ଶ୍ରୀନଗର,୧୫।୯: ଦକ୍ଷିଣ କ୍ଶ୍ମୀରର ଅନନ୍ତନାଗ ଜିଲାର କୋକରନାଗ ଗଡୁଲ ଜଙ୍ଗଲରେ ଆତଙ୍କବାଦୀଙ୍କ ମୁକାବିଲା କାର୍ଯ୍ୟ କ୍ରମାଗତ ତୃତୀୟ ଦିନ ଜାରି ରହିଛି। ଏହି ସମୟରେ ଏନକାଉଣ୍ଟରରେ ଆହତ ହୋଇଥିବା ଅନ୍ୟ ଜଣେ ଯବାନଙ୍କର ମୃତ୍ୟୁ ଘଟିଛି।
ଅନନ୍ତନାଗରେ ଆତଙ୍କବାଦୀଙ୍କ ବିରୋଧରେ ଅପରେଶନ ଜାରି ରହିଛି। ଦୁଇ ଲଶ୍କର ଆତଙ୍କବାଦୀ ଘେରି ରହିଛନ୍ତି। କ୍ୱାଡକୋପଟର ଏବଂ ଡ୍ରୋନ ଦ୍ୱାରା ଆତଙ୍କବାଦୀଙ୍କୁ ତଦାରଖ କରାଯାଉଛି। ପାରା କମାଣ୍ଡୋମାନେ ମଧ୍ୟ ଏହି ଅପରେଶନ ଦାୟିତ୍ୱ ଗ୍ରହଣ କରିଛନ୍ତି। ଘଞ୍ଚ ଜଙ୍ଗଲ ଏବଂ ପାହାଡ଼ିଆ ଅଞ୍ଚଳ ଯୋଗୁ ଏହି ସ୍ବତନ୍ତ୍ର ସ୍କ୍ବାଡ ନିୟୋଜିତ କରାଯାଇଛି।
ସୂଚନାଯୋଗ୍ୟ, ଅନନ୍ତନାଗର କୋକରନାଗ ଅଞ୍ଚଳରେ ପୋଲିସ ଏବଂ ସେନାର ଏକ ମିଳିତ ଟିମ ସର୍ଚ୍ଚ ଅପରେଶନବେଳେ କର୍ନେଲ ମନପ୍ରୀତ ସିଂ, ମେଜର ଆଶିଷ, ଜମ୍ମୁ କଶ୍ମୀର ପୋଲିସର ଡିଏସପି ହୁମାୟୁଂ ଭଟ୍ଟ ଶହୀଦ ହୋଇଥିଲେ।
