ରାୟପୁର,୨୫।୨: ଛତିଶଗଡ଼ର ନୟା ରାୟପୁରରେ ଚାଲିଥିବା କଂଗ୍ରେସର ୮୫ତମ ପୂର୍ଣ୍ଣ ଅଧିବେଶନରେ ମୋଦି ସରକାରଙ୍କୁ ଟାର୍ଗେଟ କରିଛନ୍ତି ସୋନିଆ ଗାନ୍ଧୀ। କେନ୍ଦ୍ର ସରକାର ଏବଂ ଆର୍ଏସ୍ଏସ୍ ସମସ୍ତ ସ୍ବୟଂଶାସିତ ଏଜେନ୍ସିଗୁଡ଼ିକୁ କବ୍ଜା କରିନେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶ ପାଇଁ ନୁହେଁ ବରଂ ତାଙ୍କ ବନ୍ଧୁମାନଙ୍କ ପାଇଁ କ୍ଷମତା ଚଳାଉଛନ୍ତି ବୋଲି ସମ୍ମିଳନୀର ଦ୍ୱିତୀୟ ଦିନରେ କଂଗ୍ରେସ ନେତା ସୋନିଆ କହିଛନ୍ତି।
ଅଧିବେଶନକୁ ସମ୍ବୋଧିତ କରି ସୋନିଆ କହିଛନ୍ତି, ଆମକୁ ଭାଜପା ଶାସନକୁ ଦୃଢ଼ ଭାବେ ମୁକାବିଲା କରିବାକୁ ହେବ। ଲୋକଙ୍କ ନିକଟରେ ଆମକୁ ପହଞ୍ଚିବାକୁ ପଡ଼ିବ। ଫଳରେ ଆମର ବାର୍ତ୍ତା ସ୍ପଷ୍ଟ ଭାବେ ଜଣାପଡ଼ିବ। ଭାଜପା କିନ୍ତୁ ନିଆଁରେ ଘିଅ ଢ଼ାଳିବା କାମ କରୁଛି। ସଂଖ୍ୟାଲଘୁ, ମହିଳା, ଦଳିତ, ଆଦିବାସୀଙ୍କୁ ଟାର୍ଗେଟ କରୁଛି। ଭାଜପା ପ୍ରତ୍ୟେକ ଅନୁଷ୍ଠାନକୁ କବ୍ଜା କରି ନେଇଥିବାରୁ ଏହା ଦଳ ତଥା ଦେଶ ପାଇଁ ଆହ୍ବାନପୂର୍ଣ୍ଣ ସମୟ ବୋଲି ସୋନିଆ କହିଛନ୍ତି।
ତେବେ କଂଗ୍ରେସର ପ୍ରଶଂସା କରି ସୋନିଆ କହିଛନ୍ତି, ଏହା ଏକ ରାଜନୈତିକ ଦଳ ନୁହେଁ। ବରଂ ଏହା ଏକ ମାଧ୍ୟମ ଯାହାଦ୍ୱାରା ଲୋକେ ସମାନତା, ସ୍ବାଧୀନତା, ନ୍ୟାୟ ପାଇଁ ଲଢ଼ନ୍ତି। ଆମେ ଲୋକଙ୍କ ସ୍ବରକୁ ଆଗକୁ ନେଇ ସେମାନଙ୍କ ସ୍ବପ୍ନକୁ ପୂରଣ କରୁ। ଦଳର ରାସ୍ତା ସହଜ ନୁହେଁ। ହେଲେ ଆମେ ନିଶ୍ଚିତ ଭାବେ ଜିତିବୁ। ଗଣତନ୍ତ୍ରକୁ ମଜଭୂତ କରିବା ଲାଗି କଂଗ୍ରେସ ସର୍ବଦା କାର୍ଯ୍ୟ କରିଛି ବୋଲି ସେ କହିଛନ୍ତି।
