କେନ୍ଦୁଝର,୧୬ା୩(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଫାଷ୍ଟଟ୍ରାକ୍ କୋର୍ଟର ବିଚାରପତି ବିଜୟ କୁମାର ମିଶ୍ର ଶନିବାର ଏକ ୧୪ ବର୍ଷ ନାବାଳିକା ବଳାତ୍କାର ମାମଲାର ଶୁଣାଣି କରି ଜଣେ ୨୩ ବର୍ଷୀୟ ଯୁବକଙ୍କୁ ୨୦ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିବା ସହ ୧୦ ହଜାର ଟଙ୍କା ଜରିମାନା ଆଦେଶ କରିଛନ୍ତି। ଜରିମାନା ଅନାଦେୟ ଅଧିକ ୬ ମାସ ସଶ୍ରମ କାରାଦଣ୍ଡାଦେଶ ଶୁଣାଇଛନ୍ତି। ପୀଡ଼ିତାଙ୍କୁ ୪ଲକ୍ଷ ଟଙ୍କା ଅନୁକମ୍ପାମୂଳକ ରାଶି ପ୍ରଦାନ ନିମନ୍ତେ ସୁପାରିସ କରିଛନ୍ତି।
ଘଟଣାରୁ ପ୍ରକାଶ ଯେ, ସୁନ୍ଦରଗଡ଼ ଜିଲା ବଣାଇ ଥାନା ଅନ୍ତର୍ଗତ ଫୁଲଘର ମହୁଲପଡ଼ା ଗ୍ରାମର ୨୩ ବର୍ଷୀୟ ଯାତ୍ରା ଦେହୁରୀ କେନ୍ଦୁଝର ହୁଡ୍କୋ କଲୋନୀରେ ରହି ଇଲେକ୍ଟ୍ରିସିଆନ ଭାବେ କାର୍ଯ୍ୟ କରି ଆସୁଥିଲେ। ଗତ ୨୦୨୨ ଡିସେମ୍ବର ୨୨ ପୂର୍ବାହ୍ନ ୧୦ଟାରେ ଘର ଲୋକ କେହି ନ ଥିବା ସୁଯୋଗରେ ପୀଡ଼ିତାଙ୍କୁ ବିବାହ ପ୍ରଲୋଭନ ଦେଖାଇ ଘରୁ ଅପହରଣ କରି ନେଇଥିଲେ । ପୀଡ଼ିତାଙ୍କ ମାଆ-ବାପା ଘରେ ପହଞ୍ଚିବା ପରେ ଝିଅକୁ ନ ପାଇ ତା- ୨୯.୧୨.୨୦୨୨ ରିଖରେ ଟାଉନ ଥାନାରେ ଏକ ଲିଖିତ ଅଭିଯୋଗ କରିଥିଲେ। ଯାହା କେସ୍ ନଂ ୫୨୭/୨୯ରେ ରେଜେଷ୍ଟ୍ରି ହୋଇଥିଲା ଏବଂ ପୋଲିସ ତା ୧.୧.୨୦୨୩ରେ କେନ୍ଦୁଝର ବସ୍ଷ୍ଟାଣ୍ଡ ନିକଟରୁ ପୀଡ଼ିତାଙ୍କୁ ଉଦ୍ଧାର କରିବା ସହ ଅଭିଯୁକ୍ତଙ୍କୁ ଗିରଫ କରି ପୀଡ଼ିିତାଙ୍କ ବୟାନ ନେବା ପରେ ଏହା ଏକ ବଳାତ୍କାର ମାମଲା ବୋଲି ଜଣାପଡ଼ିଥିଲା। ତେଣୁ ପୋଲିସ ଆସାମୀଙ୍କୁ ଦଫା ୩୬୩/୩୬୬/୩୭୬(୩) ଆଇପିସି ଏବଂ ୬ ପୋକ୍ସୋ ଧାରା ରୁଜୁ କରି କୋର୍ଟ ଚାଲାଣ କରିଥିଲା। ଶନିବାର ଫାଷ୍ଟଟ୍ରାକ୍ କୋର୍ଟର ବିଚାରପତି ୧୧ ଜଣ ସାକ୍ଷୀଙ୍କ ବୟାନ ଓ ପୋଲିସ ତଦନ୍ତ ରିପୋର୍ଟକୁ ଭିତ୍ତି କରି ଆସାମୀଙ୍କୁ ଉପରୋକ୍ତ ରାୟ ଶୁଣାଇଛନ୍ତି ବୋଲି କେସ୍ ପରିଚାଳନା କରୁଥିବା ସ୍ବତନ୍ତ୍ର ପିପି ଜ୍ଞାନେନ୍ଦ୍ର ନାଥ ଜେନା କହିଛନ୍ତି।
