ଭୁବନେଶ୍ୱର,୧।୬(ବ୍ୟୁରୋ): ବିଟ୍ କଏନରେ ଟଙ୍କା ବିନିଯୋଗ କରି ବହୁଗୁଣା ଲାଭର ଲୋଭ ଦେଖାଇ ଜଣେ ବ୍ୟକ୍ତିଙ୍କଠାରୁ ୧୪ ଲକ୍ଷ ଠକିବା ଅଭିଯୋଗରେ ସାଇବର ଥାନା ପୋଲିସ ଏକ ର଼୍ୟାକେଟର ୪ଜଣଙ୍କୁ ଗିରଫ କରିଛି। ସେମାନେ ହେଲେ ବାଲେଶ୍ୱରର ମୁଖ୍ୟ ଅଭିଯୁକ୍ତ ବିଜନ କୁମାର ପଣ୍ଡା, ସପନ କୁମାର ଦଳେଇ, ଆକ୍ସିସ ବ୍ୟାଙ୍କର ସେଲ୍ସ ମ୍ୟାନେଜର ସୁନୀଲ କୁମାର ଦାସ ଓ ଅନ୍ୟ ଜଣେ ହେଲେ ବିବେକାନନ୍ଦ ମଲ୍ଲିକ। ଏମାନଙ୍କଠାରୁ ୧୦ଟି ଏଟିଏମ୍ କାର୍ଡ, ୫ ବ୍ୟାଙ୍କ ପାସ୍ବୁକ୍, ୪ ମୋବାଇନ ଫୋନ, ଗୋଟିଏ ଲାପ୍ଟପ୍, ୭ ଚେକ୍ବୁକ୍ ଓ ଗୋଟିଏ ଜିଓ ସିମ୍ ଜବତ ହୋଇଛି। ସେହିପରି ଅଭିଯୁକ୍ତଙ୍କ ଆକାଉଣ୍ଟରେ ଥିବା ୩୨ ଲକ୍ଷ ଟଙ୍କା ଫ୍ରିଜ୍ କରିଛି ପୋଲିସ। ସୁନୀଲ ଲୋକଙ୍କ ନାମରେ ଫେକ୍ ଆକାଉଣ୍ଟ ଖୋଲିଥିବାବେଳେ ସପନ ଓ ବିବେକାନନ୍ଦ ବ୍ୟାଙ୍କ ଆକାଉଣ୍ଟ ଖୋଲିବା ପାଇଁ ଲୋକଙ୍କୁ ପ୍ରବର୍ତ୍ତାଇବା ଏବଂ ବିଜନ ଫେକ୍ ଟେଲିଗ୍ରାମ ଅପରେଟ୍ କରୁଥିବା ପୋଲିସ ତଦନ୍ତ ବେଳେ ଜାଣିବାକୁ ପାଇଛି।
ଚିନ୍ତାମଣିଶ୍ୱର ଅଞ୍ଚଳର ପ୍ରମୋଦ ସାହୁଙ୍କ ହ୍ବାଟ୍ସଆପ୍କୁ ଏକ ଲିଙ୍କ୍ ଆସିଥିଲା। ଏହାପରେ ପ୍ରମୋଦ ଯୋଗାଯୋଗ କରିବାରୁ ସାଇବର ଠକମାନେ ଟଙ୍କା ବିନିଯୋଗ କରିବାକୁ ଲୋଭ ଦେଖାଇଥିଲେ। ପ୍ରଥମେ ପ୍ରମୋଦ ୧ ହଜାର ଟଙ୍କା ତା’ପରେ ବିଭିନ୍ନ ପର୍ଯ୍ୟାୟରେ ୫୦ ହଜାର ଟଙ୍କା ବିନିଯୋଗ କରି ୬୦ ହଜାର ଟଙ୍କା ଫେରସ୍ତ ପାଇଥିଲେ। ଏହାପରେ ପ୍ରମୋଦଙ୍କୁ ସାଇବର ଠକମାନେ ବିଟ୍ କଏନରେ ବିନିଯୋଗ କରିବାକୁ ପ୍ରବର୍ତ୍ତାଇବାରୁ ଲୋଭରେ ପଡ଼ି ପ୍ରମୋଦ ବିଟ୍ କଏନ ସାଇଟରେ ଆକାଉଣ୍ଟ ଖୋଲିବା ପାଇଁ ଆଧାର ଓ ପ୍ୟାନ ଭଳି ସମସ୍ତ ପ୍ରମାଣପତ୍ର ଦେଇଥିଲେ। ଏହାପରେ ପ୍ରମୋଦ ସେଥିରେ ୫ ଲକ୍ଷ ଟଙ୍କା ବିନିଯୋଗ କରିଥିଲେ। ସାଇବର ଠକମାନେ ବିଶ୍ୱାସ ଜନ୍ମାଇବା ପାଇଁ ତାଙ୍କ ପାଖକୁ ଏକ ସ୍କ୍ରିନ୍ ଶଟ୍ ପଠାଇଥିଲେ, ଯେଉଁଥିରେ ଲାଭ ହୋଇଥିବା ୨ ଲକ୍ଷ ଟଙ୍କା ତାଙ୍କ ଆକାଉଣ୍ଟକୁ ଟ୍ରାନ୍ସଫର୍ ହୋଇଥିବା ଉଲ୍ଲେଖ ଥିଲା। ଯେତେବେଳେ ପ୍ରମୋଦ ବିନିଯୋଗ କରିଥିବା ୫ଲକ୍ଷ ଓ ପାଇଥିବା ୨ ଲକ୍ଷ ମୋଟ ୭ ଲକ୍ଷ ଟଙ୍କା ଉଠାଇବାକୁ ଚାହୁଁଥିଲେ ସେତେବେଳେ ସେ ସଫଳ ହୋଇପାରି ନ ଥିଲେ। ତେଣୁ ସେ ଟେଲିଗ୍ରାମ ଆପ୍ରେ ଥିବା ଠକଙ୍କ ସହ ଯୋଗାଯୋଗ କରିଥିଲେ। ସାଇବର ଠକ ଜଣକ ତାଙ୍କୁ ଆଉ ୨.୫ ଲକ୍ଷ ଟଙ୍କା ଜମା କରି ସମସ୍ତ ଟଙ୍କା ଫେରସ୍ତ ପାଇବାକୁ ପରାମର୍ଶ ଦେଇଥିଲେ। ଏହାପରେ ସେ ତାହା ଜମା କରିଥିଲେ ମଧ୍ୟ କିଛି ବି ଟଙ୍କା ପାଇ ନ ଥିଲେ। ପୁନର୍ବାର ଯୋଗାଯୋଗ କରିବାରୁ ସେ ଅଧିକ ଟଙ୍କା ହୋଇଥିବାରୁ ଜିଏସ୍ଟି ବାବଦକୁ ୪.୫୩ ଲକ୍ଷ ଜମା କରିବାକୁ କହିଥିଲେ। ଏହିଭଳି ପ୍ରମୋଦ ୧୪ ଲକ୍ଷ ଟଙ୍କା ଜମା କରି ଠକେଇର ଶିକାର ହୋଇଥିବା ଜାଣିବା ପରେ ସାଇବର ଥାନାରେ ଅଭିଯୋଗ କରିଥିଲେ।
