ଭୁବନେଶ୍ୱର,୨୩।୪: ଓଡ଼ିଶା ପୋଷ୍ଟର ମିଳିତ ଆନୁକୂଲ୍ୟରେ ଆୟୋଜିତ ବହୁପ୍ରତୀକ୍ଷିତ ବିଜନେସ୍ ଏମିନେସ୍ସ ଆୱାଡର୍ସ-୨୦୨୬- ଷଷ୍ଠ ସଂସ୍କରଣ ଗୁରୁବାର ଭୁବନେଶ୍ୱରର ହୋଟେଲ ସ୍ବସ୍ତି ପ୍ରିମିୟମରେ ଅନୁଷ୍ଠିତ ହୋଇଯାଇଛି। ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ଶିଳ୍ପ, ଦକ୍ଷତା ବିକାଶ ତଥା ବୈଷୟିକ ଶିକ୍ଷା ମନ୍ତ୍ରୀ ସମ୍ପଦ ଚନ୍ଦ୍ର ସ୍ବାଇଁ ଯୋଗ ଦେଇଛନ୍ତି। ଏହି ଅବସରରେ ମନ୍ତ୍ରୀ ସମ୍ପଦ ଚନ୍ଦ୍ର ସ୍ବାଇଁ ତାଙ୍କ ଅଭିଭାଷଣରେ କହିଛନ୍ତି, ଧରିତ୍ରୀ ଏବଂ ଓଡ଼ିଶା ପୋଷ୍ଟ ତରଫରୁ ହୋଇଥିବା ବିଜ୍ନେସ ଏମିନେସ୍ସ ଆୱାଡର୍ସ-୨୦୨୬ର ଷଷ୍ଠ ସଂସ୍କରଣରେ ଆଜି ମଞ୍ଚରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଧରିତ୍ରୀ ଏବଂ ଓଡ଼ିଶା ପୋଷ୍ଟର ସମ୍ପାଦକ ତଥା ପୂର୍ବତନ ଏମ୍ପି ତଥାଗତ ସତପଥୀ ଏବଂ ଧରିତ୍ରୀ ଏବଂ ଓଡ଼ିଶା ପୋଷ୍ଟର ସିଇଓ ଆଦ୍ୟାଶା ସତପଥୀ ଏବଂ ଏଠାରେ ଉପସ୍ଥିତ ଥିବା ଉଦ୍ୟୋଗୀ ଏବଂ ଯେଉଁମାନେ ପୁରସ୍କୃତ ହେବେ ସମସ୍ତଙ୍କୁ ଶୁଭେଚ୍ଛା ଓ ଅଭିନନ୍ଦନ। ସମସ୍ତ ବିଜ୍ନେସ ଲିଡର, ଉଦ୍ୟୋଗୀ ଏବଂ ବିଶିଷ୍ଟ ବ୍ୟକ୍ତି ବିଶେଷଙ୍କ ଗହଣରେ ଉପସ୍ଥିତ ରହିବା ମୋ ପାଇଁ ସୌଭାଗ୍ୟର ବିଷୟ । ଆଜି ଏହି ମଞ୍ଚ କେବଳ ପୁରସ୍କାର ବିତରଣର ମଞ୍ଚ ନୁହେଁ। ଏହି ମଞ୍ଚ ହେଉଛି ଓଡ଼ିଶାର ଆର୍ଥିକ ଅଭିବୃଦ୍ଧିରେ ଯେଉଁମାନଙ୍କର ପ୍ରମୁଖ ଯୋଗଦାନ ରହୁଛି, ସେମାନଙ୍କୁ ଏକତ୍ରିତ କରି, ଆହୁରି କେମିତି ଆଗକୁ ବଢିବେ, ଭବିଷ୍ୟତରେ ସେମାନଙ୍କର ବ୍ୟବସାୟକୁ ବୃଦ୍ଧି କରିବା ସହିତ ଆହୁରି ଭଲଭାବରେ ନିଜକୁ କିପରି ପ୍ରତିବାଦିତ କରିବେ, ତାଙ୍କୁ ଉତ୍ସାହିତ କରିବାର ଏହା ଏକ ମଞ୍ଚ। ତେଣୁ ଧନ୍ୟବାଦ ଜ୍ଞାପନ କରିବାକୁ ଚାହୁଁଛି ଧରିତ୍ରୀ ଏବଂ ଓଡ଼ିଶା ପୋଷ୍ଟର ସମସ୍ତ ସଦସ୍ୟମାନଙ୍କୁ, ଏହି ଭଳି ଅଭିନବ କାର୍ଯ୍ୟକ୍ରମ ମାଧ୍ୟମରେ ସେମାନଙ୍କୁ ଉତ୍ସାହନ କରୁଥିବାରୁ ।
