ନୂଆଦିଲ୍ଲୀ,୬।୧୦: ୨୦୨୪ ବିଧାନସଭା ନିର୍ବାଚନର ଦିନ ଯେତିକି ପାଖେଇ ଆସୁଛି, ଶାସକ-ବିରୋଧୀ ଦଳ ମଧ୍ୟରେ ପୋଷ୍ଟର ଓ୍ବାର(ଆକ୍ରମଣ) ବୃଦ୍ଧି ପାଉଛି। ସୋସିଆଲ ମିଡିଆରୁ ଏହା ପ୍ରଥମେ ଆରମ୍ଭ ହୋଇ ପରସ୍ପର ବିରୋଧରେ କଟାକ୍ଷରେ ପହଞ୍ଚୁଛି। ଏହି କ୍ରମରେ କଂଗ୍ରେସ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଅମିତ ଶାହାଙ୍କ ଏକ ଫଟୋ ପୋଷ୍ଟ କରି ‘ସବୁଠାରୁ ବଡ଼ ମିଛୁଆ’ ଏବଂ ‘ଜୁମ୍ଲା ବଏ’ ବୋଲି ଲେଖାଯାଇଥିଲା। ଏହାର ଗୋଟିଏ ଦିନ ପରେ ଭାଜପା ରାହୁଲ ଗାନ୍ଧୀଙ୍କୁ ରାବଣ କହି ତାଙ୍କର ଏକ ପୋଷ୍ଟର ଶେୟାର କରିଛି। ପୋଷ୍ଟରକୁ ନେଇ ଭାଜପା ଉପରେ ଖପ୍ପା ହୋଇଛି କଂଗ୍ରେସ।
ରାହୁଲଙ୍କୁ ରାବଣ ସଜାଇବାର ପୋଷ୍ଟରକୁ ନାପସନ୍ଦ କରି କରି କଂଗ୍ରେସ ନେତା ଜୟରାମ ରମେଶ କହିଛନ୍ତି, ଭାଜପାର ଆଧିକାରୀକ ହ୍ୟାଣ୍ଡେଲରୁ ରାହୁଲଙ୍କୁ ରାବଣ ରୂପରେ ଦେଖାଇଥିବା ଏକ ନୃଶଂସ ଗ୍ରାଫିକ୍ସର ଅସଲ ଉଦ୍ଦେଶ୍ୟ କ’ଣ? ଏହାର ଉଦ୍ଦେଶ୍ୟ କଂଗ୍ରେସ ଏମ୍ପି ତଥା ଦଳର ପୂର୍ବତନ ଅଧ୍ୟକ୍ଷଙ୍କ ବିରୋଧରେ ହିଂସାକୁ ବୃଦ୍ଧି କରିବା ଏବଂ ଉକୁସାଇବା, ଯାହାଙ୍କ ବାପା ଏବଂ ଜେଜେମା’ଙ୍କୁ ହତ୍ୟା କରିଦିଆଯାଇଥିଲା। ସେମାନେ ଏବେ ଭାରତକୁ ବିଭାଜିତ କରିବାକୁ ଚାହୁଁଛନ୍ତି ବୋଲି ଜୟରାମ କହିଛନ୍ତି।
ତେବେ ଟୁଇଟରରେ ଭାଜପା ପୋଷ୍ଟର ଶେୟାର କରି କ୍ୟାପଶନରେ ଭାରତ ବିିପଦରେ-ଏକ କଂଗ୍ରେସ ଦଳ ପ୍ରଡକ୍ସନ। ଜର୍ଜ ସୋରେସଙ୍କ ଦ୍ୱାରା ନିର୍ଦ୍ଦେଶିତ। ଏହି ବ୍ୟକ୍ତିି ନୂଆ ଯୁଗର ରାବଣ। ସେ ଦୁଷ୍ଟ। ଧର୍ମ ବିରୋଧି। ରାମ ବିରୋଧୀ। ତାଙ୍କର ଉଦ୍ଦେଶ୍ୟ ଭାରତକୁ କ୍ଷତି ପହଞ୍ଚାଇବା ବୋଲି ଲେଖିଥିଲା। ଏହାକୁ ନେଇ ଏବେ କଂଗ୍ରେସର ନେତାମାନେ ତିବ୍ର ପ୍ରତିକ୍ରିୟା ଦେଉଛନ୍ତି।
