କେନ୍ଦୁଝର,୨୭ା୪(ସ୍ବ.ପ୍ର.): କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟର ଅସ୍ଥିଶଲ୍ୟ ବିଭାଗର ଡାକ୍ତର ଅନିଲ କୁମାର ପଣ୍ଡା ଜଣେ ରୋଗୀଙ୍କୁ ଚିକିତ୍ସା ପାଇଁ ଅର୍ଥ ମାଗିବା ଘଟଣାକୁ ନେଇ ମେଡିକାଲ ପରସରରେ ଉତ୍ତେଜନା ଦେଖାଦେଇଛି। ଡାକ୍ତରଖାନାରେ ଅପରେଶନ ସୁବିଧା ନ ଥିବା କହି ଏକ ଘରୋଇ ଡାକ୍ତରଖାନାକୁ ଯିବା ପାଇଁ କହିଥିଲେ ଏବଂ ବିଜୁ ସ୍ବାସ୍ଥ୍ୟକାର୍ଡରେ ଝିଅର ନାମ ନ ଥିବାରୁ ଏଥିପାଇଁ ୪୦ ହଜାର ଟଙ୍କା ଖର୍ଚ୍ଚ ହେବ ବୋଲି କହିଥିଲେ।
ଘଟଣାରୁ ପ୍ରକାଶ ଯେ, ବାଂଶପାଳ ବ୍ଲକ ମେଦିନପୁର ଗ୍ରାମର ଜଳଧର ମୁଣ୍ଡା ତାଙ୍କ ୨ ବର୍ଷର ଝିଅ ଲିପ୍ସାଙ୍କ ହାତ ଅପରେଶନ ପାଇଁ ଗତ ୨୦ ତାରିଖରେ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ଆସିଥିଲେ। ଶିଶୁକନ୍ୟାଟିର ଡାହାଣ ହାତରେ ୬ଟି ଆଙ୍ଗୁଳି ଥିବାରୁ ଗୋଟିଏ ଆଙ୍ଗୁଳି ଅପରେଶନ କରିବା ପାଇଁ ଆସିଥିଲେ। ସେ ଜଣେ ଗରିବ ଶ୍ରେଣୀର ହୋଇଥିବାରୁ ମେଡିକାଲରେ ଚିକିତ୍ସା କରିବା ପାଇଁ କହିଥିଲେ। କିନ୍ତୁ ଏଠାରେ ସୁବିଧା ନ ଥିବା ଦର୍ଶାଇ ଡାକ୍ତର ପଣ୍ଡା ଘରୋଇ ଡାକ୍ତରଖାନାକୁ ପଠାଇବା ପାଇଁ କହିଥିଲେ ବୋଲି ଅଭିଯୋଗ ହୋଇଛି। ବିଜୁ ସ୍ବାସ୍ଥ୍ୟ କଲ୍ୟାଣ କାର୍ଡରେ ଝିଅର ନାମ ନ ଥିବାରୁ ତୁମ ଝିଅର ଅପରେଶନ ପାଇଁ ୪୦ ହଜାର ଟଙ୍କା ଖର୍ଚ୍ଚ ହେବ ବୋଲି କହିଥିଲେ। ଝିଅଙ୍କ ମା’ ସୌଦାମିନୀ ୪/୫ହଜାର ଟଙ୍କା ଦେବେ ବୋଲି କହିବାରୁ ଡାକ୍ତର ଅପରେଶନ କରିବାକୁ ମନା କରିଥିଲେ। ଜଣେ ଗରିବ ଆଦିବାସୀ ଲୋକ ଅର୍ଥ ଅଭାବରୁ ତାଙ୍କ ଝିଅର ଅପରେଶନ କରିପାରୁ ନ ଥିବା ଜାଣିବା ପରେ ଜିଲା ଓକିଲ ସଂଘର ସଭାପତି ଆଶିଷ ଚକ୍ରବର୍ତ୍ତୀ, ସମ୍ପାଦକ ସଞ୍ଜିତ୍ ଦାସ ଏବଂ ଅନ୍ୟ କର୍ମକର୍ତ୍ତାମାନେ ପହଞ୍ଚି ଜିଲା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର କିଶୋର କୁମାର ପୃଷ୍ଟିଙ୍କୁ ଘେରାଉ କରିବା ସହ ଡାକ୍ତରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ। ଜିଲା ମୁଖ୍ୟ ଚିକିତ୍ସାଧିକାରୀ ଏବଂ ଅତିରିକ୍ତ ମୁଖ୍ୟ ଚିକିତ୍ସାଧିକାରୀ ଡାକ୍ତର ଅଶ୍ୱିନୀ ଦେ ଜିଲା ଓକିଲ ସଂଘର କର୍ମକର୍ତ୍ତାଙ୍କ ସହ ଆଲୋଚନା କରି ଶିଶୁଟିର ମାଗଣାରେ ଅପରେଶନ କରାଯିବା ସହ ଡିଏମଏଫ୍ରେ ନିଯୁକ୍ତି ପାଇଥିବା ଡାକ୍ତର ପଣ୍ଡାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି।
