ସମ୍ବଲପୁର,୨୭ା୬(ଶୁଭାଶିଷ ପାଢୀ): ସମ୍ବଲପୁର ଗଙ୍ଗାଧର ମେହେର ବିଶ୍ୱବିଦ୍ୟାଳୟ (ଜିଏମ୍ୟୁ)ର ଅତ୍ୟାଧୁନିକ ଅଡିଟୋରିୟମ କାର୍ଯ୍ୟ ପ୍ରାୟ ଏକବର୍ଷ ହେବ ସମ୍ପୂର୍ଣ୍ଣ ହୋଇଛି। ହେଲେ ଏହା ଲୋକାର୍ପଣ ହୋଇ ନ ଥିବାରୁ ବ୍ୟବହାରରେ ଆସିପାରୁ ନାହିଁ। କାମ ସରିବା ପରେ ମଧ୍ୟ ଜିଏମ୍ୟୁକୁ ଅଡିଟୋରିୟମ ହସ୍ତାନ୍ତର କରାଯାଉ ନାହିଁ। ଜିଲାର ଅନ୍ୟାନ୍ୟ ପ୍ରକଳ୍ପ ଲୋକାର୍ପଣ ଓ ଶିଳାନ୍ୟାସ ଦିନରେ ଏହାକୁ ଲୋକାପର୍ଣ କରାଯିବ ଏବଂ ପରେ ହସ୍ତାନ୍ତର କରାଯିବ ବୋଲି ଆଲୋଚନା ହେଉଛି। ଅନ୍ୟପକ୍ଷରେ ରାଜନୈତିକ ଉଦ୍ଦେଶ୍ୟ ରଖି ଏହାକୁ ବ୍ୟବହାର କରାଯାଉ ନ ଥିବା ଅଭିଯୋଗ ହେଉଛି। ଏହାକୁ ନେଇ ଶିକ୍ଷାବିତ୍ ଓ ଅଭିଭାବକ ଅସନ୍ତୋଷ ବ୍ୟକ୍ତ କରିଛନ୍ତି।
ଅଡିଟୋରିୟମ ନିର୍ମାଣ ଶେଷ ପରେ ଲୋକାର୍ପଣ କରାଯାଉ ନ ଥିବାରୁ ଜିଏମ୍ୟୁରେ ଆୟୋଜିତ ସଭାସମିତି ବା ସେମିନାର ଆୟୋଜନ କରିବାରେ ବହୁତ ସମସ୍ୟା ହେଉଛି। ବିଶ୍ୱବିଦ୍ୟାଳୟରେ ପୂର୍ବରୁ ଥିବା ଅଡିଟୋରିୟମ ଛୋଟ ରହିଛି। ଏଥିରେ ମାତ୍ର ୩୦୦ରୁ ୩୫୦ ଅଂଶଗ୍ରହଣକାରୀଙ୍କୁ ସ୍ଥାନିତ କରିବାର କ୍ଷମତା ରହିଛି। ତେଣୁ ବଡ କାର୍ଯ୍ୟକ୍ରମ ପାଇଁ ଖୋଲା ପଡିଆ ବ୍ୟବହାର କରାଯାଉଛି। ଏଥିରେ ଅସ୍ଥାୟୀ ଟେଣ୍ଟ ଓ ଅନ୍ୟାନ୍ୟ ସାମଗ୍ରୀ ବାବଦରେ ଖର୍ଚ୍ଚାନ୍ତ ହେବାକୁ ପଡୁଛି। ଗତ ଏପ୍ରିଲରେ ଗ୍ରୀଷ୍ମପ୍ରବାହ ସମୟରେ ସମାବର୍ତ୍ତନ ଉତ୍ସବ ଟେଣ୍ଟ ଲଗାଇ କରାଯାଇଥିଲା। ଏହାକୁ ଦୃଷ୍ଟିରେ ରଖି ଶୀଘ୍ର ଅଡିଟୋରିୟମ ଲୋକାର୍ପଣ କରିବାକୁ ବିଭିନ୍ନ ମହଲରେ ଦାବି ହେଉଛି। ଏ ସମ୍ପର୍କରେ ଜିଏମ୍ୟୁ କୁଳପତି ପ୍ରଫେସର ଏନ୍ ନାଗାରାଜୁ କହିଛନ୍ତି, ଏହି ପ୍ରକଳ୍ପ ଶେଷ କରିବାକୁ ୬ବର୍ଷ ସମୟ ଲାଗିଛି। ବହୁ ବିଳମ୍ବ ହେଲେ ମଧ୍ୟ ଅଡିଟୋରିୟମ ନିର୍ମାଣ କାମ ସରିଛି। ପୂର୍ତ୍ତ ବିଭାଗ ପକ୍ଷରୁ କାମ କରାଯାଇଥିଲା। ହେଲେ ଏବେ ଅଡିଟୋରିୟମ ଜିଏମ୍ୟୁକୁ ହସ୍ତାନ୍ତର କରାଯାଇ ନାହିଁ। ଏହାକୁ ଉଦ୍ଘାଟନ କରି ଶୀଘ୍ର ହସ୍ତାନ୍ତର କରିବାକୁ ଅନେକଥର ଅନୁରୋଧ କରାଯାଇଛି। ହେଲେ କୌଣସି ସୁଫଳ ମିଳିପାରି ନାହିଁ ବୋଲି ସେ କହିଥିଲେ। ସୂଚନାଯୋଗ୍ୟ, ୨୦୧୭ରେ ଅଡିଟୋରିୟମ ପାଇଁ ମୂଳଦୁଆ ପକାଯାଇଥିଲା। ହେଲେ ପ୍ରକଳ୍ପ କାର୍ଯ୍ୟ ୨୦୧୯ ମସିହା ମେ ମାସରେ ଆରମ୍ଭ ହୋଇଥିଲା। ୧୮ମାସ ମଧ୍ୟରେ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ୨୦,୬୧୧ ବର୍ଗଫୁଟ ଅଞ୍ଚଳରେ ଅତ୍ୟାଧୁନିକ ଅଡିଟୋରିୟମ ରହିଛି। ସମୁଦାୟ କ୍ଷେତ୍ର ମଧ୍ୟରୁ ପ୍ରାୟ ୧୫,୦୦୦ ବର୍ଗଫୁଟ ପାର୍କିଂ ପାଇଁ ବ୍ୟବହୃତ ହେବ। ଏହି ପ୍ରକଳ୍ପର ଆନୁମାନିକ ମୂଲ୍ୟ ୧୦.୫ କୋଟି ଟଙ୍କା ରହିଛି। ୧୨୦୦ ସିଟ୍ ବିଶିଷ୍ଟ ଅଡିଟୋରିୟମ୍ କେନ୍ଦ୍ରୀୟ ଶୀତତାପ ନିୟନ୍ତ୍ରିତ ଓ ଉନ୍ନତ ଧ୍ୱନି ପ୍ରଣାଳୀ ରହିଛି ା
