ନୂଆଦିଲ୍ଲୀ,୧।୭ : ୟୁନିଫର୍ମ ସିଭିଲ କୋଡ (ୟୁସିସି) ସମ୍ବନ୍ଧରେ ଆଇନ ଆୟୋଗ ଲୋକ ତଥା ଧାର୍ମିକ ସଂଗଠନର ମତାମତ ଲୋଡିଛନ୍ତି। ୟୁନିଫର୍ମ ସିଭିଲ କୋଡ ସମ୍ବନ୍ଧରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଇଥିବା ବିବୃତ୍ତି ପରେ ଶାସକ ଏବଂ ବିରୋଧିଙ୍କ ମଧ୍ୟରେ ବାକଯୁଦ୍ଧ ଆରମ୍ଭ ମଧ୍ୟ ହୋଇଥିଲା। ତେବେ ଶନିବାର ଭାଜପାନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ମୁକ୍ତାର୍ ଅବ୍ବାସ ନକଭି କହିଛନ୍ତି ୟୁସିସି କାର୍ଯ୍ୟକାରୀ କରିବା ପାଇଁ ଏହା ହେଉଛି ଉପଯୁକ୍ତ ସମୟ।
କଂଗ୍ରେସ ସମେତ ଅନ୍ୟ ବିରୋଧୀ ଦଳକୁ ଟାର୍ଗେଟ କରି ନକଭି କହିଛନ୍ତି ସେମାନେ ସେମାନଙ୍କର ବିବେକକୁ ଶୁଣିବା ଏବଂ ସାମ୍ପ୍ରଦାୟିକ ରାଜନୀତିଠାରୁ ଦୂରରେ ରହିବା ଉଚିିତ। ଏହି ସଂସ୍କାରକୁ କାର୍ଯ୍ୟକାରୀ କରିବା ପାଇଁ ଏହା ହେଉଛି ସଠିକ ସମୟ। ଏବେ ନୁହେଁ ତ କେବେ ନୁହେଁ। ଏହା ବର୍ତ୍ତମାନ କାର୍ଯ୍ୟକାରୀ ନହେଲେ ଆଊ କେବେ ବି କାର୍ଯ୍ୟକାରୀ ହୋଇ ପାରିବ ନାହିଁ।
ୟୁସିସି ସମସ୍ତଙ୍କ ପାଇଁ ସମାନତା ଏବଂ ନ୍ୟାୟ ନିଶ୍ଚିତ କରିବ। ୟୁସିସି ଏକ ସାଧାରଣ ନିୟମକୁ ବୁଝାଏ ଯାହା ଦେଶର ସମସ୍ତ ନାଗରିକଙ୍କ ପାଇଁ ପ୍ରଯୁଜ୍ୟ ଏବଂ ବିବାହ, ଛାଡପତ୍ର, ଉତ୍ତରାଧିକାରୀ ଓ ପୋଷ୍ୟ ସନ୍ତାନ ସମେତ ବ୍ୟକ୍ତିଗତ ମାମଲାଗୁଡ଼ିକର ମୁକାବିଲା କରିବାରେ ଧର୍ମ ଉପରେ ଆଧାରିତ ହେବ ନାହିଁ।
ୟୁସିସିର ଉଦ୍ଦେଶ୍ୟ ହେଉଛି ଦେଶକୁ ସାମ୍ପ୍ରଦାୟିକ ଷଡଯନ୍ତ୍ରକାରୀଙ୍କ କବଳରୁ ମୁକ୍ତ କରିବା, ଯେଉଁମାନେ ଗତ ସାତ ଦଶନ୍ଧି ଧରି ଏହାକୁ ସଂକୀର୍ଣ୍ଣ ମାନସିକତା ଏବଂ ସ୍ବାର୍ଥପରତା ପାଇଁ ବନ୍ଧକ ରଖିଥିଲେ।
ବିରୋଧୀ ଦଳକୁ ସମାଲୋଚନା କରି ନକଭି କହିଛନ୍ତି ୟୁସିସି ଭଳି ପ୍ରଗତିଶୀଳ ଆଇନ ସମ୍ବନ୍ଧରେ ସାମ୍ପ୍ରଦାୟିକ ରାଜନୀତିର ଏକମାତ୍ର ଉପଯୁକ୍ତ ଉତ୍ତର ହେଉଛି ବିବେକର ସ୍ବର ଶୁଣିବା। ୟୁସିସି ସମସ୍ତଙ୍କ ପାଇଁ ସମାନତା ଏବଂ ନ୍ୟାୟ ନିଶ୍ଚିତ କରିବ। ସେ କହିଛନ୍ତି କଂଗ୍ରେସର ସାମ୍ପ୍ରଦାୟିକ ଦ୍ୱନ୍ଦ୍ୱ ଏବଂ ୟୁସିସି ଉପରେ ଥିବା ପ୍ରତିବାଦକୁ ହଟାଇବା ପାଇଁ ବିରୋଧୀ ଦଳ ସେମାନଙ୍କ ବିବେକ ଶୁଣିବା ଉଚିତ।
ନକଭି ଅଭିଯୋଗ କରିଛନ୍ତି ୧୯୮୫ ରେ କଂଗ୍ରେସ ଦ୍ୱାରା କରାଯାଇଥିବା କ୍ଷଣିକ ଭୁଲ ଯୋଗୁ ଦେଶ ଏକ ଦଶନ୍ଧି ଧରି ଦଣ୍ଡିତ ହୋଇଥିଲ। ଶାହା ବାନୋ ମାମଲାରେ ସଂସ୍କାର ଉପରେ ସାମ୍ପ୍ରଦାୟିକ ଆକ୍ରମଣ ପାଇଁ ଦଳ ସଂସଦରେ ଏହାର ସଂଖ୍ୟାଗରିଷ୍ଠତା ବ୍ୟବହାର କରିଥିଲା। ଏବେ ସଂସ୍କାର ଆଣିବା ପରିବର୍ତ୍ତେ କଂଗ୍ରେସ ପୁଣି ଥରେ ସମାନ ଭୁଲର ପୁନରାବୃତ୍ତି କରୁଛି।