କରୋନା ସମୟରେ ଯେତେବେଳେ ସାରା ବିଶ୍ୱ ଧ୍ୱଂସ ବିଧ୍ୱସ୍ତ ଅବସ୍ଥାରେ ଥିଲା। ବ୍ୟବସାୟଙ୍କ ପାଖରୁ ଆରମ୍ଭ କରି ବିଭିନ୍ନ ବର୍ଗର ଲୋକମାନେ ଯେତେବେଳେ ଅସୁବିଧାର ସାମ୍ନା କରୁଥିଲେ, ସେ ସମୟରେ ସେମାନଙ୍କୁ ଉତ୍ସାହିତ କରିବାକୁ ଯେଉଁ ସୁନ୍ଦର କାର୍ଯ୍ୟକ୍ରମ ଆୟୋଜିତ କରାଯାଇଛି। ଏହା ଏକ ପ୍ରଶଂସନୀୟ । ଭାରତ କିପରି ଆତ୍ମନିର୍ଭରଶୀଳ ହେବ ଆମେ କରୋନା ସମୟରେ ଶିଖିଲେ। ପ୍ରଧାନମନ୍ତ୍ରୀଙ୍କ ଦୃଢ ନେତୃତ୍ୱ ବଳରେ ଆମେ ସେତେବେଳେ ବିଭିନ୍ନ ପ୍ରକାରେ ଟିକାରୁ ଆରମ୍ଭ କରି ବିଭିନ୍ନ ଆବଶ୍ୟକୀୟ ଜିନିଷ ଭାରତ ନିଜେ କରିଛି। ନିଜର ଆବଶ୍ୟକତାକୁ ପୂରଣ କରି ସାରା ବିଶ୍ୱର ଆବଶ୍ୟକତାକୁ ପୂରା କରିବାରେ ମଧ୍ୟ ସଫଳ ହୋଇଥିଲା। ସେହି ସଙ୍କଟ ସମୟରେ ଧରିତ୍ରୀ ଏବଂ ଓଡ଼ିଶା ପୋଷ୍ଟ ପକ୍ଷରୁ ମଧ୍ୟ ଆମ ରାଜ୍ୟରେ ଥିବା ଉଦ୍ୟୋଗୀମାନଙ୍କୁ କିପରି ଆଗକୁ ବଢିବେ, ସେ ପାଇଁ ଏହି ସୁନ୍ଦର କାର୍ଯ୍ୟକ୍ରମ କରାଯାଇଥିଲା। ଯାହା ବେଶ୍ ପ୍ରଶଂସନୀୟ। ଏହା ସହିତ ବିଜ୍ନେସ ଏମିନେସ୍ସ ଆୱାଡର୍ସ ଷଷ୍ଠ ସଂସ୍କରଣରେ ପହଞ୍ଚିବା ଆମ ପାଇଁ ଏକ ସଫଳତା।
ଗଣମାଧ୍ୟମ ହେଉଛି ଗଣତନ୍ତ୍ରର ଚତୁର୍ଥ ସ୍ତମ୍ଭ। ସବୁବେଳେ ରାଜ୍ୟର ଅର୍ଥନୀତିକୁ ଆଗକୁ ନେବା ସହ ଶାସନ ପ୍ରକ୍ରିୟାକୁ ଲୋକାଭିମୁଖୀ କରିବାରେ ଗଣମାଧ୍ୟମ ଗୁରୁତ୍ୱପୂର୍ଣ୍ଣ ଭୂମିକା ଲିଭାନ୍ତି। ଧରିତ୍ରୀ ମଧ୍ୟ ସେଥିରେ ମଧ୍ୟ ପ୍ରମୁଖ ଭାବରେ ଆଜି ଓଡ଼ିଶାରେ ନିଜକୁ ପ୍ରତିଷ୍ଠିତ କରିପାରିଛି। ଯେତେବେଳେ ଗଣମାଧ୍ୟମ ଜାଗ୍ରତ ହେବ, ସେତେବେଳେ ନିଶ୍ଚିତ ଭାବରେ ସମାଜରେ ପରିବର୍ତ୍ତନ ହେବ। ବିଭିନ୍ନ ସମୟରେ ବି ଉଦାହରଣ ଅଛି ବଡ଼ ବଡ଼ ପରିବର୍ତ୍ତନରେ ଗଣମାଧ୍ୟମ ହିଁ ପ୍ରମୁଖ ଭୂମିକା ଲିଭାଇଥାନ୍ତି।
ବିଜ୍ନେସ ଏପରି ଏକ କ୍ଷେତ୍ର ଯେଉଁଠି ଉଦ୍ୟୋଗୀମାନଙ୍କର ସ୍ବାଧୀନତା ରହିଥାଏ। ଆଜି ଏଠାରେ ଉପସ୍ଥିତ ଥିବା ବିଜ୍ନେସ ଲିଡର ବିଜ୍ନେସ ଲିଡର ନୁହନ୍ତି ଏମାନଙ୍କୁ ସୋସିଆଲ ଲିଡର ମଧ୍ୟ କହିପାରିବା। ଏମାନଙ୍କ ପାଇଁ ଆଜି ବହୁ ପରିବାର ପ୍ରତିପୋଷଣ ହେଉଛି। ନିଶ୍ଚିତ ଭାବେ ବିଜ୍ନେସ ଲିଡରମାନଙ୍କୁ ମଧ୍ୟ ସୋସିଆଲ ଲିଡର କହିପାରିବା କାରଣ ତାଙ୍କ ଦ୍ୱାରା ସମାଜରେ ମଧ୍ୟ ପରିବର୍ତ୍ତନ ଆସିଥାଏ ବୋଲି ମନ୍ତ୍ରୀ କହିଛନ୍ତି।
