ଲକ୍ଷ୍ନୌ,୩।୨ : ଉତ୍ତରପ୍ରଦେଶର ବାଦାଉ୍ଁ ଜିଲାରେ ସରକାରୀ ବାସଭବନରୁ ଜଣେ ମହିଳା ବିଚାରପତିଙ୍କ ମୃତଦେହ ଉଦ୍ଧାର କରାଯାଇଛି। କୁହାଯାଉଛି ବିଚାରପତି ଆତ୍ମହତ୍ୟା କରିଛନ୍ତି। ଶନିବାର ଯେତେବେଳେ ସେ ତାଙ୍କ କାର୍ଯ୍ୟାଳୟରେ ପହଞ୍ଚି ନ ଥିଲେ, କାର୍ଯ୍ୟାଳୟର କିଛି ଲୋକ ଘରକୁ ଆସିଥିଲେ। ଯେତେବେଳେ ତାଙ୍କର କବାଟ ଖୋଲିଲା ନାହିଁ, ପୋଲିସକୁ ସୂଚନା ଦିଆଯାଇଥିଲା। ସୂଚନାଯୋଗ୍ୟ ପୂର୍ବରୁ ଜଣେ ମହିଳା ବିଚାରପତି ବିଚାର ବ୍ୟବସ୍ଥାରେ ବିରକ୍ତ ହୋଇ ଆତ୍ମହତ୍ୟା କରିବାକୁ ଅନୁମତି ମାଗିଥିଲେ।
ମହିଳା ବିଚାରପତିଙ୍କ ନାମ ଜ୍ୟୋତ୍ସ୍ନା ରାୟ ବୋଲି କୁହାଯାଉଛି। ସେ ମାଉ ଜିଲାର ବାସିନ୍ଦା ଥିଲେ। ୨୯ ବର୍ଷିୟା ଜ୍ୟୋତ୍ସ୍ନାଙ୍କୁ ବାଦାଉଁ ଜିଲାର ଜୁନିୟର ଡିଭିଜନ ମାଜିଷ୍ଟ୍ରେଟ ଭାବରେ ପୋଷ୍ଟିଂ କରାଯାଇଥିଲା। ଏହାପୂର୍ବରୁ ତାଙ୍କୁ ଅଯୋଧ୍ୟା ଜିଲାରେ ପୋଷ୍ଟିଂ କରାଯାଇଥିଲା। ବର୍ତ୍ତମାନ ବିଚାରପତିଙ୍କ ଆତ୍ମହତ୍ୟା ଖବର ଶୁଣି ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି ଏବଂ ପ୍ରଶ୍ନ ଉଠାଉଛନ୍ତି।
ସୋସିଆଲ ମିଡିଆରେ ଏବେ ଏହାକୁ ନେଇ ପ୍ରଶ୍ନ ଉଠିବାରେ ଲାଗିଛି। ଜଣେ ୟୁଜର ଲେଖିଛନ୍ତି ବିଚାର ବ୍ୟବସ୍ଥାରେ ସନ୍ତୁଷ୍ଟ ନ ହୋଇ ଜଣେ ବିଚାରପତି ଆତ୍ମହତ୍ୟା କରିବାକୁ ଅନୁମତି ମାଗିଥିଲେ ଏବଂ ବର୍ତ୍ତମାନ ଜଣେ ବିଚାରପତି ଆତ୍ମହତ୍ୟା କରିଛନ୍ତି, ଦେଶ କେଉଁ ଆଡେ ଯାଉଛି? ଜଣେ ଲେଖିଛନ୍ତି ପିଲାମାନେ ଆତ୍ମହତ୍ୟା କରୁଛନ୍ତି, କୃଷକମାନେ ନିଜ ଜୀବନ ଦେଉଛନ୍ତି, ବର୍ତ୍ତମାନ ବିଚାରପତିମାନେ ମଧ୍ୟ ଆତ୍ମହତ୍ୟା କରୁଛନ୍ତି ଏବଂ ସରକାର ତଥା ଅନୁଷ୍ଠାନଗୁଡ଼ିକ କେବଳ ନିଷ୍କ୍ରିୟ ହୋଇ ବସିଛନ୍ତି।
ଅନ୍ୟ ଜଣେ ୟୁଜର ଲେଖିଛନ୍ତି ବିଚାରପତିଙ୍କ ଆତ୍ମହତ୍ୟା ପ୍ରକୃତରେ ଅତ୍ୟନ୍ତ ଚିନ୍ତାଜନକ, ଏହି ଦିଗରେ ପଦକ୍ଷେପ ନିଆଯିବା ଉଚିତ ଏବଂ ଲୋକଙ୍କୁ ବୁଝାଇବା ପାଇଁ ଉଦ୍ୟମ କରାଯିବା ଆବଶ୍ୟକ।
ମିଳିଥିବା ସୂଚନା ଅନୁଯାୟୀ, ବିଚାରପତିଙ୍କ ସହ ଯୋଗାଯୋଗ ନ କରି କର୍ମଚାରୀମାନେ ଘରେ ପହଞ୍ଚିଥିଲେ। ଯେତେବେଳେ କବାଟ ଖୋଲିଲା ନାହିଁ, ପୋଲିସକୁ ସୂଚନା ଦିଆଯାଇଥିଲା। କବାଟ ଭାଙ୍ଗିବା ପରେ ଜଜଙ୍କ ମୃତଦେହ ଫ୍ୟାନରେ ଝୁଲୁଥିବା ଦେଖିବାକୁ ମିଳିଥିଲା। କୁହାଯାଉଛି ଘରେ କିଛି ଡକ୍ୟୁମେଣ୍ଟ ମଧ୍ୟ ମିଳିଛି। ତେବେ ଏଥିରେ କ’ଣ ଅଛି ସେ ସମ୍ବନ୍ଧରେ ସୂଚନା ପ୍ରକାଶ କରାଯାଇ ନାହିଁ।
