ବଲାଙ୍ଗୀର ଅଫିସ, ୨୭ା୩:ବଲାଙ୍ଗୀର ଡାକମଣ୍ଡଳର ବିଭିନ୍ନ ପଦବୀ ପାଇଁ କେତେକ ପ୍ରାର୍ଥୀ ଜାଲ ସାର୍ଟିଫିକେଟ ଦେଇ ଧରାପଡିଛନ୍ତି। ଏହି ଘଟଣାରେ ପୋଲିସ କାର୍ଯ୍ୟାନୁଷ୍ଠାନ ପରେ ହଇଚଇ ସୃଷ୍ଟି ହୋଇଛି। ଗତ ତିନିଦିନ ଧରି ପୋଲିସ ପକ୍ଷରୁ କରାଯାଇଥିବା ଖୋଳତାଡରୁ ଏହା ଏକ ଜାତୀୟସ୍ତର ଜାଲ ସାର୍ଟିଫିକେଟ ସ୍କାମ ବୋଲି ସ୍ପଷ୍ଟ ହୋଇଛି। ବିଭିନ୍ନ ରାଜ୍ୟର ଅନେକ ଶିକ୍ଷାନୁଷ୍ଠାନରେ କେତେକ କୋଅର୍ଡିନେଟର, ଦଲାଲ ସଙ୍ଗଠିତ ଭାବେ ଏହି ସ୍କାମ୍ ଚଳାଉଥିବା ପ୍ରାରମ୍ଭିକ ତଦନ୍ତରୁ ସ୍ପଷ୍ଟ ହୋଇଥିବା କହିଛନ୍ତି ବଲାଙ୍ଗୀର ଏସ୍ପି ନୀତିନ୍ କୁଶଲକର।
ଏସ୍ପି କୁଶଲକରଙ୍କ ନିର୍ଦ୍ଦେଶରେ ଗଠିତ ସ୍ବତନ୍ତ୍ର ସ୍କ୍ବାଡ ଜାଲ ସାର୍ଟିଫିକେଟ ଗୁମର ଖୋଲିବାକୁ ତନାଘନା ଚଳାଇଛନ୍ତି। ବଲାଙ୍ଗୀର ଡାକମଣ୍ଡଳ ଜାଲ ସାର୍ଟିଫିକେଟ ମାମଲାରେ ପୋଲିସ ଏଯାବତ୍ ୨୧ ଜଣଙ୍କୁ ଅଟକ ରଖି ପଚରାଉଚରା କରିଛି। ପଚରାଉଚରା ପରେ ବଲାଙ୍ଗୀର ମିଶନ ପଡିଆ ସମ୍ମୁଖସ୍ଥ କୋଚିଂ ସେଣ୍ଟର ରିଲାଏନ୍ସ ଏଜୁକେଶନ କମ୍ପ୍ଳେକ୍ସରେ ଚଢ଼ାଉ କରି ବହୁ ଜାଲ ସାର୍ଟିଫିକେଟ, ପ୍ରିଣ୍ଟର୍ସ, କମ୍ପ୍ୟୁଟର, ୩୩ଟି ଶିକ୍ଷାନୁଷ୍ଠାନ, ସରକାରୀ ଅଫିସର ଷ୍ଟାଫ୍, ସିଲ, ଜେରକ୍ସ ମେଶିନ୍ ଜବତ କରିଥିଲା। ଏହା ସହିତ ରିଲାଏନ୍ସ ଏଜୁକେଶନ କମ୍ପ୍ଳେକ୍ସର ମାଲିକ ମନୋଜ ମିଶ୍ର ଏବଂ ସହଯୋଗୀ ଆଲୋକ ଉଦ୍ଗାତାଙ୍କୁ ଅଟକ ରଖି ପଚରାଉଚରା କରିଥିଲେ। ସେମାନଙ୍କ ସହ ଅନ୍ୟ ଅଟକ ଯୁବତୀ ଯୁବକଙ୍କଠାରୁ ମିଳିଥିବା ତଥ୍ୟରୁ ବିଭିନ୍ନ ପ୍ରଦେଶରେ ଥିବା ୩୮ଟି ସ୍କୁଲ, କଲେଜ ଏବଂ ବିଶ୍ୱବିଦ୍ୟାଳୟର ଜାଲ ସାର୍ଟିଫିକେଟ ଗୁମର ଧରାପଡିଛି। ଏହାବାଦ୍ ରିଲାଏନ୍ସ କୋଚିଂ ସେଣ୍ଟରରୁ ୨୭ଟି ଶିକ୍ଷାନୁଷ୍ଠାନର ରବର ଷ୍ଟାମ୍ପ ଓ ସିଲ୍ ସହ ବଲାଙ୍ଗୀର ଓ ପୁଇଁତଳା