ନୂଆଦିଲ୍ଲୀ,୨୯।୧୨: ସାରା ଦେଶରେ ବଢ଼ୁଥିବା କରୋନା ବିପଦକୁ ଦୃଷ୍ଟିରେ ରଖି ଭାରତରେ ଲଗାତର ଭାବେ ପ୍ରସ୍ତୁତି ଚଳାଇଛି। ଆସନ୍ତା ମାସ ଅର୍ଥାତ୍ ଜାନୁଆରୀ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିଶେଷଜ୍ଞମାନେ କହିଛନ୍ତି। ଜାନୁଆରୀରେ କରୋନା ମାମଲା ଦ୍ରୁତ ଗତିରେ ବୃଦ୍ଧି ପାଇପାରେ। ଏଥିସହ ଓମିକ୍ରନର ସବ୍-ଭାରିଆଣ୍ଟ ବିଏଫ୍-୭ ମଧ୍ୟ ଦେଶରେ ବ୍ୟାପିପାରେ ବୋଲି ଆଶଙ୍କା କରାଯାଉଛି। ଇତିମଧ୍ୟରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭିଆ ଆଉ ଏକ ସମୀକ୍ଷା ବୈଠକ କରିଛନ୍ତି। ସୋମବାର ସ୍ବାସ୍ଥ୍ୟମନ୍ତ୍ରୀ ଭିଡିଓ କନ୍ଫରେନ୍ସିଂ ଜରିଆରେ ସମସ୍ତ ବଡ଼ ଫାର୍ମା କମ୍ପାନୀ ସହ ବୈଠକ କରିଥିଲେ। ଯେଉଁଥିରେ ଆଗାମୀ ଦିନରେ ଔଷଧର ଅଭାବ ନ ହେବାକୁ ସୁନିଶ୍ଚିତ କରାଯାଇଥିଲା। ଏହି ବୈଠକରେ ଫାର୍ମା କମ୍ପାନୀମାନଙ୍କୁ ବିଭିନ୍ନ ପରାମର୍ଶ ଦେଇ ସ୍ବାସ୍ଥ୍ୟମନ୍ତ୍ରୀ କହିଛନ୍ତି, କମ୍ପାନୀଗୁଡିକ ସମଗ୍ର ବିଶ୍ୱରେ କରୋନା ସ୍ଥିତିକୁ ଲଗାତର ଭାବେ ନଜର ରଖିବା ଉଚିତ୍ ଏବଂ ସେହି ଅନୁଯାୟୀ ସେମାନଙ୍କର ଅତ୍ୟାବଶ୍ୟକ ଔଷଧ ଓ ଅନ୍ୟାନ୍ୟ ଜିନିଷର ଷ୍ଟକ ମହଜୁଦ୍ ରଖିବା ଆବଶ୍ୟକ। ଯେକୌଣସି ପରିସ୍ଥିତିରେ ଯଦି କରୋନା ମାମଲା ବୃଦ୍ଧି ହୁଏ ତେବେ ଔଷଧର ଯେପରି ଅଭାବ ନ ହୁଏ ଏବଂ ସେମାନଙ୍କ ଷ୍ଟକ ପର୍ଯ୍ୟାପ୍ତ ପରିମାଣରେ ଉପଲବ୍ଧ ରହିବା ଉଚିତ୍ ବୋଲି ମନସୁଖ ମାଣ୍ଡଭିଆ ସେମାନଙ୍କୁ ନିର୍ଦ୍ଦେଶ ଦେଇଛନ୍ତି।
