ବିଶାଖାପାଟ୍ଟନମ,୧୦ ।୨: ବିମାନ ଯାତ୍ରା ସମୟରେ କେବେ କେବେ ଜଣେ ଜଣେ ଯାତ୍ରୀଙ୍କ ଲଗେଜ ରହିଯାଇଥିବା ଖବର ସାମ୍ନକୁ ଆସିଛି । ଏହାକୁ ଏକ ସାଧାରଣ ଭୁଲ ବୋଲି ଧରାଯାଇଥାଏ । ହେଲେ ଗୋଟିଏ ବିମାନରେ ଯାତ୍ରା କରୁଥିବା ୩୭ ଜଣ ଯାତ୍ରୀଙ୍କ ସହ ଯଦି ଏମିତି ହୁଏ ତେବେ ତାକୁ କ’ଣ କୁହାଯିବ ବୋଲି ପ୍ରଶ୍ନ ଉଠିଛି । ସୂଚନାଯୋଗ୍ୟ, ଗୁରୁବାର ଇଣ୍ଡିଗୋ ଏୟର ଲାଇନ୍ସର ଏକ ବିମାନ ହାଇଦ୍ରାବାଦରୁ ବିଶାଖାପଟ୍ଟନମ ପହଞ୍ଚିବା ପରେ ଏମିତି ଘଟଣା ସାମ୍ନାକୁ ଆସିଛି ।
ସୂଚନାଯୋଗ୍ୟ, ଇଣ୍ଡିଗୋ ଏୟାର ଲାଇନ୍ସ ଏହି ଘଟଣାକୁ ନେଇ ଏକ ବୟାନ ଜାରି କରି କହିଛି, ଯାତ୍ରୀ ଭୋଗିଥିବା ଅସୁବିଧା ପାଇଁ ଏୟାର ଲାଇନ୍ସ ଦୁଃଖିତ । ତେବେ ସମସ୍ତ ଯାତ୍ରୀଙ୍କ ଲଗେଜ ସେମାନଙ୍କ ଠିକଣାରେ ସୁରକ୍ଷିତ ଭାବେ ପହଞ୍ଚିବ ବୋଲି କୁହାଯାଇଛି ।
କୁହାଯାଉଛି କି ହାଇଦ୍ରାବାଦ ଏୟାର ପୋର୍ଟରୁ ବିଶାଖାପାଟ୍ଟନ ଯିବାକୁ ଗୁରୁବାର ଏକ ବିମାନ ୬ଇ-୪୦୯ ଉଡାଣ ଆରମ୍ଭ କରିଥିଲା । ବିମାନଟି ଯେତେବେଳେ ତା’ର ଗନ୍ତବ୍ୟ ସ୍ଥାନରେ ପହଞ୍ଚିଥିଲା ସେତେବେଳେ ଯାତ୍ରୀମାନେ ସେମାନଙ୍କ ଲଗେଜ ଖୋଜିବା ଆରମ୍ଭ କରିଥିଲେ । ବେଶ କିଛି ସମୟ ଲଗେଜ ବେଲ୍ଟରେ ଲଗେଜକୁ ଅପେକ୍ଷା କରିବା ପରେ ସେମାନେ ବ୍ୟସ୍ତ ହୋଇଯାଇଥିଲେ । ପରେ ଜଣାପଡିଥିଲା କି ବିମାନରେ ଆସିଥିବା ୩୭ ଜଣଙ୍କ ଲଗେଜ୍ ମିସ୍ ହୋଇଯାଇଛି ।
