ସୁନାବେଡା, ୪ା୪ (ସ୍ବ.ପ୍ର.): କୋରାପୁଟ ଜିଲା ଦାମନଯୋଡିସ୍ଥିତ ନାଲ୍କୋ ଭିଆଇପି ଅତିଥି ଭବନରେ ଅବିଭକ୍ତ କୋରାପୁଟ ଜିଲାର ରେଲୱେ ଜମିହରା ସଂଘ ପକ୍ଷରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ଧର୍ମେନ୍ଦ୍ରଙ୍କ କୋରାପୁଟ ଜିଲା ଗସ୍ତ ଅବସରରେ ସଂଘ ଏହି ଦାବିପତ୍ର ଦେଇଥିଲା। ଦୀର୍ଘବର୍ଷ ହେବ କୋରାପୁଟଠାରୁ ରାୟଗଡ଼ା ପର୍ଯ୍ୟନ୍ତ ନିର୍ମିତ ରେଳ ଲାଇନ ପାଇଁ ୧୦୯ଟି ଗ୍ରାମର ୧୩୮୦ ଜଣ ୨୬୫୭.୬୨ ଏକର ଜମି ହରାଇଥିଲେ । ଯେଉଁଥିରେ ୧୧ ପରିବାର ନିଜ ଘରଡିହ ହରାଇଥିବା ବେଳେ ୧୧୦ ପରିବାର ନିଜର ସମ୍ପୂର୍ଣ୍ଣ ଚାଷଜମି, ୧୦୨୭ଜଣ ୨୫ରୁ ୫୦ ଭାଗ,୧୪୮ଜଣ ୭୫ ଭାଗ, ୮୭ଜଣ ୫୦ରୁ ୭୫ଭାଗ ଚାଷଜମି ହରାଇଥିଲେ। ସେମାନଙ୍କ ମଧ୍ୟରୁ ମାତ୍ର ୧୮୮ ଜଣଙ୍କୁ ରେଲଓ୍ବେ ଥଇଥାନ କରିଛି। ରେଲଓ୍ବେ ସେମାନଙ୍କ ଜମି ନେଇଥିବାରୁ ସେମାନଙ୍କୁ ଥଇଥାନ କରି ଚାକିରି ଦେବ ବୋଲି ଏହି ଜମିହରାମାନେ ଆଶା ରଖିଥିଲେ। ମାତ୍ର ରେଲଓ୍ବେ ଏପର୍ଯ୍ୟନ୍ତ ସେମାନଙ୍କୁ ଥଇଥାନ କରିନି କି ଚାକିରି ମଧ୍ୟ ଦେଇନି। ଫଳରେ ଜାଗାବାଡି ଦେଇ ଏବେ ଲୋକେ ହଇରାଣ ହେଉଛନ୍ତି। ଘରବାଡି ହରାଇଥିବା ଅବଶିଷ୍ଟ ୧୧୯୨ ଜଣଙ୍କୁ ରେଲଓ୍ବେ କେବେ ଚାକିରି ଦେଇ ଥଇଥାନ କରିବ ସେନେଇ ସଂଘ ପ୍ରଶ୍ନ ଉଠାଇଛି। ଏ ଦିଗରେ ଗୁରୁତ୍ୱ ଦେଇ ପଦକ୍ଷେପ ନ ନେଲେ ଆଗାମୀ ଦିନରେ ରେଳ ଧାରଣାରେ ଧାରଣା ଦେବୁ ବୋଲି ଚେତାବନୀ ଦେଇଛନ୍ତି ଜମିହରା ସଂଘ ସମ୍ପାଦକ ପଦନ ଗୌଡ଼। ସୂଚନାଯୋଗ୍ୟ, ଏ ସମ୍ପର୍କରେ ଆଜିକୁ ୬ ବର୍ଷରୁ ଊଦ୍ଧର୍ବ ହେବ ଜିଲା ପ୍ରଶାସନଠାରୁ ଆରମ୍ଭକରି ରାଜ୍ୟ ସରକାର,ରେଲଓ୍ବେର ବରିଷ୍ଠ ଅଧିକାରୀ ଏବଂ କେନ୍ଦ୍ର ରେଳମନ୍ତ୍ରୀଙ୍କୁ ସଂଘ ପକ୍ଷରୁ ଅବଗତ କରାଯାଇଥିଲେ ସୁଦ୍ଧା କୌଣସି ସୁଫଳ ମିଳି ନ ଥିବା ସଂଘ ସଭାପତି ଜଳନ୍ଧର ଖିଲ କହିଛନ୍ତି।
