିଳା ପୂଜାରୀ।
ଏଡିଆର ଓ ଓଡ଼ିଶା ଇଲେକ୍ସନ ୱାଚ ରିପୋର୍ଟରେ ଏ ସମ୍ପର୍କିତ ଏକ ରିପୋର୍ଟ ପ୍ରକାଶ ପାଇଛି। ଯେଉଁଥିରେ ଓଡିଶାର ସବୁଠାରୁ ଗରିବ ଏମପି ପ୍ରାର୍ଥୀ ବୋଲି ଜଣାପଡିଛି। ତାଙ୍କ ପାଖରେ ମୋଟ ୨୦ ହଜାର ୬୨୫ ଟଙ୍କାର ସମ୍ପତ୍ତି ରହିଛି।
ସୂଚନାଥାଉ କି, ଏଡିଆର ଓ ଓଡ଼ିଶା ଇଲେକ୍ସନ ୱାଚ ୩୭ ଜଣଙ୍କ ପ୍ରାର୍ଥୀଙ୍କ ସତ୍ୟପାଠ ସମ୍ପର୍କିତ ତଥ୍ୟ ସାମ୍ନାକୁ ଆଣିଛି। ତନ୍ମଧ୍ୟରୁ ୧୭ ଜଣ ଲୋକ ସଭା ପ୍ରାର୍ଥୀ କୋଟିପତି ବୋଲି ଜଣାପଡିଛି। ମୋଟ ୪୧ କୋଟି ୮୯ ଲକ୍ଷ ଟଙ୍କାର ସମ୍ପତ୍ତି ସହ BJP ର କଳାହାଣ୍ଡି ଲୋକ ସଭା ପ୍ରାର୍ଥୀ ମାଳବିକା ଦେବୀ ସବୁଠୁ ଧନୀ ଲୋକ ସଭା ପ୍ରାର୍ଥୀ ହୋଇଛନ୍ତି।
