ହର୍ଦ୍ଦୋଇ,୩।୨: ସାମାଜବାଦୀ ପାର୍ଟି(ଏସ୍ପି)ର ଅଧ୍ୟକ୍ଷ ତଥା ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବଙ୍କ ସହ ଜଡ଼ିତ ଏକ ବଡ଼ ଖବର ସାମ୍ନାକୁ ଆସିଛି। ଉତ୍ତରପ୍ରଦେଶର ହର୍ଦ୍ଦୋଇରେ ଅଖିଳେଶଙ୍କ କାର୍କେଡ ଦୁର୍ଘଟଣାଗସ୍ତ ହୋଇଛି। ଏଥିରେ ଏକାସଙ୍ଗେ ୪ରୁ ଊର୍ଦ୍ଧ୍ୱ ଗାଡ଼ି କ୍ଷତିଗ୍ରସ୍ତ ହୋଇଛି। ଏହି ଦୁର୍ଘଟଣାରେ ଅନେକ ଆହତ ହୋଇଥିବା ଜଣାପଡ଼ିଛି। ସୂଚନାଯୋଗ୍ୟ, ଶୁକ୍ରବାର ହରପାଲପୁରର ବୈଠାପୁରରେ ଅନୁଷ୍ଠିତ ହୋଇଥିବା ଏକ ବିବାହ ସମାରୋହରେ ସାମିଲ ହେବାକୁ ଅଖିଳେଶ ଯାଦବ ଯାଉଥିଲେ। ଏହି ସମୟରେ ମଲ୍ଲାବା ବିଲଗ୍ରାମ ରୋଡର ଖେମିପୁର ଗ୍ରାମ ନିକଟରେ କୌଣସି କାରଣରୁ କାର୍କେଡର ଏକ ଗାଡ଼ି ବ୍ରେକ୍ ଲଗାଇଥିବା ବେଳେ ଅନ୍ୟ ଗାଡ଼ିଗୁଡ଼ିକ ପଛକୁ ପଛ ପରସ୍ପର ସହ ପିଟି ହୋଇଯାଇଥିଲା। ହେଲେ ଦୁର୍ଘଟଣାରେ ଅଖିଳେଶଙ୍କ ଗାଡ଼ି ଅଳ୍ପକେ ବର୍ତ୍ତଯାଇଛି। ତାଙ୍କ ଗାଡ଼ିର କୌଣସି କ୍ଷତି ହୋଇ ନ ଥିବା ସୂଚନା ମିଳିଛି। କାରଣ ତାଙ୍କ ପଛରେ ଥିବା ଅନ୍ୟ ଗାଡ଼ିଗୁଡ଼ିକ ପରସ୍ପର ସହ ପିଟି ହୋଇଥିଲେ। ଏହି ଦୁର୍ଘଟଣାର କେତେକ ଭିଡିଓ ସାମ୍ନାକୁ ଆସିଛି। ଯେଉଁଥିରେ ୪ଗାଡ଼ି କ୍ଷତିଗ୍ରସ୍ତ ହୋଇଥିବା ଦେଖିବାକୁ ମିଳିଛି।
