ବେଙ୍ଗାଲୁରୁ,୬।୪: ପାଖେଇ ଆସୁଛି କର୍ନାଟକ ବିଧାନସଭା ନିର୍ବାଚନ। ଆଉ ମାତ୍ର ଗୋଟିଏ ମାସ ମଧ୍ୟରେ ହେବାକୁ ଯାଉଛି କର୍ନାଟକ ନିର୍ବାଚନ। ଏବେ ରାଜ୍ୟର ରାଜନୈତିକ ମାହୋଲ ହୋଇଛି ସରଗରମ। ଏହାରି ଭିତରେ କେତେଜଣ କନ୍ନଡ ଫିଲ୍ମ କଳାକାର ବିଧାନସଭା ନିର୍ବାଚନରେ ଚମକ ଓ ଗ୍ଲାମର ଯୋଡିବାକୁ ପ୍ରସ୍ତୁତ ହୋଇଗଲେଣି। ଜନତା ଫିଲ୍ମ କଳାକାରଙ୍କୁ ଅଧିକ ପସନ୍ଦ କରୁଥିବାରୁ ପ୍ରାୟ ସବୁ ରାଜନୈତିକ ଦଳ ଏମାନଙ୍କୁ ନିଜ ନିଜ ଦଳରେ ସାମିଲ କରିବାକୁ ଚେଷ୍ଟା କରୁଛନ୍ତି।
ଲୋକପ୍ରିୟ ଷ୍ଟାର କିଚ୍ଚା ସୁଦିପ ବୁଧବାର ଏହି ଘୋଷଣା କରି କହିଛନ୍ତି, ସେ ମୁଖ୍ୟମନ୍ତ୍ରୀ ବସବରାଜ ବୋମ୍ମଇଙ୍କ ପାଇଁ ପ୍ରଚାର କରିବେ। ଏପଟେ ଫିଲ୍ମ ଦୁନିଆର ଆଉ ଜଣେ କଳାକାର ବି ନିର୍ବାଚନ ଲଢିପାରନ୍ତି ବୋଲି ଶୁଣିବାକୁ ମିଳିଛି।
କନ୍ନଡ ଫିଲ୍ମର ସୁପରଷ୍ଟାର କିଚ୍ଚା ସୁଦିପ ବହୁ ଦଳ ସହ ଜଡିତ ଥିବା ଶୁଣିବାକୁ ମିଳୁଥିଲା। ଚର୍ଚ୍ଚା ହେଉଥିଲା କି ସେ କଂଗ୍ରେସର ଷ୍ଟାର ପ୍ରଚାରକ ହୋଇପାରନ୍ତି। ଏମିତିକି ତାଙ୍କ ଫଟୋ ରାଜ୍ୟ କଂଗ୍ରେସର ଅଧ୍ୟକ୍ଷ ଡିକେ ଶିବକୁମାରଙ୍କ ସହ ଦେଖିବାକୁ ମିଳିଥିଲା। ହେଲେ ଏହି ସୁପରଷ୍ଟାର ଭାଜପାରେ ସାମିଲ ହେବା କଥା କିଛିଦିନ ହେବ ଚର୍ଚ୍ଚା ହେଉଥିଲା। ଏହାରି ଭିତରେ ସୁଦିପ ଭାଜପାର ଷ୍ଟାର ପ୍ରଚାରକ ହେବା କଥା ସ୍ପଷ୍ଟ କରିଥିଲେ। ସେ କହିଥିଲେ କି ମୁଁ ମୁଖ୍ୟମନ୍ତ୍ରୀ ବସବରାଜ ବୋମ୍ମଇଙ୍କ ସମର୍ଥନ କରିବାକୁ ଆସିଛି।
