ମୁମ୍ବାଇ: କ୍ରିକେଟର ବିରାଟ କୋହଲି ଓ ସ୍ତ୍ରୀ ତଥା ଅଭିନେତ୍ରୀ ଅନୁଷ୍କା ଶର୍ମାଙ୍କ ଘରେ ଏବେ ପୁଣିଥରେ ଶିଶୁର କ୍ରନ୍ଦନ ଶୁଣିବାକୁ ମିଳିବ। ଦ୍ୱିତୀୟଥର ପାଇଁ ମା’ ହେବାକୁ ଯାଉଛନ୍ତି ଅନୁଷ୍କା। ସେ ଏବେ ଗର୍ଭବତୀ ଥିବା ନେଇ ଏକ ରିପୋର୍ଟରୁ ଜଣାପଡ଼ିଛି। ଏନେଇ କପଲ ଗର୍ଭକାଳୀନ ସମୟକୁ ଖୁବ୍ ଉପଭୋଗ କରୁଛନ୍ତି। କୁହାଯାଉଛି, ଗତଥର ଭଳି ଏଥର ବି ଶେଷ ମୁହୂର୍ତ୍ତରେ ଦମ୍ପତି ଲୋକଙ୍କ ସହ ଏହି ଖୁସି ଖବର ଶେୟାର କରିବେ। ତେବେ କିଛିଦିନ ତଳେ ଦୁହିଙ୍କୁ ଏକ ମାଟର୍ନିଟି କ୍ଲିନିକ୍ ବାହାରେ ଦେଖିବାକୁ ମିଳିଥିଲା। ଫଳରେ ଅନୁଷ୍କାଙ୍କ ଗର୍ଭଧାରଣ ନେଇ ପ୍ରଶଂସକଙ୍କ ମଧ୍ୟରେ ଉତ୍କଣ୍ଠା ବଢ଼ିଛି। ତେବେ ସେମାନେ ୨୦୧୭ରେ ବିବାହ ବନ୍ଧନରେ ବାନ୍ଧି ହୋଇଥିଲେ। ବିବାହର ୩ ବର୍ଷ ପରେ ୨୦୨୧ରେ ସେମାନଙ୍କର ପ୍ରଥମ ସନ୍ତାନରେ ଏକ ଝିଅ ଜନ୍ମ ହୋଇଥିଲା। ଜନ୍ମଠାରୁ ଏବେ ଯାଏ ଦୁହେଁ ଝିଅକୁ ଲାଇମଲାଇଟ୍ରୁ ଦୂରେଇ ରଖିଛନ୍ତି। ତାଙ୍କ ଦ୍ୱିତୀୟ ଗର୍ଭଧାରଣ ବିଷୟରେ ମଧ୍ୟ ସେମାନେ ଏଯାଏ ଶେୟାର କରିନାହାନ୍ତି। ତେବେ ଅନୁଷ୍କା ୨୦୦୮ରେ ‘ରବ୍ନେ ବନାଦି ଯୋଡ଼ି’ରୁ ତାଙ୍କ ବଲିଉଡ୍ କ୍ୟାରିୟର ଆରମ୍ଭ କରିଥିଲେ। ଶେଷଥର ପାଇଁ ତାଙ୍କୁ ଫିଲ୍ମ କ୍ୱାଲାରେ ଦେଖିବାକୁ ମିଳିଥିଲା। ନିକଟରେ ସେ ତାଙ୍କ ଆଗାମୀ ଫିଲ୍ମ ‘ଚକ୍ଦା ଏକ୍ସପ୍ରେସ୍’ର ଶୁଟିଂ ଶେଷ କରିଛନ୍ତି, ଯେଉଁଥିରେ ସେ ପୂର୍ବତନ କ୍ରିକେଟର ଝୁଲଣ ଗୋସ୍ବାମୀଙ୍କ ଭୂମିକାରେ ନଜରକୁ ଆସିବେ।
