ନୂଆଦିଲ୍ଲୀ, ୧୦ା୫: ପାକିସ୍ତାନକୁ ଗୁପ୍ତ ତଥ୍ୟ ଯୋଗାଉଥିବା ଅଭିଯୋଗରେ ଗତ ୩ ତାରିଖରେ ପୁଣେରୁ ଗିରଫ ହୋଇଥିବା ଡିଆର୍ଡିଓ ବୈଜ୍ଞାନିକ ପ୍ରଦୀପ କୁରୁଲ୍କର(୫୯)ଙ୍କ ହାଜତ ମିଆଦକୁ ମେ’ ୧୫ ପର୍ଯ୍ୟନ୍ତ ବଢ଼ାଇ ଦିଆଯାଇଛି। ନଭେମ୍ବରରେ ଅବସର ନେବାକୁ ଥିବା ପ୍ରଦୀପ ହନିଟ୍ରାପ୍ରେ ଫସି କେତେଜଣ ପାକିସ୍ତାନୀଙ୍କ ସହ ଯୋଗାଯୋଗରେ ଥିଲେ ବୋଲି ଅଭିଯୋଗ ହୋଇଛି। ଅତିରିକ୍ତ ସେସନ୍ସ ଜଜ୍ ଏସ୍.ଆର୍. ନଭନ୍ଦରଙ୍କ ଅଦାଲତ ପ୍ରଦୀପଙ୍କ ହାଜତ ମିଆଦକୁ ୭ ଦିନ ବଢ଼ାଇଛନ୍ତି। ତାଙ୍କୁ ମହାରାଷ୍ଟ୍ର ଆଣ୍ଟି ଟେରୋରିଜମ୍ ସ୍କ୍ବାଡ୍ ହାଜତରେ ରଖାଯାଇଛି। ତାଙ୍କଠାରୁ ଜବତ ହୋଇଥିବା ଇଲେକ୍ଟ୍ରୋନିକ୍ ଉପକରଣର ତଥ୍ୟ ଅନୁଶୀଳନ କରାଯାଉଥିବାରୁ ଅଧିକ ଦିନ ହାଜତରେ ରଖିବା ଲାଗି ଏଟିଏସ୍ ପକ୍ଷରୁ କୋର୍ଟଙ୍କୁ ଅନୁରୋଧ କରାଯାଇଥିଲା। ଗିରଫ ହେବା ପରେ ପ୍ରଦୀପଙ୍କୁ ଡିଆରଡିଓ ଚାକିରିରୁ ନିଲମ୍ବନ କରିଥିଲା। ଗୁପ୍ତଚର ବୃତ୍ତି ଏବଂ ଭୁଲ୍ ଯୋଗାଯୋଗ ପାଇଁ ତାଙ୍କ ବିରୋଧରେ ସରକାରୀ ଗୋପନୀୟତା ଆଇନ (ଓଏସ୍ଏ) ଅନୁଯାୟୀ ମାମଲା ରୁଜୁ ହୋଇଛି।