ତହସିଲଦାରଙ୍କ ସମେତ ୬ଟି ଅଫିସିଆଲ ଷ୍ଟାମ୍ପ ଓ ସିଲ୍ ମିଳିଛି। ଅଟକ ଯୁବତୀ, ଯୁବକଙ୍କଠାରୁ ମିଳୁଥିବା ସୂଚନା ଆଧାରରେ ପୋଲିସ ତଦନ୍ତ ତ୍ୱରାନ୍ବିତ କରୁଛି ବୋଲି ଏସ୍ପି କୁଶଲକର ସୂଚନା ଦେଇଛନ୍ତି। ତେବେ ଏହା ଏକ ଜାତୀୟ ସ୍ତରର ସ୍କାମ୍ ହୋଇଥିବାରୁ ଏଦିଗରେ ବଡଧରଣର କାର୍ଯ୍ୟାନୁଷ୍ଠାନର ଆବଶ୍ୟକତା ରହିଛି ବୋଲି ଏସ୍ପି କହିଛନ୍ତି।
ଅପରପକ୍ଷରେ ମିଶନ ପଡିଆ ସମ୍ମୁଖ ରିଲାଏନ୍ସ ଏଜୁକେଶନ କମ୍ପ୍ଳେକ୍ସରେ ଚଢ଼ାଉ ପରେ ମିଳିଥିବା ତଥ୍ୟ ଆଧାରରେ ରବିବାର ସ୍ଥାନୀୟ ଭାରତୀୟ ଜୀବନ ବୀମା ନିଗମ ଅଫିସ ସମ୍ମୁଖ ରାସ୍ତାରେ ଥିବା କମ୍ପଭାଇ ଭୋକେଶନାଲ ଟ୍ରେନିଂ ଇନଷ୍ଟିଚ୍ୟୁଟ(କେବିଭିଟିଆଇ)ରେ ପୋଲିସ ଟିମ୍ ଚଢ଼ାଉ କରିଥିଲା। ମାଜିଷ୍ଟ୍ରେଟ୍ ତହସିଲଦାର ପୁଷ୍ପାଞ୍ଜଳି ପଣ୍ଡାଙ୍କ ଉପସ୍ଥିିତିରେ ଏସ୍ଡିପିଓ ତୋଫାନ୍ ବାଗ, ଟାଉନ୍ ଥାନା ଆଇଆଇସି ବିଶ୍ୱଜିତ୍ ମନବୋଧ, ସଦର ଥାନା ଆଇଆଇସି ଶ୍ରୀକାନ୍ତ ସାହୁ ଓ ଅନ୍ୟ ପୋଲିସ ଟିମ୍ ସଦସ୍ୟ ଏହି ସଂସ୍ଥା ଅଫିସରେ ଚଢ଼ାଉ କରି ବିଭିନ୍ନ କାଗଜପତ୍ର, ବ୍ୟାଙ୍କ ପାସ୍ବୁକ୍, ପାସ୍ପୋର୍ଟ, ଷ୍ଟାମ୍ପ ଓ ସିଲ୍ ଯାଞ୍ଚ କରିଥିଲେ। ଚଢ଼ାଉ ସମୟରେ ଏହି ସଂସ୍ଥାର ମାଲିକ ଅନୁପସ୍ଥିତ ଥିଲେ ଓ କର୍ମଚାରୀମାନେ ଅଫିସ ଖୋଲିଥିଲେ। ରିଲାଏନ୍ସ କୋଚିଂ ସେଣ୍ଟରରୁ ମିଳିଥିବା ସାର୍ଟିଫିକେଟ ଧରାପଡିବା ବେଳେ ଏହି କମ୍ପଭାଇ ଭୋକେଶନାଲ ଟ୍ରେନିଂ ଇନଷ୍ଟିଚ୍ୟୁଟରେ ମଧ୍ୟ କିଛି ସାର୍ଟିଫିକେଟ ଏଠାରେ ରହିଥିବା ଦେଖିବାକୁ ମିଳିଥିଲା। କିଭଳି ଭାବେ ଏହି ସଂସ୍ଥାର ସାର୍ଟିଫିକେଟ ରିଲାଏନ୍ସ କୋଚିଂ ସେଣ୍ଟରକୁ ଗଲା ସେନେଇ ତଦନ୍ତ କରାଯିବା ପରେ ପୋଲିସ ପକ୍ଷରୁ ଚଢ଼ାଉ କରାଯାଇଥିଲା। ଏଠାରୁ କ’ଣ ସବୁ ମିଳିଛି ସେନେଇ ପୋଲିସ ପକ୍ଷରୁ କିଛି କୁହାଯାଇନାହିଁ।
