ବଲାଙ୍ଗୀର, ୮ା୮ (ବୀରେନ୍ଦ୍ର କୁମାର ଝାଙ୍କର): ୫-ଟି ସଚିବ ଭି.କେ.ପାଣ୍ଡିଆନଙ୍କ ଦୁଇଦିନିଆ ବଲାଙ୍ଗୀର ଜିଲା ଗସ୍ତ କାର୍ଯ୍ୟକ୍ରମ ସୋମବାର ଶେଷ ହୋଇଛି। ସକାଳେ ବଲାଙ୍ଗୀର ସହରର ସମଲେଶ୍ୱରୀ ମନ୍ଦିର, କୋଶଳ କଳାମଣ୍ଡଳ, ଲୋୟର ସୁକ୍ତେଲ ଜଳସେଚନ ପ୍ରକଳ୍ପ ପରିଦର୍ଶନ ସହ ରାଜେନ୍ଦ୍ର ବିଶ୍ୱବିଦ୍ୟାଳୟ ପଡିଆରେ ମିଶନ ଶକ୍ତି କର୍ମକର୍ତ୍ତାଙ୍କ ସହ ସେ ଆଲୋଚନା କରିଥିଲେ। ଏହା ସହିତ ଜନସାଧାରଣଙ୍କ ସହ ସାକ୍ଷାତ୍, ଲୋଇସିଂହା ବ୍ଳକ ଯୋଗୀସର୍ଡାଠାରେ ୫-ଟି ସ୍କୁଲ, ଶିବମନ୍ଦିର ପରିଦର୍ଶନ, ଲୋଇସିଂହା କଲେଜ ପଡିଆ ଓ ମୁରିବାହାଲ ବ୍ଳକ ଗୁରୁଣ୍ଡାଠାରେ ଜନ ଅଭିଯୋଗ ଶୁଣାଣି କରିଥିଲେ ପାଣ୍ଡିଆନ।
ବଲାଙ୍ଗୀର ରାଜେନ୍ଦ୍ର ବିଶ୍ୱବିଦ୍ୟାଳୟ ଖେଳପଡିଆରେ ମିଶନ ଶକ୍ତି କାର୍ଯ୍ୟକର୍ତ୍ତାଙ୍କୁ ଉଦ୍ବୋଧନ ଦେଇ ୫-ଟି ସଚିବ କହିଥିଲେ ଯେ, ଓଡିଶା ପ୍ରଗତିର ଭବିଷ୍ୟତ ମହିଳାମାନଙ୍କ ହାତରେ ରହିଛି। ୨୦୦୧ ମସିହାରେ ମିଶନ ଶକ୍ତି ଗଠନ ବେଳେ ଯେଉଁ ମହିଳାମାନେ ସାମିଲ ହେଲେ ସେମାନେ ୧୦ ଟଙ୍କା ଲେଖାଏ ସଞ୍ଚୟ କରି ଏବଂ ହାତମୁଠା ଚାଉଳ ସଂଗ୍ରହ କରି ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି) ଗଠନ କରିଥିଲେ। ଆଜି ରାଜ୍ୟରେ ୩ ଲକ୍ଷ ୫୦ ହଜାର ଏସ୍ଏଚ୍ଜି ରହିଛି। ଦିନେ ହାତମୁଠାରେ ଚାଉଳ ସଂଗ୍ରହ କରୁଥିବା ମହିଳାମାନେ ରାଜ୍ୟର ଗୋଟିଏ ବର୍ଷରେ ୧୧ ହଜାର କୋଟି ଋ଼ଣ ନେଉଛନ୍ତି। ଏହି ମହିଳାମାନେ ବିକଶିତ ଓଡ଼ିଶା କରିବାରେ ସହାୟକ ହେଉଛନ୍ତି। ବଲାଙ୍ଗୀରରେ ମିଶନ ଶକ୍ତିର ମହିଳାମାନେ ମିଶନ ଶକ୍ତି ହୋଟେଲ, ପାନ୍ଥନିବାସ, ସ୍କୁଲ, ହଷ୍ଟେଲ, ବସ୍ ଚଳାଉଛନ୍ତି। ଆଗକୁ ଏସ୍ଏଚ୍ଜିରୁ ଏସ୍ଏମ୍ସି ଅଭିଯାନ ଲକ୍ଷ୍ୟ ରଖାଯାଇଛି। ଏହା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏକ ସ୍ବପ୍ନର ପ୍ରକଳ୍ପ। ଆଶା, ଅଙ୍ଗନୱାଡି କର୍ମୀଙ୍କ ଦରମା ବାବଦରେ ଖୁବ୍ଶୀଘ୍ର ମୁଖ୍ୟମନ୍ତ୍ରୀ ଖୁସି ଖବର ଶୁଣାଇବେ ବୋଲି କହିଥିଲେ। ସେଠାରେ ସେ କିଛି କୃତୀ ଛାତ୍ର, କୃଷକ, ଆଶା ଓ ଅଙ୍ଗନୱାଡି କର୍ମୀଙ୍କୁ ଭେଟି ପ୍ରଶଂସା କରିଥିଲେ।
ସକାଳ ସାଢ଼େ ୭ଟାରେ ୫-ଟି ସଚିବ ବଲାଙ୍ଗୀର ସମଲେଶ୍ୱରୀ ମନ୍ଦିର ପରିଦର୍ଶନରେ ଯାଇଥିଲେ। ପାଟଣା ହୋଟେଲ ଛକଠାରେ ଜିଲା କଂଗ୍ରେସ ସଭାପତି ଦିଲୀପ ବେହେରାଙ୍କ ନେତୃତ୍ୱରେ ବହୁ କଂଗ୍ରେସ କର୍ମୀ ୫-ଟି ସଚିବଙ୍କୁ ବିରୋଧ କରିବାକୁ ରୁଣ୍ଡ ହୋଇଥିଲେ। ଏହି ସୂଚନା ପାଇବା ପରେ ରୁଟ୍ ପରିବର୍ତ୍ତନ କରାଯାଇ ତାଙ୍କୁ ଅନ୍ୟ ରାସ୍ତାରେ ସମଲେଶ୍ୱରୀ ମନ୍ଦିର ନିଆଯାଇଥିଲା।
