ନୂଆଦିଲ୍ଲୀ, ୨୨ା୩: ପୁରୁଣା ପେନ୍ସନ ସ୍କିମ୍ (ଓପିଏସ୍) ଲାଗୁ ଦାବିରେ ବିଭିନ୍ନ ରାଜ୍ୟରେ ସରକାରୀ କର୍ମଚାରୀମାନଙ୍କ ପକ୍ଷରୁ ବିକ୍ଷୋଭ କରାଯାଉଥିବାବେଳେ ଏଥିରୁ ଓହରିବା ପାଇଁ କେନ୍ଦ୍ର ସରକାର ପରାମର୍ଶ ଦେଇଛନ୍ତି। ନଚେତ୍ ଏହାର ପରିଣାମ କର୍ମଚାରୀଙ୍କୁ ଭୋଗିବାକୁ ପଡ଼ିବ। ମଙ୍ଗଳବାର ଜଏଣ୍ଟ ଫୋରମ ଫର୍ ରିଷ୍ଟୋରେଶନ୍ ଅଫ୍ ଓଲ୍ଡ ପେନ୍ସନ ସ୍କିମ୍ ବ୍ୟାନର ଅଧୀନରେ ନ୍ୟାଶନାଲ ଜଏଣ୍ଟ କାଉନ୍ସିଲ୍ ଅଫ୍ ଆକ୍ସନ୍ (ଏନ୍ଜେସିଏ) ପକ୍ଷରୁ ଜିଲା ସ୍ତରୀୟ ବିକ୍ଷୋଭ ପ୍ରଦର୍ଶନ କରାଯିବାର ଥିଲା। ଏହି ବିକ୍ଷୋଭରୁ ନିବୃତ୍ତ ରହିବା ପାଇଁ ସୋମବର କେନ୍ଦ୍ରୀୟ କାର୍ମିକ ପ୍ରଶିକ୍ଷଣ (ଡିଓପିଟି) ବିଭାଗ ପକ୍ଷରୁ ପ୍ରତି ବିଭାଗକୁ ଅବଗତ କରାଯାଇଛି। ସରକାରୀ କର୍ମଚାରୀମାନେ ବିକ୍ଷୋଭ, ରାଲି ଆଦିରେ ଅଂଶଗ୍ରହଣ କରିବା ଦ୍ୱାରା ଧାରା ୭କୁ ଉଲ୍ଲଘଂନ କରୁଥିବା ଡିଓପିଟି କହିଛି। କୌଣସି କର୍ମଚାରୀ ଓପିଏସ୍ ଲାଗୁ ବିକ୍ଷୋଭରେ ସାମିଲ ହେଲେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସର୍ବୋଚ୍ଚ ନ୍ୟାୟାଳୟ ଏଭଳି ବିକ୍ଷୋଭକୁ ବିରୋଧ କରୁଥିବାବେଳେ ସରକାରୀ କର୍ମଚାରୀ ଉକ୍ତ ନିୟମକୁ ପାଳନ କରିବା ଆବଶ୍ୟକ।
