ବେଙ୍ଗାଲୁରୁ, ୭।୬: କର୍ନାଟକ ବିଧାନ ପରିଷଦର ୩ଟି ଆସନ ପାଇଁ ନିର୍ବାଚନ ଆୟୋଗ ମଙ୍ଗଳବାର ତାରିଖ ଘୋଷଣା କରିଛନ୍ତି। ଏହି ଆସନଗୁଡିକ ପାଇଁ ଜୁନ ୩୦ରେ ମତଦାନ ଅନୁଷ୍ଠିତ ହେବ ଏବଂ ଫଳାଫଳ ସେହି ଦିନ ବାହାରିବ।
ଜୁନ ମାସରେ ବିଧାନ ପରିଷଦର ୩ ଜଣ ସଦସ୍ୟଙ୍କ କାର୍ଯ୍ୟକାଳ ଶେଷ ହେବାକୁ ଯାଉଛି। ସାବାଡି ଲକ୍ଷ୍ମଣ ଓ ବାବୁରାଓ ସିଙ୍କ କାର୍ଯ୍ୟକାଳ ଯଥାକ୍ରମେ ଜୁନ ୧୪ ଏବଂ ଜୁନ ୧୭ରେ ଶେଷ ହେବ। ଉଭୟ ନିକଟରେ ଶେଷ ହୋଇଥିବା ବିଧାନସଭା ନିର୍ବାଚନରେ ମଧ୍ୟ ଜିତିଥିଲେ। ସେହିପରି ଆର ଶଙ୍କରଙ୍କ କାର୍ଯ୍ୟକାଳ ଜୁନ ୩୦ରେ ଶେଷ ହେବାକୁ ଯାଉଛି। ଏହି ୩ ଆସନ ଖାଲି ପଡିବାକୁ ଯାଉଥିବାରୁ ନିର୍ବାଚନ ଆୟୋଗ ମତଦାନ ପାଇଁ ତାରିଖ ଘୋଷଣା କରିଛନ୍ତି।
ସୂଚନାନୁଯାୟୀ, ଜୁନ ୧୩ରେ ବିଜ୍ଞପ୍ତି ଜାରି କରାଯିବ। ନାମାଙ୍କନପତ୍ର ଦାଖଲ କରିବାର ଶେଷ ତାରିଖ ହେଉଛି ଜୁନ ୨୦ ଥିବା ବେଳେ ନାମାଙ୍କନପତ୍ର ଗୁଡିକ ଜୁନ ୨୧ରେ ଯାଞ୍ଚ ହେବ। ସେହିପରି ନାମାଙ୍କନପତ୍ର ପ୍ରତ୍ୟାହାର ପାଇଁ ଶେଷ ତାରିଖ ଜୁନ ୨୩ ରହିଛି।
